2 CRÓNICAS 7 - Dios Rimashcata Quillcashcami

¹ Salomón chashna mañacpica, jahua pachamanta nina shamushpami Diosman cushpa huañuchishca animalcunapac aichataca tucui rupachirca. Diospac huasipica Mandac Diospac sumaimana achicmi jundarca.

² Chaimantami curacunaca Mandac Diospac huasimanca mana yaicui pudirca.

³ Nina japiricucpish, Mandac Diospac sumaimana achicpish chai huasi jahuaman shamucta tucui israelcuna ricushpami, rumi pambapi cungurishpa, pambacaman cumurishpa, Mandac Diostaca: «Diosca allimari, paica huiñai huiñaitami llaquin» nircacuna.

⁴ Chai quipami jatun mandacpish, paihuan cac tucui israelcunapish Mandac Diospac ñaupapi animalcunata cushpa huañuchirca.

⁵ Jatun mandacca ishcai chunga ishcai huaranga huagracunata, patsac ishcai chunga huaranga ovejacunatami Diosman cushpa huañuchirca. Chashnami jatun mandacpish, tucui israelcunapish Mandac Diospac huasitaca Diosllamantac cushpa mingarcacuna.

⁶ Curacunaca paicuna imatac ruhuanallapitacmi carcacuna. Levitacunapish, Mandac Diosta pagui ningapac jatun mandac David ruhuashca tocanacunapimi tocarcacuna. David allichishca cantota cantashpaca: «Diosca allimari, pai llaquishcaca huiñai huiñaipacmi» nishpami cantarcacuna. Curacunaca levitacunapac chimbapurapimi trompetacunapi tocarcacuna. Israelcunaca tucuimi shayacurcacuna.

⁷ Salomonca Mandac Diospac huasi ñaupapi cac chaupi pambatami Diospaclla cachun ruhuarca. Diosman cushpa tucui rupachina animalcunatapish, Dios-huan alli tucungapac cushca animalcunapac huiratapish, chaipimi rupachirca. Salomón ruhuashca bronce altarpi tucui rupachina animalcunata, animalcunapac huirata, Diosman cushca ofrendatapish rupachingapac mana pactacpimi, chaipi rupachirca.

⁸ Salomonca canchis punzhatami fiestata ruhuarca. Paihuanca Hamat puebloman yaicuna ladomantaca Egipto jatun yacu ladocamanmi achca israelcuna tandanacurca.

⁹ Diospac huasipi tiyac altarta Diosman mingashpa, canchis punzhata tandanacushcamanta, shinallatac canchis punzhallatatac fiestata ruhuashcamantami pusac punzhapica jatun tandanacuita ruhuarca.

¹⁰ Canchis quilla ishcai chunga quimsa punzhapimi jatun mandacca tucui gentecunata paicunapac huasicunaman cacharca. Mandac Diosca Davidmanpish, Salomonmanpish, Diosllatac acllashca israelcunamanpish allicunata ruhuashcamantami tucui shunguhuan cushicushpa rircacuna.

Mandac Dios Salomonhuan ari nishcamanta

¹¹ Salomonca Mandac Diospac huasitapish, pai mandashpa tiyana huasitapish tucuchircami. Mandac Diospac huasipi pai mandashpa tiyana huasipipish tucui ima ruhuanata yuyarishcaca Salomonmanca tucuimi alli carca.

¹² Chai quipami Mandac Dios Salomonman tuta ricurishpaca: «Can mañashcataca uyarcanimi. Cai huasitaca animalcunata ñucaman cushpa huañuchina huasi cachunmi acllarcani.

¹³ Ñucaca ama tamyachunmi jahua pachata huichcasha. Chagracunata tucuchichunmi langostacunata cachasha, mana cashpaca ñuca acllashcacunapacmanmi ungüicunata cachasha.

¹⁴ Shina cachacpi, ñuca acllashcacuna yallita llaquirishpa ñucata mañacpi, ñucata mashcacpi, mana allita ruhuacushcata saquishpa, ñucapacman cutirimucpica, ñucapish jahua pachamanta uyashami. Paicunapac juchatapish perdonashami, paicunapac allpatapish allichishami.

¹⁵ Cunanca cai huasipi mañashcataca ricurashami, shinallatac uyarashami.

¹⁶ Cai huasitaca huiñaita ñuca shuti chaipi causachunmi ñucapaclla cachun acllani. Cai huasimantaca manatac anchurishachu.

¹⁷ Cambac taita David shina ñuca ñaupapi allita ruhuashpa, ñuca mandashcacunata, pactachichun ñuca yachachishcata cazushpa causacpica,

¹⁸ ñuca cambac taita Davidhuan ari nishca shinallatacmi can mandanataca mana pi cuyuchipacta ruhuasha. Paimanca: “Cambac huahua huahuapuramantaca Israel llactata mandacca mana illangachu” nircanimi.

¹⁹ Ashtahuanpish ñuca mandashcacunata, ñuca yachachishcacunata saquishpa, huashaiman cutirishpa, shuc dioscunata servishpa alli nishpa causacpica,

²⁰ ñucami cancunaman cushca llactamanta llucchishpa cachasha. Shinallatac ñuca shutipi mañana ñucapaclla cachun chicanyachishca cai huasitapish ñuca ñaupamanta anchuchishami. Shina ruhuacpimi, tucui llactapi causaccuna parlanacushpa burlashpa asingacuna.

²¹ Cai sumaimana huasi urmashcata ricushpaca, pipish caita pasaccunaca mancharishpami: “Mandac Diosca, ¿ima nishpatac cai llactatapish, cai huasitapish chashna ruhuanyari?” ninga.

²² Shina nicpimi shuccunaca: “Paicunata Egiptomanta llucchimuc Mandac Diosta saquishpami, shuctac dioscunata alli nishpa, servircacuna. Chaimantami Mandac Diosca cai tucui llaquita cachashpa, paicunata llaquichirca” ningacuna» nirca.