2 PEDRO 1 - Dios Rimashcata Quillcashcami

Criccunaman Pedro quillcashcamanta

¹ Ñucaca Jesús acllashca apóstol, shinallatac Jesucristopacta ruhuac Simón Pedromi cani. Ñucanchic Dios Quishpichic Jesucristo cashcata ruhuac cashcamanta, ñucanchic shinallatac sumaimana crishcata chasquiccunamanmi, “allillachu canguichic” nishpa quillcashpa cachani.

² Diostapish, ñucanchic Apunchic Jesucristotapish allita ricsishcamantaca, sumaimana cuyaitapish sumac causaitapish yallita chasquishca cachunmi munani.

Allita ruhuachun Dios cayashcamanta

³ Diosca Jesucristota ricsichishpami, paipac poderhuan ñucanchic paita allita yuyariccuna cachun, tucui ima illashcatapish ñucanchicman cushca. Cristoca pai cashcata ruhuac cashcata, sumaimana cashcata ricuchingapacmi cayarca.

⁴ Chashna cayashpami, pai cusha nishca mai valishca allicunataca cushca. Cancuna cai pacha millaicunata ruhuashpa, llaquiman rigricushcamanta anchurishpa pai shina tucuchunmi, chashna cushca.

⁵ Chaimanta cancuna crishcamantaca, allita ruhuanata munaichic. Ña allita ruhuashpaca, allita entendinata munaichic.

⁶ Ña allita entendishpaca, quiquinllatac jarcaric canata munaichic. Quiquinllatac jarcaric cashpaca, mana shaicushpa catinata yuyaichic. Mana shaicushpa caticcuna cashpaca, Diosta allita yuyariccuna canata munaichic.

⁷ Ña Diosta allita yuyariccuna cashpaca, criccunapura allita ruhuaccuna caichic. Ña criccunapura allita ruhuaccuna cashpaca, tucuita cuyaccuna canata munaichic.

⁸ Cancuna tucui caicunata charishpa, punzhanta ruhuashpa causacpica, cancunapac causaipish grano pucuc shinami alli canga, shinallatac Apunchic Jesusta crishcapish mana yangachu canga.

⁹ Ashtahuanpish caicunata mana charicca caruta ñahui mana ricuc shinami, ñaupa pai ruhuashca juchacunamanta chuyayachishcatapish cungarishca.

¹⁰ Chaimanta cuyashca criccuna, cancunata Dios acllashpa cayashcamantaca, caicunata ashtahuan yuyaipi charishpa causanata munaichic. Chashna causashpami, jaicapi mana urmanguichic.

¹¹ Chashna cacpimi ñucanchicta Mandac Quishpichic Apunchic Jesucristoca, pai huiñaita mandacucman cancunataca imamanta mana jarcarishpa yaicuchun saquingalla.

¹² Chaimanta tucui caicunata cancuna yachacpipish, cashcata nic yachachishcata allita caticucpipish, punzhantami yuyachicushalla.

¹³ Ñuca causashcacamanca caicunata nina alli cacpimi, cancunata yuyachishpa rimacushalla.

¹⁴ Ñucanchic Apunchic Jesucristoca ñuca cai pachata saquishpa, utca huañuna cashcatami yachachirca.

¹⁵ Chaimanta ñuca huañushca quipapish, caicunata cancuna yuyarichunmi, ima shinapish utca huillashpa saquina cani.

Cristo sumaimana ricurishcamanta

¹⁶ Poderta charic Apunchic Jesús cutimunamanta ñucanchic yachachishcaca, mana ñucanchic yuyaillamanta yanga rimaicunallachu, ashtahuanpish ñucanchic quiquin ñahuihuantacmi, Apunchic Jesús tucuimanta yalli sumaimana cashcataca ricurcanchic.

¹⁷ Dios paipac Churita jatunyachishpa, sumaimanata ruhuactami ricurcanchic. Diosca sumac achic nicucmantami: «Caimi ñuca cuyashca Churica. Paillami ñucataca cushichin» nirca.

¹⁸ Chai rimashca jahua pachamanta uyarishcataca, Apunchic Jesus-huan Diospaclla cac urcupi cashpami, ñucanchicllatac uyarcanchic.

¹⁹ Chaita urcupi ricushcaca, Diosmanta ñaupa huillaccuna huillashca chashnatac cashcatami ricuchin. Chai huillaica tuta punzhayangacaman amsata achicyachic lámpara shina, shinallatac tutamanta achicyachic lucero llucshic shinami, cancunapac shungutaca achicyachicun. Chai huillaita cancuna alli uyashpaca, allimi ruhuanguichic.

²⁰ Shina cacpipish tucuimanta yallica, Diosmanta ñaupa huillaccuna quillcashpa huillachishcacunataca, Dios mana yuyaita cucpica, pipish “cashnami, chashnami” mana ni pudinchu.

²¹ Diosmanta ñaupa huillaccunaca jaicapi quiquin yuyashca shinaca mana huillarcacunachu, ashtahuanpish Diospaclla cashcamantami Diospac Espiritullatac paicunata yuyaita cucpi rimarcacuna.