2 CRÓNICAS 4 - Dios Rimashcata Quillcashcami

Diospac huasipi imalla charinata ruhuashcamanta

¹ Chashnallatac shuc bronce altartapish ruhuarcami. Chai altarca largomanpish, anchomanpish iscun metromi carca. Altomanca chuscu metro chaupimi carca.

² Shinallatac yacuta churangapacca bronceta yacuyachishpami, mama cucha shuti jatun pailata muyundita ruhuarca. Chai pailaca shuc ladomanta caishuc ladocamanca chuscu metro chaupi, cutin altomanca ishcai metro, ishcai chunga pichca centimetromi carca. Paila shimi muyundica chunga quimsa metro chaupimi carca.

³ Chai mama cucha shuti paila muyunditaca cada chuscu chunga pichca centimetropimi, chunga huagracunata dibujashca carca. Chai huagracunataca chai pailallahuantacmi ishcai filata ruhuashca carca.

⁴ Chai bronce pailaca chunga ishcai huagracunapac jahuapimi tiyacurca. Chai huagracunamanta quimsaca jahua ladoman, quimsaca inti tigrana ladoman, quimsaca uraiman, caishuc quimsaca inti llucshic ladomanmi ricushpa carcacuna. Chai mama cucha shuti pailaca huagracunapac jahuapi tiyacucpimi umacunalla ricuricurca.

⁵ Chai pailaca canchis centímetro chaupi racumi carca. Paila shimi muyundica shuc cáliz vaso shina, mana cashpaca lirio sisa shimi shinami carca. Chai pailaca quimsa huaranga bato yacutami apac carca.

⁶ Shinallatac jahuangapac chunga uchilla pailacunatami ruhuarca. Chaimantaca Diospac huasi cuchupimi pichcataca jahua ladoman pichcata ura ladoman churarca. Chai yacupimi, Diosman cushpa, tucui rupachina animalcunapac aichataca jahuaccuna carca. Chashnallatac curacunami chaipi jahuariccuna carca.

⁷ Shinallatac curimantami chunga candelerocunata ruhuarca. Chaicunataca Diospac huasi ucupimi pichcataca jahua ladoman, pichcataca ura ladoman churarca.

⁸ Chunga mizacunatapish ruhuashpami, pichcataca jahua ladoman, pichcataca ura ladoman churarca. Curillamantatacmi patsac jatun tazoncunata ruhuarca.

⁹ Shinallatac curacunapac ucu pambatapish, tucuipac shayana jatun pambatapish punguhuanmi ruhuarca. Tucui chaicunatami broncehuan jahuata llutarca.

¹⁰ Chai jatun pailataca Diospac huasipimi inti llucshic ura ladoman churarca.

¹¹ Hiramca mangacunatapish, lamponcunatapish, shushungapac tazoncunatapish ruhuarcami. Chashnami Hiramca Mandac Diospac huasipi ima tiyanacunata tucui ruhuashpa, jatun mandac Salomonman curca.

¹² Chai ruhuashcacunaca ishcai pilar, chai jahuapi cac capitel nishcacuna, shinallatac muyundita churana ishcai filata rejillacunami carca. Chai rejillacunataca pilarcunapac jahuapi tiyac ishcai capitelta muyundi churangapacmi ruhuarca.

¹³ Chuscu patsac granadacunatapish ishcai rejillacunapacmi ruhuarca. Chai granadacunataca chai pilarcunapac umapi churashca capitelcunata muyundita tapangapacmi cada rejillapi ishcai filata ruhuashpa huarcurca.

¹⁴ Shinallatac carretacunatapish, chai carretacunapi cachun chunga pailacunatapish ruhuarcami.

¹⁵ Yacuta churangapac mama cucha shuti pailatapish, chai pailata charicuc chunga ishcai huagracunatapish,

¹⁶ mangacunatapish, lamponcunatapish, trinchicunatapish ruhuarcami. Hiram-abica alli broncemantami Mandac Diospac huasipi tucui ima tiyanacunataca jatun mandac Salomonman ruhuashpa curca.

¹⁷ Caicunataca Sucot pueblohuan, Seretan pueblohuan, chaupipi tiyac Jordán yacu lado quillu allpapimi jatun mandacca ruhuarca.

¹⁸ Salomonca chai tucui ruhuashcacuna achca cacpimi, mashna bronce yaicushcata mana pezai pudirca.

¹⁹ Salomonca Diospac huasipi tucui ima tiyanacunata ruhuachishpaca curi altartapish ruhuarcami. Shinallatac Diosman chicanyachishca tandata churana mizacunatapish ruhuarcami. Chai mizapimi Diosman cuna tandaca tiyacurca.

²⁰ Shinallatac candelerocunatapish, chaipi churana lamparacunatapish alli curimantami ruhuarca. Chaicunataca mandashcapi nishca shinallatac Diospaclla chicanyachishca ucu cuchupi mechata japichingapacmi ruhuarca.

²¹ Sisacunapish, lamparacunapish alli curimantami ruhuashca carca.

²² Shinallatac mechacunata pitinacunatapish, tazoncunatapish, cucharacunatapish, inciensota rupachinacunatapish alli curimantami ruhuarca. Diospaclla chicanyachishca ucuman yaicuna pungucunatapish, Diospac huasi ucuman yaicuna pungucunatapish, punta jatun pungutapish curillamantatacmi ruhuarca.