2 CRÓNICAS 32 - Dios Rimashcata Quillcashcami

Jatun mandac Senaquerib Judá llactaman yaicushcamanta

¹ Diosta cazushpa tucui caicunata Ezequías allita ruhuashca quipaca, asiriocunata jatun mandac Senaqueribmi Judá llactata japingapac jatun pircahuan ruhuashca pueblocuna muyundita carpacunata shayachishpa soldadocunata churarca.

² Senaqueribca Jerusalenpi causaccunahuan macanacungapac shamushcatami Ezequiasca yacharca.

³ Chaimantami pai churashca mandaccunahuan, alli sinchi macanacuc soldadocunahuan pueblomanta canzhaman tiyac yacucunata allpahuan tapanata yuyarirca. Shina nicpimi, paicunaca allimi nircacuna.

⁴ Chaimantami achca gentecuna tandanacushpa yacu junducunatapish chai llacta chaupita ric yacutapish tapashpaca: «Asiria llactata jatun mandaccunaca, ¿imatac achca yacutaca taringayari?» nishpami tucui taparca.

⁵ Chai quipami Ezequiasca ashtahuan sinchiyashpa, chai pueblo muyundi jatun pirca urmashcacunataca cutin shayachishpa chai jahuapica torrecunata shayachirca. Cai pirca canzha ladomanca shuctac jatun pircatami ruhuarca. Davidpac pueblopi tiyac Milopipish ashtahuan sinchi pircatami ruhuarca. Shinallatac achca espadacunatapish, escudocunatapish ruhuachircami.

⁶ Chai quipaca soldadocunata mandaccunata soldadocunapac ñaupapi churashpami, Jerusalén pueblo pungu plazapi tandanacuchun mandarca. Chaipimi paicunapac shunguman chayacta rimashpaca:

⁷ «Sinchi tucushpa cari cari caichic. Imatapish mana manchanachu canguichic. Asiria llactata jatun mandactapish, paihuan shamuc achca soldadocunatapish mana manchanachu canguichic. Ñucanchic-huan cacca paicunahuan cacta atishpa, imatapish ashtahuan ruhuai pudinmi.

⁸ Chai jatun mandacca runacunapac poderllahuanmi. Ashtahuanpish ñucanchicta macanacuipi ayudangapacca ñucanchicta Mandac Diosmi ñucanchic-huan» nirca. Judá llactata jatun mandac shina nicpica, mana manchashpami, tucui mashna sinchi tucurcacuna.

⁹ Asiria llactata jatun mandac Senaqueribca Laquis pueblopi paipac tucui soldadocunahuan cashpami, paita serviccunata Jerusalenpi causac Judá llactata jatun mandac Ezequiaspacmanpish, Judá llactamanta Jerusalenpi causaccunapacmanpish cachashpaca:

¹⁰ «Cancunaca, ¿imapi yuyaita churashpatac Jerusalenta soldadocunahuan ñuca muyushpa shayacucpipish mana llucshisha ninguichic?

¹¹ Ezequiasca cancunataca: “Ñucanchicta Mandac Diosmi Asiria llactata jatun mandacpac maquimanta cacharichinga” nicunmi. Chashna nishpaca, cancuna yarcaihuan, yacunayaihuan huañuchunllami chashna nicun.

¹² ¿Manachu Ezequiasllatac Diosman ruhuashca, lomapi tiyac huasicunatapish, altarcunatapish anchuchirca? ¿Manachu chashna anchuchishpaca, Judá llactapi, Jerusalenpi causaccunataca cai altarllapimi Diosta mañana canguichic, inciensotapish rupachina canguichic nishpa mandarca?

¹³ ¿Manachu shuctac llactapi causaccunata ñuca ñaupa taitacuna ima ruhuashcacunataca yachanguichic? Chai llactapi causaccunapac dioscunaca paicunapac llactata, ñuca maquimanta cacharichinataca mana pudircacunachu.

¹⁴ Ñuca ñaupa taitacuna tucuchishca llactacunapac dioscunapuramantaca, ¿maijan Diostac paipac gentecunataca ñuca maquimanta cacharichic pudirca? Cunanpish cancunapac Diosca ñuca maquimantaca mana cacharichi pudingachu.

¹⁵ Cunanca, Ezequías cancunata llullashpa crichichunca, mana saquinachu canguichic. Chashna nishpa crichicucpipish, mana crinachu canguichic. Ñuca ñaupa taitacunapac maquimantapish, ñuca maquimantapish chai llactacunapac dioscunapish, mandaccunapac dioscunapish, maijan dios cashpapish paipac maquimantaca mana quishpichic pudircachu ¡Cancunapac Dioscarin maitatac ñuca maquimanta cacharichingayari!» nichunmi cacharca.

¹⁶ Chai serviccunaca Mandac Diostapish, paita servic Ezequiastapish cai shimicunatapish, shuctac shimicunatapish rimashpami llaquichirca.

¹⁷ Chaipac jahuapi Semaqueribca israelcunata Mandac Diosta yallita mana alli nishpami quillcacunata cacharca. Chai quillcacunapica: «Ima shinami shuctac llactapi causac gentecunapac dioscuna paicunapac gentecunata ñuca maquimanta mana cacharichi pudirca, shinallatacmi Ezequiaspac diospish, paipac gentecunata ñuca maquimanta mana cacharichi pudinga» nirca.

¹⁸ Senaquerib cachashca mandaccunaca yallita manchachingapacmi Jerusalén muyundita pircashca jahuapi tiyacuccunataca Hebreo rimaipi sinchita caparishpa rimarcacuna. Shina caparishpaca, chai pueblota japina yuyaihuanmi chashna rimarca.

¹⁹ Chai mandaccunaca Jerusalenpi causaccunapac Diostaca shuctac llactapi causaccunapac dioscunata shinami rimarcacuna.

Mandac Dios Ezequiasta cacharichishcamanta

²⁰ Chaimantami jatun mandac Ezequiaspish, Amozpac churi Dios ima nishcata huillac Isaiaspish jahua pachapi causac Mandac Diosta caparishpa mañarca.

²¹ Shina mañacpimi, Mandac Diosca shuc angelta cachashpa Asiria llactata jatun mandacpac carpapi cac yallita sinchi imatapish mana manchac soldadocunatapish, mandaccunatapish, chai soldadocunata mandaccunatapish huañuchirca. Chaimantami chai jatun mandacca yallita pingai tucushpa, paipac llactaman cutishpa, paipac diospac huasiman yaicurca. Chai ucuman yaicucpimi, paipac churicunallatac espadahuan huañuchirca.

²² Shinami Mandac Diosca Ezequiastapish, Jerusalenpi causaccunatapish Asiria llactata jatun mandac Senaqueribpac maquimantapish, tucui soldadocunapac maquimantapish quishpichirca. Shinami tucui muyundi llactacunapi sumac causai tiyarca.

²³ Achca gentecunami Mandac Diosman cungapac ofrendata Jerusalenman apamuccuna carca. Shinallatac Judá llactata jatun mandac Ezequiasmanpish sumac convidanacunatami apamurcacuna. Chai quipaca Ezequiasca tucui shuctac llactacunapi causaccunapac ñaupapimi yallita jatunyachishca carca.

Ezequiaspac causai tucuri punzhacunamanta

²⁴ Chai huatacunapimi Ezequiastaca huañuchiclla ungüi japirca. Chaimantami Ezequiasca Mandac Diosta mañarca. Shina mañacpica, Mandac Dios uyashpami, shuc ricuchinata ricuchirca.

²⁵ Ashtahuanpish Ezequiasca allicunata paiman ruhuashcamantaca mana pagui nishpami, paipac shungupi jatun tucurca. Chaimantami Mandac Diosca paihuanpish, Judá llactapi causaccunahuanpish, Jerusalenpi causaccunahuanpish nina japiric shina piñarirca.

²⁶ Shina cashpapish, Ezequiasca paipac shungupi jatun tucushca cashpapish, tucui Jerusalenpi causaccunandimi llaquirishpa cumurirca. Chaimantami Mandac Diosca nina japiric shina piñarishca cashpapish, Ezequías causacuc punzhacunapica mana llaquichirca.

Ezequías huañushcamanta

²⁷ Ezequiasca yallita chayuc cashpapish, alli nishcapishmi carca. Paica achca curita, cullquita, sumac rumicunata, mishquilla ashnacucta, escudocunata, shuctac alaja charinacunatapish charircami.

²⁸ Shinallatac granocunata, vinota, aceiteta huacaichina huasicunatapish, tucuilaya animalcuna shayana huasicunatapish, oveja corralcunatapish charircami.

²⁹ Shinallatac tauca pueblocunatapish ruhuarcami. Huagracunatapish, achca manada ovejacunatapish charirca. Cai tucui allicunataca Mandac Diosmi curca.

³⁰ Ezequiasmi Gihonpi tucyacuc yacutaca jahuapi jarcashpa, inti tigrana tiyac Davidpac puebloman aparca. Shinami Ezequiasca imata ruhuashpapish allita ruhuarca.

³¹ Ashtahuanpish Judá llactapica ima jatun llaquicunata, jatun mancharinacunata ruhuashcata yachachunmi, Babilonia llactata mandaccunaca maijan tapuccunata cacharcacuna. Mandac Diosca Ezequías paipac shungupi ima shina yuyashcata yachangapacmi, chai tapuccuna shamucpica, paimanta anchurirca.

Ezequías huañushcamanta

³² Ezequías imata ruhuashcacunapish, shuccunata llaquic cashcapish, Dios ima nishcata huillac Isaías huillashpa quillcashcapimi tiyacun.

³³ Ezequías huañushpa paipac ñaupa taitacunahuan tandanacugricpica, Judá llactapi tucui causaccunapish, Jerusalenpi tucui causaccunapish paita alli nishpami, Davidpac huahua huahuacunata enterrana jutcumanta ashtahuan alli jutcupi enterrarca. Paipac randica paipac churi Manasesmi mandarca.