2 CRÓNICAS 8 - Dios Rimashcata Quillcashcami

Salomón shuctac ruhuanacunatapish ruhuashcamanta

¹ Ishcai chunga huatapimi Salomonca Mandac Diospac huasitapish, mandashpa tiyana huasitapish ruhuanata tucuchirca.

² Chai quipami Hiram cushca pueblocunata allichirca. Shina allichishpami, israelcunataca chaipi causachun churarca.

³ Chai quipami, Salomonca Soba llacta Hamat puebloman rishpa, chai pueblotapish japirca.

⁴ Shinallatac shitashca pambapi tiyac Tadmor pueblotapish allichircami. Chashnallatac imatapish huacaichingapac pai ruhuachishca Hamat pueblo ladopi caishuc pueblocunatapish allichircami.

⁵ Chai quipaca jahuaman cac, uraman cac Bet-horón pueblocunatapish allichircami. Chai pueblocunaca muyunditami jatun pircacunahuan jarcashca, pungucunapi llavecuna churashca carca.

⁶ Baalat pueblotapish, imata Salomón charishcacunata huacaichina tucui pueblocunatapish, macanacuna carretacunatapish, caballocunata charina tucui pueblocunatapish allichircami. Salomonca Jerusalenpi, Líbano llactapi, pai mandacushca tucui llactacunapica pai munashcatami ruhuarca.

⁷ Chaicunataca heteocunamanta, amorreocunamanta, ferezeocunamanta, heveocunamanta, jebuseocunamanta saquirishca gentecunahuanmi ruhuachirca. Chai gentecunaca mana israelcunami carca.

⁸ Paicunaca israelcuna mana huañuchishca, chai llactapi saquirishca gentecunapac huahua huahuacunami carca. Paicunamantami Salomonca cunan punzhacaman impuestota japishpa catin.

⁹ Ashtahuanpish Salomonca israelcunataca chaita ruhuashpa servichunca mana churarcachu. Paicunataca alli macanacuc soldadocunapish, paita serviccunapish, soldadocunata mandaccunapish, carretapi puric soldadocunata mandaccunatapish, caballopi ric soldadocunatapish mandachunmi churarca.

¹⁰ Salomonca ishcai patsac pichca chunga ashtahuan alli mandaccunatami charirca. Paicunami chaipi imata ruhuac gentecunataca mandaccuna carca.

¹¹ Salomonca Faraonpac ushitaca Davidpac pueblomantami pai ruhuashca huasipi causachun pusharca. Paica: «Ñuca huarmica israelcunata jatun mandac Davidpac huasipica mana causangachu. Mandac Diospac Arcata churashca ucucunaca jucha illac cashcamantami chaipica mana causanga» nirca.

¹² Chaimantami Salomonca Mandac Diosman pai ruhuashca altar jahuapi, animalcunata cushpa tucui rupachirca. Chai altarca Diospac huasiman yaicuna pungu ñaupapimi carca.

¹³ Moisés mandashca shinami imata cuna cashpapish, chai punzha cuchunmi chashna ruhuarca. Samana punzhacunapi, llullu quilla punzhacunapi, jatun fiesta punzhacunapimi huatapi quimsa cutin rupachina carca. Cai fiestacunaca levadura illac tandata micuna punzhacuna, semana fiestacuna, chucllacunata ruhuana fiesta punzhacunami carca.

¹⁴ Chashnallatac curacunataca paipac taita David mandashca shinallatacmi imata ruhuana cashcapi churarca. Levitacunatapish paicuna imata ruhuana cashcata ruhuashpa Diosta alabachun, shinallatac curacunata ayudachunmi churarca. Shinallatac Diospac huasi pungupi cuidaccunatapish tucui pungucunapimi chullayanacushpa cuidachun churarca. Mandac Diosta servic Davidmi chashna mandarca.

¹⁵ Curacunapish, levitacunapish jatun mandac David imata ruhuachun mandashcamantaca mana anchurircachu. Ima alli ruhuashcacunata allichinatapish, imata ruhuanatapish allimi ruhuarcacuna.

¹⁶ Salomonca pai imata ruhuana cashcataca Mandac Diospac huasi cementota callari punzhamanta tucui shayachishpa tucuchingacamanmi tucui allichirca. Chashnami Mandac Diospac huasica tucui tucuchishca carca.

¹⁷ Chai quipami Salomonca Edom llacta Ezión-geber puebloman, Elot puebloman rirca. Chai pueblocunaca mama cucha ladopimi carca.

¹⁸ Hiramca paita serviccunahuanmi paipac jatun barcocunata, mama cuchapi barcohuan rinata alli yachac runacunata Salomonpacmanca cacharca. Paicunami Salomonta serviccunahuan Ofir llactaman rishpa, chuscu patsac pichca chunga talento curita jatun mandac Salomonman apamurca.