2 CRÓNICAS 33 - Dios Rimashcata Quillcashcami

Manasés Judá llactata mandashcamanta

¹ Manasesca chunga ishcai huatata charishpami, mandai callarirca. Paica pichca chunga pichca huatatami Jerusalenpi mandarca.

² Ashtahuanpish Mandac Diospac ñaupapica mana allita ruhuashpami, israelcunapac ñaupamanta Mandac Dios llucchishpa cachashca gentecuna shinallatac juchata ruhuashpa causarca.

³ Paipac taita Ezequías tigrachishca lomacunapi tiyac altarcunatapish cutin shayachishpami, Baal dioscunaman altarcunata ruhuarca. Asera huarmi diosta yuyarina yuratapish ruhuarcami. Jahuapi tucui ima tiyaccunatapish alli nishpami mañarca.

⁴ Mandac Diospac huasipipish altarcunatami shayachirca. Chai huasitami Mandac Diosca: «Jerusalenpimi ñuca shutica huiñaita canga» nishca carca.

⁵ Shinallatac Mandac Diospac huasipica ishcai pungu pambapitacmi jahua pachapi cac tucui imapish tiyaccunaman altarcunata ruhuarca.

⁶ Manasesca paipac churicunata dioscunaman cushpami, Hinom pambapi rupachirca. Lucerota ricushpa yachacpish, adivinopish, brujopish, brujocunaman, espiritucunaman tapucpish tucurcami. Mandac Diospac ñaupapica millanayai juchata ruhuashpami, yallita piñachirca.

⁷ Ruhuashcalla diostapish Diospac huasipimi churarca. Chai huasimantami Davidtapish, paipac churi Salomontapish Mandac Diosca: «Cai huasita, shinallatac Jerusalentami tucui Israel aillupuramanta acllarcani. Cai huasipimi ñuca shutica huiñaita causachun churasha.

⁸ Tucui ñuca mandashcacunata, mandashpa quillcashcacunata, Moisesman mandashca shinallatac pactachishpa causaichic. Shina causacpica, israelcunataca cancunapac ñaupa taitacunaman cushca allpamantaca manatac llucchishpa cachashachu» nishcami carca.

⁹ Ashtahuanpish Manasesca Judá llactapi, Jerusalenpi causaccunataca israelcunapac ñaupamanta Mandac Dios tucuchishpa cachashca gentecunatapish yalli ashtahuan mana allita ruhuachishpami yallita pandachirca.

¹⁰ Mandac Diosca Manasestapish, pai acllashca israelcunatapish rimarcami, ashtahuanpish paicunaca mana cazurcacunachu.

¹¹ Chaimantami Mandac Diosca paicunata llaquichichunca, Asiria llactata jatun mandacpac soldadocunata apamurca. Paicunami Manasestaca cadenacunahuan huatashpa, Babiloniaman prezu aparca.

¹² Ashtahuanpish chai llaquita apacushpami, Manasesca paipac ñaupa taitacunapac Mandac Diospac ñaupapica tucui shunguhuan llaquirishpa mañarca.

¹³ Chashna mañacpica, pai mañashcata uyashpami, Mandac Diosca Judá llactata paillatac mandashpa catichun, cutin Jerusalenman cutichimurca. Shina ruhuacpimi, Manasesca Mandac Diosllatac Dios cashcata yachac chayarca.

¹⁴ Chai quipami Manasesca Davidpac pueblo muyundi jatun pircata ruhuarca. Chai pircataca inti tigrana ladoman tiyac Guihón pugru pambamanta callarishpaca, challua yaicuna pungucamanmi ruhuarca. Chai quipami Ofel pueblo muyunditapish ashtahuan jatun pircata ruhuarca. Shinallatac Judá llactapica ashtahuan jatun pircacunahuan ruhuashca pueblocunapimi soldadocunata mandaccunata churarca.

¹⁵ Shinallatac Mandac Diospac huasimantaca shuctac llacta dioscunatapish, paillatac ruhuashca dioscunatapish anchuchircami. Mandac Diospac huasi lomapi ruhuashca tucui altarcunatapish, Jerusalenpi ruhuashca altarcunatapish llucchishpami canzhaman shitarca.

¹⁶ Chai quipaca Mandac Diospac altarta cutin allichishpami, Dios-huan alli tucungapac animalcunata huañuchishpa, chai altarpi rupachirca. Shinallatac Judá llactapi causaccunataca israelcunata Mandac Diosta servichunmi mandarca.

¹⁷ Ashtahuanpish gentecunaca paicunata Mandac Diosman animalcunata cushpapish lomacunapi tiyac altarcunallapitacmi rupachiccuna carca.

¹⁸ Manasés tucui imata ruhuashcacunapish, Mandac Diosta pai mañashcapish, Dios ricuchishcata huillaccuna israelcunata Mandac Diospac shutipi rimashcapish, Israel llactata jatun mandaccuna imata ruhuashcacunata quillcashcapimi tiyacun.

¹⁹ Mandac Diosta mañacpi, Dios uyashcapish, tucui juchacunata ruhuashcapish, mana cazushcapish, mana allita ruhuashcamanta manarac llaquirishpa maipi altarcunata ruhuashca pushtucunamantapish, Asera huarmi diosta yuyarina yurata shayachishcapish, yanga dioscunata ruhuashcapish, Dios ricuchishcata huillaccuna quillcashcapimi tiyacun.

²⁰ Manasés huañushpa, paipac ñaupa taitacunahuan tandanacugricpica, mandana huasi ladopimi enterrarca. Paipac randica paipac churi Amonmi mandai callarirca.

Amón Judá llactata mandashcamanta

²¹ Amonca ishcai chunga ishcai huatata charishpami mandai callarirca. Paica ishcai huatatami Jerusalenpi mandarca.

²² Paipish Mandac Diospac ñaupapica paipac taita Manasés shinallatacmi mana allita ruhuashpa causarca. Paipac taita Manasés ruhuachishca tucui chai yanga dioscunaman animalcunata cushpa huañuchishpami alli nishpa causarca.

²³ Chashna causashpapish, Mandac Diospac ñaupapi paipac taita Manasés llaquirishca shinaca manatac llaquirircachu. Ashtahuanpish juchallatami yallita ruhuashpa catirca.

²⁴ Paitaca, paita serviccunallatacmi pacalla japishpa, paipac huasillapitac huañuchirca.

²⁵ Ashtahuanpish jatun mandac Amonta huañuchiccunataca chai llactapi causaccunami tucuita huañuchirca. Chai llactapi causaccunaca Amonpac churi Josiastami paipac randi, jatun mandac cachun churarcacuna.