2 CORINTIOS 8 - Dios Rimashcata Quillcashcami

Ofrendata cuna cashcamanta

¹ Cuyashca criccuna, Dios cuyashcallamanta Macedonia llactapi cac tandanacushca criccuna imata ruhuac cashcatami parlagrinchic.

² Paicunaca llaquicunata apacushpapish, cushillami carcacuna. Shinallatac imata mana chariccuna cashpapish, chayuccuna shinami cullquitaca mana misarishpa curcacuna.

³ Paicuna charishca shina tucui shunguhuan cushcatapish, chaimanta yalli yallita cushcatapish, ñucallatac ricushcamantami huillani.

⁴ Paicunaca quiquin munaimantami, “Diospaclla cac criccunata ñucanchicpish ayudashun ninchicmi” nishpa, mailla mañarcacuna.

⁵ Paicuna cushpaca, mana ñucanchic yuyacushca shinachu curcacuna, ashtahuanpish paicunallatacmi puntaca Apunchic Jesucristoman curishpa quipaca Dios munashca shinami, ñucanchicpacta ruhuanatapish munarcacuna.

⁶ Chaimantami Titotaca pai puntaman callarishca shinallatac, Dios cuyashcamanta cancuna cushcacunata tandachichun nishpa mañarcanchic.

⁷ Cancunaca alli criccuna, alli huillaita huillaccuna, alli yachaccuna, cushicushpa imatapish allita ruhuaccuna, shinallatac ñucanchicta cuyaccunami canguichic. Chai shinallatacmi cancunaca imata cushpapish, Dios cuyashcamanta yallita cuna canguichic.

⁸ Caitaca mana shuc mandashca shinatachu nicuni, ashtahuanpish shuccuna cushicushpa cushcata ricushpa, cancunapish cushpa, tucui shunguhuan cuyashcata ricuchichunmi nicuni.

⁹ Ñucanchic Apunchic Jesucristo mai cuyac cashcataca, ña yachanguichicmi. Paica achcata charic cashpapish, cancunamantami huaccha tucurca. Chai shina huaccha tucushcamantami, cancunaca achcata chariccuna tucunguichic.

¹⁰ Caimanta rimashpaca, cancunapac allipacmi cai ñuca yuyaitaca cuni. Cai cullquita cunataca sarun huatami cushicushpa cungapac cancunarac callarircanguichic.

¹¹ Chashna cui callarishca shinallatac, cunanpish cancuna charishca shina cushicuihuan cushpa caticuichiclla.

¹² Imatapish charishca shina quiquin munaimanta cushcamantami, Diosca cushicushpa chasquin. Diosca imata mana charishcataca mana mañanchu.

¹³ Cancuna shuccunaman cungaraicu ima illaclla saquirichunca mana ninichu, ashtahuanpish pacta pacta tiyachunmi nini.

¹⁴ Cancunaca shuccuna mana charishcatami charinguichic. Maijan cutinca cancuna mana charishcatami shuccunaca charinga. Chai shina caishuc chaishuc ima illashcata caranacucpica, imapish mana illangachu.

¹⁵ Dios quillcachishcapica: «Achcata tandacpish mana puchuchircachu. Ashallata tandacpish mana ima illacllachu carca» ninmi.

Titota shuctac criccunandi Pablo cachashcamanta

¹⁶ Cancunata ñuca llaquic cashca shinallatac, Titoman cancunata llaquina yuyaita Dios cushcamantami, paitaca pagui nicuni.

¹⁷ Ñuca ricugrichun mañacpica, paica uyashpami pai quiquinllatac cancunata ricugrina munaihuan cashpa, cunanca ricungapac ricun.

¹⁸ Shinallatac alli huillaita huillacushcamanta tucui tandanacushca criccunapac alli nishca, shuc huauquitami Titohuanca cachani.

¹⁹ Alli nishcallapish paica mana canchu, ashtahuanpish ñucanchic-huan pacta cullquita tandachishpa richun, tandanacushca criccuna acllashcami can. Cai shina tandashpa apashpaca Apunchic Jesús alli nishca cachun, shinallatac criccuna cuna munaita charishcata ricuchingapacmi ruhuacunchic.

²⁰ Cashna achca cullquita tandachicushcata ama pi juchanchichunmi chashnaca ruhuanchic.

²¹ Shina ruhuashpaca, mana Apunchic Jesuspac ñaupallapi alli ricuringapac, ashtahuanpish gentecunapac ñaupapipish alli ricuringapacmi chashna ruhuacunchic.

²² Paicunahuanca ñucanchicpuramanta shuc huauquitapish cachanimi. Paitaca imapipish allita ruhuactami ricushcanchic. Cunancarin paica cancuna cuna cashcatatac yachashpaca, ashtahuanmi allita ruhuanga.

²³ Titoca ñucahuan pacta cancunapac allipac ruhuashpa puricmi can. Cutin caishuc ishcai huauquicunaca, caipi chaipi cac tandanacushca criccuna acllashca, Cristo alli nishca cachun ruhuaccunami cancuna.

²⁴ Caipi chaipi cac tandanacushca criccuna cancuna cuyac cashcata yachachunca, cai huauquicunata allita chasquichic. Chai shina cancuna allita chasquicpimi, ñucanchic cancunata “allicunami” nishcaca mana yanga canga.