2 CRÓNICAS 10 - Dios Rimashcata Quillcashcami

Israelcuna mana cazushcamanta

¹ Tucui israelcunami Roboamta jatun mandac cachun churangapac Siquem puebloman tandanacushca carca. Chaimantami Roboampish Siquem puebloman rirca.

² Nabatpac churi Jeroboamca Egiptopi cashparacmi caitaca yachac chayarca. Paica jatun mandac Salomonmanta miticushpami, Egiptopi causacurca.

³ Chaipi causacucpimi, cayachun cacharca. Shina cayacpimi Jeroboampish, tucui israelcunapish Roboamtaca:

⁴ —Cambac taitaca yugota apachishca shinami llaquinayaita charirca. Cunanca, chai llashac yugomantapish sinchi ruhuaicunapi charishcamantaca canca ashallatapish cacharichiyari. Chaita ruhuacpica, canta servishpa causashunmi— nircacuna.

⁵ Shina nicpimi Roboamca: —Cunanmanta quimsa punzhapi ñucapacman cutimunguichic— nirca. Shina nicpica gentecunaca rircallami.

⁶ Chai quipami jatun mandac Roboamca paipac taita Salomón causacucpi, servishpa causacushca pushac yuyaccunaman yuyaita cuchun mañashpaca: —Cai gentecuna cashna nishcamantaca ¿Ima nishpatac cutichina alli canga?— nirca.

⁷ Shina tapucpi paicunaca: —Cai gentecunahuan alli cashpa, sumac shimicunahuan rimashpa paicunata alli chasquicpica, paicunaca tucui causaipimi canta servishpa causanga— nircacuna.

⁸ Ashtahuanpish paica chai pushac yuyaccuna cushca yuyaita saquishpami, paillahuantac huiñashca paita servic cunan huiñaicunaman yuyaita cuchun mañarca.

⁹ Paicunaman tapushpaca: —Ñucataca: “Cambac taita yugota apachishca shina llaquinayaita charishcamantaca ashallatapish cacharichiyari” nincunami. Shina ningapac shamuc gentecunataca, ¿ima nishpatac cutichina alli canga? ¿Ima yuyaitatac cunguichic?— nirca.

¹⁰ Shina nicpimi, paihuan huiñac cunan huiñai paita serviccunaca: —Cambac taitaca yugota apachic shinami llaquinayaita charirca. Cunanca chai llashac yugomantapish, sinchi ruhuaicunamantapish ashallatapish cacharichiyari ningapac shamuc gentecunataca: “Ñucapac maqui uchilla dedoca ñuca taitapac huasha lomotapish yalli racumi.

¹¹ Ñuca taitaca llashac yugota apachishca shina llaquichishca cacpica, ñucacarin ashtahuanmi llashac yugota apachisha. Ñuca taita angucunahuan llaquichishca cacpica, ñucacarin alacrancunahuanmi llaquichisha” ningui— nircacuna.

¹² Jatun mandac Roboamca: “Caimanta quimsa punzhapi ñucapacman cutimunguichic” nishcami carca. Shina nishca shinami Jeroboamca ña quimsa punzha tucucpi tucui gentecunandi Roboampacman shamurca.

¹³ Shina shamucpimi, jatun mandac Roboamca pushac yuyaccuna yuyaita cushcata mana cazushpa sinchita rimarca.

¹⁴ Ashtahuanpish paihuan huiñaccuna yuyaita cushcata rimashpaca: —Ñuca taitaca llashac yugota apachic shinami llaquichirca. Ashtahuanpish ñucaca chai yugotaca ashtahuanmi llashacyachisha. Ñuca taitaca angucunahuanmi llaquichirca. Ñucacarin alacrancunahuanmi llaquichishpa charisha— nirca.

¹⁵ Jatun mandacca israelcuna mañashcataca mana uyarcachu. Mandac Diosca Silo pueblopi causac Ahiasta Nabatpac churi Jeroboamman huillachishca pactachunmi paillatac chashna ruhuarca.

¹⁶ Tucui israelcunaca paicuna mañashcata jatun mandac mana uyasha nicpimi: «Davidmantaca, ¿imatatac ñucanchicca charinchic? ¿Isaipac churimantaca ima japinatatac charinchic? ¡Israelcuna, cancunapac carpa huasicunaman richiclla! ¡David cunanca cambac huasi ucupurata cuidanguilla!» nirca. Shina nicpimi, israelcunaca paicunapac carpa huasicunaman rircacuna.

¹⁷ Ashtahuanpish Roboamca Judá llacta pueblocunapi causac israelcunallatami mandarca.

¹⁸ Jatun mandac Roboamca impuestota japic Adoniramtami israelcunapacman cacharca. Ashtahuanpish israelcunaca rumicunahuan shitashpami huañuchirca. Shina tucucpimi, jatun mandac Roboamca shuc carretapi huichicushpa, Jerusalenman miticushpa rirca.

¹⁹ Chashnami israelcunaca Davidpac huahua huahuapuramanta chicanyachishpa, cunancaman chican causancuna.