2 CRÓNICAS 3 - Dios Rimashcata Quillcashcami

Salomón Diospac huasita shayachishcamanta

¹ Salomonca Jerusalenpi tiyac Moriah urcupimi Mandac Diospac huasita shayachi callarirca. Chai urcuca huasita shayachingapac David allichishca jebuseocunapuramanta Ornanpac trillana pambami carca. Chai pambapimi Mandac Diosca Davidman ricurirca.

² Salomonca ña chuscu huatatami mandacurca. Chai huata ishcai quilla ishcai punzhapimi chai huasitaca shayachi callarirca.

³ Mandac Diospac huasita shayachingapac Salomón medishcacunaca: Quingraimanca ishcai chunga canchis metro, anchomanca iscun metromi carca.

⁴ Diospac huasi ñaupapi cac corredorca chai huasi ancho shinallatacmi quingraimanca iscun metro carca. Altomanca pichca chunga chuscu metromi carca. Chai huasi ucu pircacunataca alli curihuanmi jahuata llutarca.

⁵ Diospac huasi ucutaca ciprés tablacunahuanmi catarca. Chai tablacunataca alli curihuanmi jahuata llutarca. Chai jahuataca palmera quirucunata, cadenacunatami ruhuarca.

⁶ Shinallatac chai huasi ucutaca sumac rumicunahuan llutashpami alajata ruhuarca. Curica Parvaim llactamantami carca.

⁷ Chashnami Diospac huasi tucui ucutaca vigacunatapish, umbralcunatapish, pircacunatapish, pungucunatapish, curihuan jahuata llutarca. Chai pircacunapica querubincunatami ruhuarca.

⁸ Diospaclla chicanyachishca ucutapish ruhuarcami. Chai ucuca Diospac huasi corredor shinallatacmi quingraimanpish, anchomanpish iscun metro carca. Quipaca sucta patsac talento alli curihuanmi jahuata llutarca.

⁹ Curi clavocunaca cada shucmi pichca chunga siclosta pezarca. Shinallatac jahua alto ucucunatapish curihuanmi jahuata llutarca.

¹⁰ Diospaclla chicanyachishca ucupipish, ishcai querubincunatami caspimanta ruhuarca. Chaicunatapish curihuanmi jahuata llutarca.

¹¹ Chai querubincunapac alascunaca quingraimanca iscun metromi carca. Shuc alasca ishcai metro ishcai chunga pichca centimetromi carca. Chai alasca ucu pirca quingraipi tuparishcami carca. Caishuc alaspish, ishcai metro ishcai chunga pichca centimetromi carca. Chai alasca caishuc querubinpac alas puntahuanmi tupashca carca.

¹² Shinallatac caishuc querubinpac shuc alaspish ishcai metro ishcai chunga pichca centimetromi carca. Chai alaspish ucu pirca quingraipi tuparishcami carca. Caishuc alaspish chaillatatacmi medirca. Chai alasca caishuc querubinpac alas puntahuan tupashcami carca.

¹³ Querubincunaca paicunapac alascunataca iscun metrotami chutashca carca. Chai querubincunaca Diospac ucu ladota ricushpami shayacurca.

¹⁴ Shinallatac cortinacunataca azul, morado, yana puca, lino telahuanmi ruhuarca. Chai telacunapipish querubincunatami bordarca.

Ishcai pilarcunata ruhuashcamanta

¹⁵ Diospac huasi ñaupapi churangapacca, chunga pichca metro canchis chunga pichca centimetrota charic ishcai jatun pilarcunatami ruhuarca. Chai pilarcunapac umapi churashca capitelcunaca ishcai metro ishcai chunga centimetromi carca.

¹⁶ Shinallatac cadenacunata ruhuashpami, Diospac huasi pilarcunapac umapi cac capitelcunapi muyuchishpa churarca. Shinallatac patsac uchilla cadenacunata ruhuashpami, chai pilar jahuapi cac capitelcunapi muyundita ruhuarca.

¹⁷ Jatun pilarcunataca Diospac huasi ñaupapimi, shuctaca alli ladoman shuctaca lluqui ladoman shayachirca. Alli ladoman churashca pilartaca Jaquintami shutichirca. Lluqui ladoman churashca pilartaca Boaztami shutichirca.