2 CRÓNICAS 23 - Dios Rimashcata Quillcashcami

¹ Canchis huata tucucpimi, Joiadaca paihuan shuc yuyailla tucushpa ari nichuncuna patsac soldadocunata mandaccunata cayachun cacharca. Chai mandaccunaca: Jerohampac churi Azarías, Johananpac churi Ismael, Obedpac churi Azarías, Adaipac churi Maasías, Zicripac churi Elisafatmi carcacuna.

² Chai soldadocunaca tucui Judá llacta pueblocunaman rishpami chaipi causac levitacunata, Israel familiacunata pushaccunatapish tandachishpa Jerusalenman rircacuna.

³ Chaipica tucui tandanacushpami Mandac Diospac huasipi jatun mandac-huan ari ninacurca. Chaipimi Joiadaca paicunataca: «Riqui, jatun mandacpac churica caipimi. Paimi Davidpac huahua huahuacunamantaca Mandac Dios nishca shinallatac mandanga.

⁴ Cunanca, caitami ruhuana canguichic. Cancunapuramantaca quimsapi chicanyashcami, samana punzhapi cuidangapac yaicuc shinallatac curacunahuan, levitacunahuan Diospac huasi pungupi cuidangacuna.

⁵ Shuc chicanyarishcaca mandana huasipi, shuccunaca callari rumi shuti pungupimi cuidangacuna. Cutin gentecunaca tucuimi Mandac Diospac huasi pungu pambapi cangacuna.

⁶ Mandac Diospac huasipica mana pi yaicungachu, ashtahuanpish Diospaclla cashcamantami Diospacta ruhuac curacuna, levitacunalla chaimanca yaicunga. Tucui gentecunaca Mandac Diospac mandashcatami pactachingacuna.

⁷ Levitacunaca jatun mandacpac muyunditami macanacunahuan shayarishpa cuidangacuna. Diospac huasiman maijan yaicucpica, huañuchinguichic. Jatun mandac maiman ricpipish, cutimucpipish, paihuan canguichic» nirca.

⁸ Levitacunapish, Judá llactapi tucui causaccunapish Joiada cura mandashca shinallatacmi tucui ruhuarcacuna. Paicunaca tucui mandaccunami samana punzhapi Diosta servingapac yaicuccunatapish, chai punzha llucshiccunatapish cuidarcacuna. Chican chican tandanacushca curacuna samana punzhapi llucshichunca Joiada curami mana saquirca.

⁹ Joiada curallatacmi jatun mandac David charishca lanzacunatapish, jatun escudocunatapish, patsac soldadocunata mandaccunaman curca. Chaicunaca Mandac Diospac huasipimi carca.

¹⁰ Chai quipaca tucui gentecunatami jatun mandacta cuidachun espadacunahuan Diospac huasi ura ladomanpish, jahua ladomanpish Diospac huasi altar muyunditapish churarca.

¹¹ Chai quipami jatun mandacpac churitaca llucchimushpa, coronata churachircacuna. Ima shina causanata Dios yachachishca shimicunatapish cushpami jatun mandacmi nishpa huillarcacuna. Joiada curapish, paipac churicunapish aceitehuan cahuishpami: «¡Jatun mandacca causachunlla!» nishpa caparircacuna.

¹² Ataliaca achca gentecuna jatun mandac nishpa caparicta uyashpami, Mandac Diospac huasipi tandanacushca gentecunapacman shamurca.

¹³ Chaiman chayashpaca, jatun mandac Diospac huasiman yaicunapi shayacuc pilar ladopi shayacucta, shinallatac jatun mandacpac ladopica macanacuccunapish, trompetapi tocaccunapish shayacuctami ricurca. Chai llactapi causac tucui gentecunapish yallita cushicushpami shuccunaca bocinapi tocarcacuna. Cantaccunapish tocanacunapi tocashpa Diosta alli nishpa shayacuctami ricurca. Chaita ricushpami Ataliaca pai churarishcata lliquishpaca: «¡Ñucataca huashallami llucchishcacuna!» nishpa caparirca.

¹⁴ Ashtahuanpish Joiada curaca patsac soldadocunata mandaccunata ucumanta llucchishpaca: «Chai huarmita caimanta canzhaman llucchichic. Maijanpish paita caticcunataca espadahuan huañuchinguichic» nirca. Mandac Diospac huasi ucupica mana huañuchinachu nishpami curallatac mandashca carca.

¹⁵ Chai soldadocuna chai huarmitaca caballocuna yaicuna punguta llucchishpami mandana huasiman apashpa huañuchirca.

¹⁶ Chai quipami Joiada curaca paipish, tucui gentecunapish, jatun mandacpish Diospaclla tucungapac ari nircacuna.

¹⁷ Chai quipami Baal diospac huasiman tucui gentecuna yaicushpa tucui urmachirca. Altarcunatapish urmachishpami, chaipi tiyac imamanpish riccha dioscunatapish ñutuchirca. Baal diosta servic Matán curatapish altar ñaupallapitacmi huañuchirca.

¹⁸ Chai quipaca Joiadaca Mandac Diospac huasipimi imata ricuccunata churarca. Paicunataca curacuna, levitacunami mandacurca. Davidca paicunatami Mandac Diospac huasipica Moisés mandashpa, quillcashcapi nishca shinallatac churarca. Paicunataca Mandac Diosman animalcunata cushpa rupachichun, David mandashca shina cushicushpa cantachunmi churarca.

¹⁹ Ima mana allita ruhuashpa mapayashca gentecuna imamantapish Mandac Diospac huasiman ama yaicuchunmi pungucunapipish cuidaccunata churarca.

²⁰ Chai quipaca patsac soldadocunata mandaccunahuan, alli nishca gentecunahuan, chai pueblota mandaccunahuan, shinallatac tucui chaipi causaccunahuanmi jatun mandactaca Diospac huasimanta llucchishpa, jatun punguta yaicushpa, mandashpa tiyana ucupi tiyachirca.

²¹ Ataliata espadahuan huañuchishca quipaca chai llactapi causac tucui gentecunami cushilla carca. Shinallatac chunlla sumac causaimi chai pueblopica tiyarca.