2 CRÓNICAS 12 - Dios Rimashcata Quillcashcami

Jatun mandac Sisac Judá llactaman yaicushcamanta

¹ Jatun mandac Roboamca ña allita mandacushpami, paipish, israelcunapis Mandac Dios mandashcata saquircacuna.

² Roboam pichca huatata mandacucpimi, Mandac Diosta mana cazushpa, piñachishcamanta Egipto llactata jatun mandac Sisacca Jerusalenpi causaccunahuan macanacungapac huichai shamurca.

³ Sisacca huaranga ishcai patsac carretahuan, caballopi ric sucta chunga huaranga soldadocunahuanmi shamurca. Paihuan shamuc gentecunaca Libia llactamanta, Etiopía llactamanta shinallatac suquienocunatami mana yupaipac achca gentecuna shamurca.

⁴ Judá llactapi tiyac muyundita pircashca pueblocunata quichushpami, Jerusalencaman chayarca.

⁵ Shina cacpimi, Dios ima nishcata huillac Semaiasca Roboampacman, shinallatac Judá llactata mandaccunapacman shamurca. Paicunaca Sisac macanacungapac shamushcamantami Jerusalenpi tandanacushca carca. Semaiasca paicunataca: —Mandac Diosca: “Cancunami ñucamanta anchurircanguichic. Chaimantami ñucapish cancunataca Sisacpac maquipi saquini” ninmi— nirca.

⁶ Shina nicpimi, israelcunata mandaccunapish, jatun mandac Roboampish yallita llaquirishpa cumurishpaca: —Mandac Diosca imatapish cashcatami ruhuan— nircacuna.

⁷ Chashna llaquiricta ricushpami, Mandac Dios Semaiasman huillashpaca: «Paicunaca yallitami llaquirishcacuna, chaimantami mana tucuchigrini, ashtahuanpish utcami chai llaquimanta llucchigrini. Ñuca piñarishcata tallic shina cachashpa, Sisacpac maquihuan tucuchinataca saquishami.

⁸ Shina cashpapish, cunanca paita serviccunami tucunguichic. Ñucata servishpa causanapish, llactacunata jatun mandaccunata servishpa causanapish ima shina cashcata yachachunmi, chashnaca ruhuagrini» nirca.

⁹ Egipto llactata mandac Sisacca Jerusalenman huichai rishpami, Mandac Diospac huasimantapish, mandacpac huasimantapish sumac allicunata tucui aparca. Shinallatac Salomón ruhuachishca curi escudocunatapish aparcami.

¹⁰ Chai escudocunapac randica, bronce escudocunatami jatun mandac Roboamca ruhuachirca. Chai escudocunataca jatun mandacpac huasi pungupi cuidac soldadocunata mandaccunamanmi huacaichichun curca.

¹¹ Mandac Diospac huasiman, jatun mandac ricpica, cuidac soldadocunaca chai escudocunata apashpami, paihuan riccuna carca. Ña cutimushpaca cuidaccunapac ucullapitacmi churaccuna carca.

¹² Roboam llaquirishpa cumuricpimi, Mandac Diosca paihuan yallita piñarishca cashpapish mana tucui tucuchingapac alli tucurca. Chaipac jahuapica Judá llactapipish tucuimi alli carca.

¹³ Roboamca ashtahuan sinchiyashpami Jerusalenpi mandashpa catirca. Paica chuscu chunga shuc huatata charishpami, mandai callarirca. Chunga canchis huatatami Jerusalenpi mandarca. Mandac Diosca tucui Israel aillupuramantaca chai pueblotami paipac shuti chaipi causachun acllarca. Roboampac mamaca amonitapuramanta Naamami carca.

¹⁴ Roboamca, tucui shunguhuan Mandac Diosta mana mashcana yuyaita charishcamantami mana allita ruhuarca.

¹⁵ Punta punzhacuna, quipa punzhacuna Roboam imata ruhuashcacunaca Dios ima nishcata huillac Semaiaspish, Dios ricuchishcata huillac Iddopish, familiacunapac shuticunata japishpa quillcashcapimi tiyacun. Roboamca tucui causaipimi Jeroboamhuan macanacushpa causarca.

¹⁶ Roboam huañushpa, paipac ñaupa taitacunahuan tandanacugricpica, Davidpac pueblopimi enterrarca. Paipac randica, paipac churi Abiasmi mandai callarirca.