2 CRÓNICAS 19 - Dios Rimashcata Quillcashcami

Dios ima nishcata huillac Jehú Josafatta rimashcamanta

¹ Judá llactata jatun mandac Josafatca ima mana tucushpami Jerusalenpi cac paipac huasiman cutimurca.

² Pai chayacpica, Dios ricuchishcata huillac Hananipac churi Jehumi tupangapac llucshirca. Paica jatun mandac Josafattaca: —Canca Diosta mana manchac runatami ayudangapac rishcangui. Mandac Diosta piñac runahuanmi apanacushcangui. Chaimantami Mandac Diosca canhuan piñarishca.

³ Shina cacpipish, Asera huarmi diosta yuyarina yuracunata anchuchishpa cambac tucui shunguhuan Mandac Diosta mashcashcamantami can alli cashcata ricushca— nirca.

Josafat juezcunata churashcamanta

⁴ Josafatca Jerusalenpimi causarca. Shina cashpapish, Beerseba pueblomantaca Efraín urcucaman rishpami, tucui chaipi causaccunata, paipac ñaupa taitacunata Mandac Diospacman cutirichic ningapac rirca.

⁵ Judá llactapi cac muyundi jatun pircashca pueblocunapica tucuipimi juezcunata churarca.

⁶ Chai juezcunataca: «Cancuna imata ruhuacushcataca alli yuyarichic. Cancunaca, mana runapac randichu mandacunguichic, ashtahuanpish Mandac Diospac randimi mandacunguichic. Cancuna allita mandacucpica, Paica cancunahuanmi canga.

⁷ Mandac Diosta manchashpa causanguichic. Imata ruhuangapacpish alli yuyarichic. Ñucanchicta Mandac Diosmanca ima mana allipish, shucllaman tucunapish, ima cushcacunata pacalla japinapish mana tiyanchu» nirca.

⁸ Josafatca Mandac Dios mandashcata allita ricushpa mandachun, imapish llaquicunata allichinacuchunmi Jerusalenpica maijan levitacunatapish, curacunatapish, israelcunapac familiacunata pushaccunatapish churarca.

⁹ Paicunataca: «Mandac Diosta manchashpa, mana llullashpa, alli shunguhuan cazushpami allita ruhuana canguichic.

¹⁰ Caishuc pueblopi causac cancunapac huauquicuna huañuchishca jahua, mana cashpaca mandashca, imata ruhuachun yachachishcacunata, mandashpa quillcachishcacunata mana cazushca jahua huillangapac shamucpica, cancunamanpish, cancunapac huauquicunamanpish Diospac rabia ama urmachunmi, Mandac Diosta llaquichishpa ama juchallichicchu nishpa allita rimana canguichic. Cashna cancuna ruhuashpaca, mana juchanchishcachu canguichic.

¹¹ Riquichic, Mandac Diospacta tucui imata ruhuanataca Amarías curami mandanga. Jatun mandacman imata ruhuanataca Judapac huahua huahuapuramanta Ismaelpac churi Zebadiasmi ricunga. Levitacunapish cancunapac ñaupapimi Diosta servishpa ayudangacuna. Cancuna imata ruhuanataca sinchita ruhuaichic. Mandac Diosca allita ruhuaccunahuan cachun» nirca.