2 CRÓNICAS 21 - Dios Rimashcata Quillcashcami

Jatun mandac Joram Judá llactata mandashcamanta

¹ Josafat huañushpa paipac ñaupa taitacunahuan tandanacugricpica, chai taitacunata enterrashca ladollapitacmi Davidpac pueblopi enterrarca. Paipac randica paipac churi Jorammi mandai callarirca.

Joram Judá llactata mandashcamanta

² Joramca Azarías, Jehiel, Zacarías, Azarías, Micael, Sefatías huauquicunatami charirca. Tucui paicunami Judá llactata jatun mandac Josafatpac churicuna carca.

³ Paicunamanmi paicunapac taita Josafatca curita, cullquita, ima sumac charinacunata, imalla ashtahuan valishcacunata achcata cushca carca. Shinallatac Judá llactapi tiyac muyundita pircashca pueblocunatapish curcami. Ashtahuanpish Jorammanca punta churi cashcamantami Judá llacta mandanata curca.

⁴ Joramca paipac taitapac randi mandangapacmi mandanapi tiyarirca. Ña mandangapac tiyarishpa ashtahuan sinchi tucushpami, paipac huauquicunataca espadahuan, shinallatac israelcunata maijan mandaccunatapish huañuchirca.

⁵ Paica quimsa chunga ishcai huatata charishpami, mandai callarirca. Pusac huatatami Jerusalenpi mandarca.

⁶ Israel llactata jatun mandac Acabpac huahua huahua mandaccuna shinallatacmi mana allita ruhuarca. Acabpac ushihuan cazarashcamantami, Mandac Diospac ñaupapi mana allita ruhuashpa causarca.

⁷ Ashtahuanpish Mandac Diosca Davidhuan ari nishcamantami Davidpac huahua huahua mandaccunataca mana chingachinata munarca. Paica Davidtapish, paipac huahua huahuacunatapish rimashpaca, lámpara rupacuc shina cambac huahua huahuacuna mandachunmi mandanataca huiñaita cancunaman cusha nishcami carca.

⁸ Joram mandacui punzhacunallatacmi Edom llactapi causaccunaca Judá llactata mandacta mana cazushpa, paicunata mandachunca, shuctac jatun mandacta churarcacuna.

⁹ Chaimantami Joramca pai churashca mandaccunandi, carretacunapi ric soldadocunandi macanacungapac rirca. Paica tuta jatarishpami, Edom llactamanta shamushpa, paicunapac muyundita chapaccunataca macanacushpa misharca.

¹⁰ Shinami Edom llactapi causaccunaca Judá llactata jatun mandacpac maquimanta cacharirishpa cunancaman chashna causacuncuna. Chai punzhacunallatacmi Libna pueblopi causaccunapish chai mandacpac maquimantaca cacharirircacuna. Cai shinaca Jorampac ñaupa taitacunata Mandac Diosta cungarishcamantami chashnaca tucurca.

¹¹ Chashna cashca jahuami Joramca Judá llacta lomacunapi altarcunata ruhuarca. Chaita ruhuashpami, Jerusalenpi causaccunatapish, Judapi causaccunatapish chai dioscunata alli nichishpa, mana allita ruhuachishpa pandachirca.

¹² Shina cacpimi, Dios ima nishcata huillac Eliasca paipacman shuc quillcata cacharca. Chai quillcapica: «Cambac ñaupa taita Davidta Mandac Diosca: “Canca cambac taita Josafat causashca shina, Judá llactata jatun mandac Asa causashca shina mana causashcanguichu.

¹³ Ashtahuanpish Israel llactata jatun mandaccuna causashca shinami causashcangui. Shina causashpami, Judá llactapi causaccunata, Jerusalenpi causaccunataca Acabpac huasi ucupuracuna millaita ruhuashca shinallatac millaita ruhuachishpa Diosmanta caruyachircangui. Chaipac jahuaca cambac taitapac familiacunata, cambac huauquicunatami huañuchircangui. Paicunaca canta yalli allicunami carca.

¹⁴ Chaimantami cambac gentecunatapish, cambac churicunatapish, cambac huarmicunatapish, can tucui imalla charishcacunatapish Mandac Dios ñucaca jatun llaquihuan llaquichigrini.

¹⁵ Cantaca sinchi ungüihuanmi llaquichigrini. Huicsa nanaimi cantaca japigrin. Chai ungüi punzhanta anchayamucpimi, chunzhullicuna llucshishpa huañungui” ninimi» nirca.

¹⁶ Chashna huillachishca quipami Mandac Diosca filisteocunamanpish, Etiopía llacta ladopi causac arabecunamanpish Joramta piñana yuyaita churarca.

¹⁷ Paicunaca Judá llactapi causaccunahuan macanacungapac huichai rishpami, paicunata mishashpa, jatun mandacpac huasipi ima tiyashcacunatapish, paipac churicunatapish, paipac huarmicunatapish aparcacuna. Paipac churicunamantaca tucuipac quipa Joacazllami saquirirca.

¹⁸ Chai quipami Mandac Diosca mana jambiripac huicsa nanaita cachashpa llaquichirca.

¹⁹ Achca punzhacuna tucushpa, ña ishcai huata shinata ungushca cashpami, chai ungüi huicsata ismuchicpi, chunzhullicuna llucshishpa, yalli nanaihuan huañurca. Pai huañucpica, paita yuyarishpa, paipac ñaupa taitacuna huañucpi shinaca, mana ninata culun nichishpa rupachircachu.

²⁰ Paica quimsa chunga ishcai huatata charishpami, mandai callarirca. Paica pusac huatatami Jerusalenpi mandarca. Pai huañucpica, pi mana huacarcachu. Paitaca Davidpac pueblopimi enterrarca. Shina cashpapish, jatun mandaccuna enterrana jutcupica mana enterrarcachu.