2 CRÓNICAS 1 - Dios Rimashcata Quillcashcami

Salomonca ima shina yachac cangapac Diosta mañashcamanta

¹ Davidpac churi Salomonca paita Mandac Dios paihuan cacpimi, pai mandanapica yallita jatunyarca. Shinallatac pai mandanatapish pi mana cuyuchipac sinchitami ruhuarca.

² Salomonca tucui israelcunata, huaranga, patsac soldadocunata mandaccunata, juezcunata, tucui israelcunata mandaccunata, familiacunata mandaccunatami tandachirca.

³ Chai quipaca tucui chai tandanacushca gentecunahuanmi, Gabaón lomapi cac Dios-huan tupana huasipi cac altarman rirca. Chai carpa huasitaca Mandac Diosta servic Moisesmi shitashca pambapi ruhuashca carca.

⁴ Ashtahuanpish Davidca Diospac Arcataca Quiriat-jearim pueblomantami carpa huasita pai shayachishca allichishca pushtupi churangapac apamushca carca.

⁵ Bronce altartaca Uripac churi Bezaleelmi ruhuarca. Urica Hurpac churimi carca. Chai altarca Mandac Diospac ñaupapimi Dios-huan tupana huasi ñaupapi tiyacurca. Chaimanmi Salomonca tandanacushca gentecunahuan Diosman tapungapac rirca.

⁶ Chaipimi Diospac ñaupapi Dios-huan tupana huasipi cac bronce altarman rishpa Salomonca huaranga animalcunata Diosman cushpa rupachirca.

⁷ Chai tuta Mandac Dios Salomonman ricurishpaca: —Imata ñuca canman cuchun mañailla— nirca.

⁸ Shina nicpimi, Salomonca Mandac Diostaca: —Canca, ñuca taita Davidtaca yallitami llaquishcangui. Chaimantami ñucataca paipac randi jatun mandac cachun churashcangui.

⁹ Mandac Dioslla, cunanca ñuca taita Davidman cusha nishcata pactachiyari. Canmi ñucataca cai pachapi tiyac ñuto allpa shina achca gentecunapac jatun mandac cachun churashcangui.

¹⁰ Cunanca, cai tucui gentecunata mandai callaringapacca, alli yuyaitapish, yachaitapish cuiyari. Cambac cai tucui achca gentecunataca, ¿pitac mandangayari?— nirca.

¹¹ Shina nicpi, Mandac Diosca Salomontaca: —Cambac shungupica, chayuc canatapish, ima charinacunatapish, alli nishca canatapish, canta piñaccuna huañuchunpish, unai huatata causanatapish mana mañashcanguichu. Ashtahuanpish mandachun churashca ñuca acllashcacunata mandangapacmi alli yuyaitapish, yachaitapish mañashcangui.

¹² Chaimantami alli yuyaitapish, yachaitapish canman cuni. Shinallatac chayuc canatapish, ima charinacunatapish, alli nishca canatapish cunimi. Caitaca cambac punta jatun mandaccunaca pipish mana charishcachu, cambac quipa jatun mandaccunapish, manallatac charingachu— nirca.

¹³ Salomonca Gabaón lomapi cac Dios-huan tupana huasi ñaupapi cac altarmanta Jerusalenman cutishpaca, israelcunatami mandai callarirca.

Salomón caballocunatapish, carretacunatapish randishcamanta

¹⁴ Salomonca macanacuna carretacunata, caballocunapi ric soldadocunatami tandachirca. Paica huaranga chuscu patsac carretacunata, caballocunapi ric chunga ishcai huaranga soldadotami charirca. Paicunatami maijancunataca carretacunata huacaichina pueblocunapi, shuccunataca pai jatun mandacta cuidachun Jerusalenpi churarca.

¹⁵ Jatun mandacca cullquitapish, curitapish rumita shinami, Jerusalenpica charirca. Cedro caspicunatapish, Sefela pambapi tiyac sacha higo yuracunata shinami, achcata charirca.

¹⁶ Jatun mandacpac randishpa catushpa puric runacunaca Egiptomantami caballocunata, lienzo telacunata tucui pagashpa Salomonmanca apamuccuna carca.

¹⁷ Egiptomantaca shuc carretallatami sucta patsac siclos cullquipi, shinallatac caballocunataca patsac pichca chunga siclos cullquipi randishpa apamuccuna carca. Chai runacunallatacmi heteocunata jatun mandaccunamanpish, Siria llactata jatun mandaccunamanpish catuccuna carca.