2 CRÓNICAS 15 - Dios Rimashcata Quillcashcami

Jatun mandac Asa imacunata mushucyachishcamanta

¹ Obedpac churi Azariaspacmanmi Mandac Diospac Espirituca shamurca.

² Shina shamucpi, Asahuan tupangapac llucshishpaca: «Canpish, Judá llacta, Benjamín llacta tucui soldadocunapish uyaichic. Cancuna Mandac Dios-huan cacpica, paipish cancunahuanmi canga. Cancuna paita mashcashpaca taringuichicmi. Ashtahuanpish cancuna paita saquicpica, paipish cancunata saquingami.

³ Israelcunaca unaitami causac Dios illac, yachachic curacuna illac, Dios mandashcacunapish illac causarcacuna.

⁴ Ashtahuanpish paicunaca jatun llaquipi cashpami, israelcunata Mandac Diospacman cutirishpa, paita mashcarcacuna. Shina mashcashpami paitaca tarircacuna.

⁵ Chai huatacunapica pipish mana sumacta causai pudircachu. Ashtahuanpish tucui llactapi causaccunami huasipi cashpapish, ñanpi cashpapish llaquita charircacuna.

⁶ Shuctac llacta gentecunaca chaishuc llacta gentecunatami huañuchirca. Shuc pueblopi causaccunaca chaishuc pueblopi causaccunatami huañuchirca. Tucuilaya llaquicunata Mandac Diosllatac cachacpimi, chashna tucurca.

⁷ Ashtahuanpish cancunaca alli sinchi caichic. Cancuna Diosta servishpa, imata ruhuashcamantaca japina tiyanmi» nirca.

⁸ Obedpac churi Azarías Dios ima nishcata huillashcata Asa uyashpaca, ashtahuan sinchi tucushpami, millana yanga dioscunata tucui Judá llactamanta, Benjamín llactamanta anchuchirca. Shinallatac Efraín urcucunapi tiyac pai quichushca pueblocunamantapish chingachircami. Shina ruhuashpami Mandac Diospac pungu ñaupapi tiyac Diospac altartapish allichirca.

⁹ Chai quipaca Judá llactapi, Benjamín llactapi tucui causaccunatapish, Efraín, Manasés, Simeón llactacunamanta shamushpa Judá llactapi paicunahuan causaccunatapish tandachircami. Paita Mandac Dios paihuan cacta ricushpami, achca israelcuna Asahuan tandanacungapac pasamurcacuna.

¹⁰ Asa chunga pichca huata, quimsa quillata Judá llactata mandacucpimi Jerusalenpi tandanacurcacuna.

¹¹ Chai punzhami macanacuimanta quichumushca canchis patsac huagracunata, canchis huaranga ovejacunata Mandac Diosman cushpa huañuchirca.

¹² Shina ruhuashpami, shuc yuyailla tucushpa paicunapac ñaupa taitacunata Mandac Diosta tucui almahuan, tucui shunguhuan mashcangapac ari nircacuna.

¹³ Israelcunata Mandac Diosta mashcanata mana munaccunataca yuyac cachun, huahua cachun, cari cachun, huarmi cachun huañunami can nircacuna.

¹⁴ Sinchita shuc shinalla caparishpami trompetacunapi, bocinacunapi tocashpa Mandac Dios-huan ari nircacuna.

¹⁵ Chashna tucui shunguhuan, tucui munaihuan ari nishpa Diosta mashcashcamantami Judá llactapi causaccunaca cushicurca. Tucui paicuna mashcashcamantaca Mandac Diosca chasquircami. Paicunapac tucui llactacunapica sumac causaimi tiyarca.

¹⁶ Jatun mandac Asaca paipac mama Maacatapish Asera huarmi diosta ruhuashcamantami jatun mandac canamantaca anchuchirca. Chai diostaca paquishpa ñutuchishpami, Cedrón yacu patapi rupachirca.

¹⁷ Tucuita chashna ruhuashpapish, paipac tucui causaipi Diosta tucui shunguhuan cazushpa causashpapish, Israel llacta lomacunapi cac altartaca mana anchuchircachu.

¹⁸ Paica cullquitapish, curitapish, ima charishcacunatapish paipish, paipac taitapish Diospaclla cachun chicanyachishcataca Mandac Diospac huasimanmi aparca.

¹⁹ Asa quimsa chunga pichca huatata mandangacamanca jatun macanacuica mana tiyarcachu.