2 CRÓNICAS 5 - Dios Rimashcata Quillcashcami

¹ Chashnami Salomonca Mandac Diospac huasipi tucui ima tiyanacunata ruhuachirca. Chai quipaca paipac taita David Diosman cushpa chicanyachishca ofrendata, curita tucui ima chariccunatami Diospac huasipi chai yalli valishcacunata huacaichina ucupi churarca.

Diospac Arcata Salomón Diospac huasiman apashcamanta

² Salomonca tucui israelcunata pushac yuyaccunata, aillucunata tucui mandaccunata, familiacunata mandaccunatami Arcata Davidpac Sión puebloman apangapac Jerusalenpi tandachirca.

³ Jatun mandac Salomonhuanca chai huata canchis quillapimi jatun fiestata ruhuana punzhapi tucui israelcuna tandanacurca.

⁴ Israelcunata pushac yuyaccuna tucui shamucpimi, levitacunaca chai Arcata japircacuna.

⁵ Chai Arcataca curacuna shinallatac levitacunami Dios-huan tupana huasindi, chaipi tucui imalla tiyashcacunandi Diospacta ruhuangapac aparcacuna.

⁶ Shina apashpaca jatun mandac Salomonpish, paihuan tandanacushca tucui israelcunapish, chai Arca ñaupapimi ovejacunata, huagracunata Diosman cushpa huañuchirca. Chai huañuchishca animalcuna achca cacpimi, maita mana yupai pudircacuna.

⁷ Chai quipami curacunaca Mandac Dios ari nishca quillcata huacaichina Arcataca maipi churana cashca pushtuman aparcacuna. Shina apashpaca, Diospac huasiman yaicuchishpami Diospaclla chicanyachishca ucuman apashpa querubincunapac alas ucupi churarca.

⁸ Chai querubincunaca chai Arca jahuata alascunata churashpami Arcatapish, huanduna caspicunapish paicunapac alas-huan tapashca carca.

⁹ Chai huanduna caspicunaca largo cashcamantami Diospaclla ucumantaca ricunalla carca. Canzhamantaca mana ricunallachu carca. Chaica cunan punzhacamanmi chashnallatac tiyacun.

¹⁰ Chai Arcapica Horeb urcupi Moisés churashca ishcai tabla rumicunallami carca. Chaica, Egiptomanta llucshimucpi, Mandac Dios Israelcunahuan ari nishcata quillcashcami carca.

¹¹ Curacunaca Diospac huasimanta llucshircami. Servingapac turnota manarac charishpapish, tucui curacunami Diospaclla tucushpa allichirirca.

¹² Shinallatac cantac levitacuna, Asaf, Hemán, Jedutún runacunaca paicunapac churicunahuan, familiacunahuanmi altar ñaupapi inti llucshina ladoman alli lino churanacunata churarishca platillocunahuan, salteriocunahuan arpacunahuan shayacurca. Paicunahuanca patsac ishcai chunga curacunami trompetacunapi tocashpa shayacurca.

¹³ Trompetacunapi tocashca uyaricpica, tucuimi Mandac Diosta alli nishpa, pagui nishpa shuclla shina cantarcacuna. Trompetacunahuan, platillocunahuan shuctac tocanacunahuan tocacpi, sinchita cantashpami, Mandac Diostaca: «Paica allimari, pai llaquishcaca huiñai huiñaipacmi» nishpa cantarca. Shina cantacpimi, Mandac Diospac huasipica puyu jundarca.

¹⁴ Puyu jundashca cacpimi, curacunaca Mandac Diospacta ruhuashpa, catinataca mana pudircacuna. Diospac huasipica Mandac Diospac sumaimana achicmi jundarca.