2 CRÓNICAS 30 - Dios Rimashcata Quillcashcami

Ezequías Pascua micuita ruhuashcamanta

¹ Chai quipami Ezequiasca tucui israelcunamanpish, Judá llactapi causaccunamanpish, Efrainpac, Manasespac aillucunamanpish israelcunata Mandac Diosta yuyarishpa, Pascua micuita ruhuangapac Jerusalenpi cac Mandac Diospac huasiman shamuchun quillcata cacharca.

² Jatun mandacca pai churashca mandaccunahuan, shinallatac Jerusalenpi tandanacushca tucui gentecunahuanmi ishcainiqui quillapi Pascua micuita ruhuangapac yuyarirca.

³ Curacunapish Diospaclla tucushpa manarac allichirishcamanta, gentecunapish mana utca Jerusalenpi tandanacushcamantami chai punzhapitac Pascua micuita ruhuanataca mana pudirca.

⁴ Chai shina ruhuangapac yuyarishcaca, jatun mandacmanpish, chaipi tandanacushca gentecunamanpish allimi carca.

⁵ Chaimantami Israel llactapi causaccunataca Pascua micuita ruhuashpa, Diosta yuyaringapac Jerusalenman shamuchun Beerseba pueblomantaca, Dan pueblocaman tucui israelcunata cayachun, cachanata yuyarircacuna. Mandashcapi quillcashca shinaca, ña unai huatacunata Pascua micuita mana ruhuashcamantami chaita yuyarirca.

⁶ Huillangapac riccunaca jatun mandacpac cartatapish, pai churashca mandaccunapac cartatapish apashpami, jatun mandac mandashca shinallatac tucui Israel llactaman, tucui Judá llactaman rircacuna. Chai quillcapica: «Asiria llactata jatun mandaccunapac maquimanta atishca israelcunalla, Abrahampac, Isaacpac, Jacobopac Mandac Diospacman cutirichic. Shina cutiricpica, paipish cancunapacman shamungami.

⁷ Ama cancunapac taitacuna, huauquicuna shina caichicchu. Paicunaca paicunapac ñaupa taitacunata Mandac Diosta mana cazushcamantami paicunataca cancuna ricushca shinallatac llaquinayaita tucuchirca.

⁸ Cunanca, ama cancunapac ñaupa taitacuna shina sinchi shungu tucuichicchu. Ashtahuanpish Mandac Diosta cazushpa, paipac huasiman shamuichic. Chai huasitaca Diosmi huiñaita paipaclla cachun chicanyachishca. Cancunata Mandac Diosta servichic. Shina servicpimi, nina japiric shina piñarishcamantaca cancunahuan alli tucunga.

⁹ Mandac Diospacman cancuna cutiricpica, cancunapac huauquicunata, cancunapac churicunataca prezu apashpa charicuc gentecunaca llaquingacunami. Chaimantami cai llactaman cutimungacuna. Cancunata Mandac Diosca yallita cuyac, yallita llaquic Diosmi. Cancuna paipacman cutiricpica, paica cancunataca cuidangami» nirca.

¹⁰ Huillangapac riccunaca Efraín, Manasés llactacunamantaca Zabulón llactacamanmi pueblo pueblo huillashpa rircacuna. Ashtahuanpish paicuna huillacpica, burlashpami asircacuna.

¹¹ Chashna cacpipish, Aserpac, Manasespac, Zabulonpac aillupuramanta maijancunallami llaquirishpa Jerusalenman rircacuna.

¹² Shinallatac Judá llactapi causaccunapish Dios paipac poderhuan yuyaita cushcamantami, Mandac Dios mandashca shinallatac jatun mandacpish, caishuc mandaccunapish mandashcata cazurcacuna.

¹³ Chaimantami quipa quillapica levadura illac tandata micuna fiesta punzhata yuyaringapac achca gentecuna Jerusalenpi tandanacurca.

¹⁴ Paicunaca Jerusalenpi tiyac altarcunatapish, inciensota rupachina altarcunatapish anchuchishpami, Cedrón yacu huaicupi shitarcacuna.

¹⁵ Chai quipami Pascua punzhapi huañuchina ovejataca chai huata ishcai quilla chunga chuscu punzhapi huañuchirca. Curacunapish, levitacunapish yallita pingaihuami, Diospaclla tucurcacuna. Chai quipami Diosman cushpa, tucui rupachina animalcunatapish Diospac huasiman aparcacuna.

¹⁶ Chai quipaca Diosta servic Moisés mandashca shinallatacmi imata ruhuachun mandashca shina ruhuarcacuna. Curacunaca levitacuna cushca yahuarta japishpami chiraparcacuna.

¹⁷ Chai tandanacuipica achcami manarac Diospaclla tucushcacuna tiyarca. Chaimantami levitacunaca tucui chaicuna Diospaclla tucuchun, chai Pascua punzhapi achca animalcunata Diosman cushpa huañuchirca.

¹⁸ Efrainpac, Manasespac, Isacarpac, Zabulonpac aillucunamantaca achca gentecunami manarac mapamanta chuyayashcacuna tiyarca. Shina cashpapish, quillcashcapi nicushcata manarac pactachishpami, Pascua micuita micurca. Ashtahuanpish Ezequías paicunamanta Mandac Diosta mañashpaca: «Mandac Dioslla, canca allimari cangui. Canta servingapac allichirishca tucui gentecunata perdonai.

¹⁹ Paicunaca Cambac huasipi chuyayangapac imata mandashca shinallatac manarac chuyayashca cashpapish, paicunapac ñaupa taitacunapac Diosman cuchuyangapacmi allichirishcacuna» nirca.

²⁰ Ezequías mañashcata Mandac Dios uyashpaca gentecunata alliyachircami.

²¹ Shinami Jerusalenpi tandanacushca israelcunaca levadura illac tandata micuna punzhapica yallita cushicushpa, canchis punzhacaman jatun fiestata ruhuarca. Levitacunapish, curacunapish Mandac Diosman ruhuashca tocanacunapi tocashpami punzhanta Mandac Diosta alli nicurcacuna.

²² Ezequiasca Mandac Diosta servingapac tucui alli yuyaita charic levitacunatami paicunapac shungupi chayacta rimarca. Jatun fiesta punzhapi micungapac huañuchishca aichataca canchis punzhacamanmi micurcacuna. Dios-huan alli tucungapac animalcunata cushpa huañuchishca shinallatac paicunapac ñaupa taitacunata Mandac Diosta pagui nishpami micurcacuna.

²³ Chaipi cac tandanacushca gentecunaca yapachishpami cutin canchis punzhata fiestata ruhuanata yuyarircacuna. Shina yuyarishpami, canchis punzhata cushicurca.

²⁴ Chai micuita ruhuangapacca Judá llactata jatun mandac Ezequiasmi chaipi cac tandanacushca gentecunamanca huaranga huagrata, canchis huaranga ovejata curca. Shinallatac caishuc mandaccunapish huaranga huagrata, chunga huaranga ovejatami curcacuna. Shinallatac chai punzhapica achca curacunami Diospaclla tucushpa imatapish allichirca.

²⁵ Judá llactapi causac tucui tandanacushca gentecunapish, curacunapish, levitacunapish, Israel llactamanta achca shamushcacunapish, shinallatac shuctac llactamanta puringapac shamushpa Israel llactapi, Judá llactapi causangapac saquirishcacunapish yallitami cushicurca.

²⁶ Chashnami Jerusalenpica yallita cushicurcacuna. Israel llactata jatun mandac Davidpac churi Salomón mandacui punzhamanta pachami Jerusalenpica chashna fiestaca mana tiyarca.

²⁷ Chai quipaca curacunapish, levitacunapish jatarishpami, gentecunata bendiciarca. Paicuna ima nishcataca Diosca uyarcami. Shinallatac paicuna mañashcapish, Mandac Dios causacuc jahua pachacamanmi uyarirca.