2 REYES 10 - Dios Rimashcata Quillcashcami

Jehú Acabpac churicunata huañuchishcamanta

¹ Acabca Samaria pueblopica canchis chunga churitami charirca. Chaimantami Jehuca Jezreel pueblota mandaccunaman, pushac yuyaccunaman, Acabpac churicunata yachachiccunaman quillcashpa, Samaria puebloman cacharca. Chai quillcapica:

² «Cancunami cancunata mandacpac churicunatapish, carretacunatapish, caballocunatapish, muyundita pircashca pueblotapish, macanacuccunatapish charicunguichic. Chaimanta cai quillcaca cancunapacman chayacpica,

³ cancunata mandacpac churicunapuramanta ashtahuan alli yuyaiyuc, mandangapac alli cacta ricushpa, paipac taita mandashpa tiyanapi churanguichic. Chashna churashpa, cancunata mandacpac huasi ucupuramanta macanacunguic» nicurcami.

⁴ Chashna nicpi, paicunaca yallita mancharishpaca: «Ishcai jatun mandaccunapish macanacunata mana pudircachu. Shina cacpica, ¿ñucanchicca imatac macanacunata pudishunyari?» nirca.

⁵ Chaimantami mayordomopish, chai pueblota mandacpish, pushac yuyaccunapish, Acabpac churicunata yachachiccunapish Jehupacman cachashpaca: «Ñucanchicca canta serviccunami canchic. Chaimanta can imata mandashcatami ruhuashun. Pitapish jatun mandac cachunca mana churashunchu. Cambac ima alli cana cacpica ruhuailla» nichunmi cacharca.

⁶ Chashna cachacpi, Jehú cutinllatac shuc quillcashcata cachashpaca: «Ñucahuan cashpaca, ñuca mandashcata cazushpa, caya cai horasllatac, cancunata mandacpac churicunapac umacunata pitishpa, Jezreel puebloman ñucapacman shamuichic» nishpami cacharca. Jatun mandacpac canchis chunga churicunaca chai mandaccunahuan huiñashca cashcamantami chai pueblota mandaccunahuan carca.

⁷ Chai quillcata paicunapacman chayacpica, jatun mandacpac canchis chunga churicunatami umata pitircacuna. Chai umacunataca tazacunapi churashpami, Jezreel puebloman cacharca.

⁸ Chaimantami shuc huillac chayashpaca: —Jatun mandacpac churicunapac umacunataca ñami apamushca— nishpa huillarca. Shina nicpimi Jehuca: —Pueblo yaicunapi ishcai montonta ruhuashpa, cayacaman churaichic— nirca.

⁹ Cayandi tutamanta Jehú llucshishpa tucui gentecunataca: «Cancunaca mana ima faltayuc canguichicchu. Jatun mandactaca ñucami shuccunahuan yuyarinacushpa pacalla huañuchircani. Shina cacpipish, ¿pitac caicunataca huañuchirca?

¹⁰ Mandac Dios Acabpac huasi ucupurata tucuchishami nishcaca mana pambapi urmashca shina yanga canchu. Mandac Diosmi paita servic Eliasta huillachishcata pactachishca. Chaitaca yuyarinami canguichic» nirca.

¹¹ Chashnami Jehuca Jezreel pueblopi saquirishca Acabpac huasi ucupuracunata tucui huañuchirca. Shinallatac Jehuca Acab churashca tucui mandaccunatapish, paicunapac huasi ucupuracunatapish, Acabpac curacunatapish, shucllatapish mana saquishpami tucui huañuchirca.

¹² Chai quipaca Samaria puebloman ricushpami, michiccuna ovejata rutuna huasiman chayarca.

¹³ Chaipimi Judá llactata jatun mandac Ocoziaspac huauquicunahuan tuparca. Paicunataca: —Cancunaca, ¿pitac canguichic?— nirca. Shina nicpimi paicunaca: —Ñucanchicca Ocoziaspac huauquicunami canchic. Jatun mandacpac churicunata, jatun mandac Jezabelpac huahuacunata allillachu canguichic ningapacmi shamurcanchic— nirca.

¹⁴ Shina nicpimi paica: «¡Paicunataca causacta prezuichic!» nirca. Shina nicpimi, causacta prezushpa, michiccuna ovejata rutuna ladopi tiyac jundu ladopi chuscu chunga ishcai caricunata cungata pitishpa, shucllatapish mana saquishpa tucui huañuchirca.

¹⁵ Chaimanta rishpaca, Recabpac churi Jonadabhuanmi tuparca. Paihuan tupashpa allillachu cangui nishca quipaca: —¿Ñuca shungu canhuan cashca shinallatacchu cambac shungupish ñucahuan can?— nirca. Shina nicpi, Jonadabca: —Ari, ñucapish chashnallatacmi cani— nirca. Chaimantami Jehuca: —Shina cashpaca, ¡cambac maquita cui!— nirca. Shina nicpimi, Jonadabca maquita curca. Chashna maquita cucpi, paipac carretapi huichicuchishpa,

¹⁶ Jehuca: —Ñucahuan jacu. Ñucahuan rishpami Mandac Diosta ñuca ima shina yuyacushcata ricungui— nirca. Shina nishpami, Jonadabtaca paipac carretapi huichicuchirca.

¹⁷ Jehú Samaria puebloman chayashpaca, Mandac Dios Eliasman huillashca shinami, chai pueblopi saquirishca Acabpac huasi ucupuracunataca tucui huañuchirca.

Baal diosmanta huillaccunata Jehú huañuchishcamanta

¹⁸ Chai quipami Jehuca tucui gentecunata tandachishpa paicunataca: «Acabca Baal diostaca ashallatami servirca. Ashtahuanpish ñucaca yallitami servisha.

¹⁹ Baal diosmanmi animalta cushpa rupachigrini. Chaimanta cunanca, Baal diosmanta huillaccunatapish, paita serviccunatapish, paipac curacunatapish shucllatapish mana saquishpa, tucui tandachichic. Maijanpish mana shamushpaca huañungatacmi» nirca. Jehuca Baal diosta serviccunata huañuchishpa tucuchingapacmi chashnaca umarca.

²⁰ Shina shamucpimi Jehuca: «¡Baal diosta yuyaringapac shuc punzhata chicanyachichic!» nirca. Shina nicpimi, paicunaca tucui tandanacurca.

²¹ Jehuca tucui Israel llactatami cayachun cacharca. Shina cayacpimi, Baal diosta serviccunaca shucllapish mana saquirishpa tucui shamushpa, Baal diosta yuyarina huasipica shuc cuchumanta caishuc cuchucaman jundarca.

²² Chaipimi Jehuca churanata cuidac runataca: «Baal diosta tucui serviccuna churarichun, churanata llucchimuichic» nirca. Shina nicpimi, paicunaman churanacunata llucchimurca.

²³ Jehuca Recabpac churi Jonadabhuan Baal diospac huasiman yaicushpami, Baal diosta serviccunataca: «Caipi cancunapurapi Mandac Diosta serviccuna pacta tiyanman, alli ricuichic. Caipica Baal diosta serviccunallami cana can» nirca.

²⁴ Paicuna animalta cushpa huañuchingapac, tucui rupachingapac yaicucpica, pusac chunga soldadotami Jehuca canzhapi cuidachun churarca. Paicunataca: «¡Cancunapac maquipi churashca cai runacunata maijan cancuna richun saquishpaca, cancunami paicunapac randi huañunguichic!» nirca.

²⁵ Baal diosman animalta cushpa rupachishca quipaca canzhapi cuidac soldadocunatapish, soldadocunata mandaccunatapish cayashpaca: «¡Yaicushpa tucui huañuchichic! Shucllatapish miticushpa richunca ama saquichicchu» nirca. Shina nicpimi, canzhapi cuidac soldadocunapish, soldadocunata mandaccunapish yaicushpa, espadahuan huañuchishpa canzhaman shitarca. Quipataca Baal diospaclla chicanyachishca ucumanpish yaicushpami,

²⁶ Baal diosta yuyarina ucumanta ruhuashcalla dioscunata llucchishpa rupachirca.

²⁷ Ruhuashcalla Baal diostapish rupachishpami, Baal diosta yuyarina huasitapish tigrachirca. Chashna ruhuashpami, chai pushtupica litrina huasicunata shayachirca. Chaica cunan punzhacamanmi chashnallatac can.

²⁸ Shinami Jehuca Israel llactapi Baal diosta tucuchirca.

²⁹ Tucui chashna ruhuashpapish Jehuca Nabatpac churi Jeroboam israelcunata ruhuachishca juchacunataca mana saquircachu. Chashnami Bet-el pueblopi, Dan pueblopi curimanta ruhuashca becicunata alli ninata mana saquirca.

³⁰ Chaimantami Mandac Diosca Jehutaca: «Chashna huañuchishpa ñuca ñaupapi tucuchishpaca allitami ruhuashcangui. Acabpac huasi ucupuracunataca ñuca shungupi yuyashca shinami ruhuashcangui. Chaimantami cambac huahua huahuacunaca chuscu miraicaman Israel llactata mandangapac tiyaringacuna» nirca.

³¹ Ashtahuanpish Jehuca israelcunata Mandac Dios mandashcataca mana tucui shunguhuan cazurcachu. Israelcunata Jeroboam ruhuachishca juchacunatapish mana saquircachu.

³² Chai punzhacunami Mandac Dios Israel llactataca tucuchi callarirca. Chaimantami Siria llactata jatun mandac Hazaelca paipac llacta ladolla tucui llactacunahuan macanacushpa misharca.

³³ Chashnami Jordán yacumanta inti llucshina ladomanca Galaad llactatapish, Gadpac, Rubenpac, Manasespac llactacunatapish quichurca. Arnón jatun yacu ladopi tiyac Aroer pueblomantaca Galaad llactata, Basán llactacamanmi quichurca.

³⁴ Jehupac shuctac ruhuashcacunapish, imacunallata ruhuashcacunapish, alli sinchi cashcacunapish israelcunata jatun mandaccuna imata ruhuashcata quillcashcapimi tiyacun.

³⁵ Jehú huañushpa, paipac taitacunahuan tandanacugricpica, Samaria pueblopimi enterrarca. Paipac randica, paipac churi Joacazmi mandai callarirca.

³⁶ Jehuca ishcai chunga pusac huatatami israelcunata Samaria pueblopi mandarca.