2 CORINTIOS 5 - Dios Rimashcata Quillcashcami

¹ Ñucanchicca chingariclla cai pachapi tiyac huasi shinami canchic. Ñucanchic cuerpo chai huasi urmac shina huañucpica, mana gentecunapac ruhuashca huasitami jahua pachapi, Dios allichishcata charinchic.

² Chashna cashcamantami cai pachapi tiyac huasi shina cuerpohuan cashpaca, churanata mudaric shina, jahua pacha huasi shina cuerpohuan causacunchicmanlla nishpa yuyanchic.

³ Chai shina churanata mudarishpaca, ña mana lluchulla cashunchu, ashtahuanpish Dios allichishca cuerpohuanmi cashun.

⁴ Cai carpa huasi shina cuerpohuan causacushpaca, llaquihuanmi causacunchic. Lluchulla shinaca mana cashun ninchicchu, ashtahuanpish churanata churaric shinami, cai huañunalla cuerpotaca mushuc causaihuan chingachinata munanchic.

⁵ Chashna japichunca, Diosllatami yuyaita curca. Chaita japina cashcata ricuchichunca, paillatacmi paipac Espirituta ñucanchicman curca.

⁶ Chaimantami ñucanchicca chaipi shunguta churashpa causacunchic. Cai cuerpohuan causacushpaca, carupimi Apunchic Jesusmanta causacunchic.

⁷ Paitaca mana ricui pudinchicchu, paita crishpallami causacunchic.

⁸ Paillapi shunguta churashca cashpami cai cuerpomanta anchurishpa Apunchic Jesus-huan causagrinata munanchic.

⁹ Chaimantami causashpapish, huañushpapish, Apunchic Jesusta cushichina yuyailla canchic.

¹⁰ Imalla ruhuashcata ñucanchic ricuchingapacca, tucuita taripac Cristopac ñaupapimi tucui mashna ricurigrina canchic. Chaipica cai aicha causaipi allita ruhuashcamanta, mana allita ruhuashcamantami japina cashcata japigrishun.

Dios-huan alli tucuna cashcamanta

¹¹ Apunchic Jesustaca manchana cashcata yachashpami, gentecuna Dios-huan alli tucuchun nishpa huillacunchic. Ñucanchic ima shina cashcataca Diosca allimi yachan. Chaitaca cancunapish yachachunmi munani.

¹² Cancuna sarun yuyacushca shinaca, ñucanchicca allimi canchic nishpaca mana nicunchicchu, ashtahuanpish cancuna ñucanchic ima shina cashcata yachashpa cushicuchunmi, chashnaca ninchic. Chashna cashpami mana shungumanta, ashtahuanpish ñahui ricuillapi allimi canchic niccunamanca huillai pudinguichic.

¹³ Yuyai illaccuna shina cashpaca, Diospacmi chashnaca canchic. Alli yuyaihuan cashpaca cancunapac allipacmi canchic.

¹⁴ Cristo tucuimanta huañushcata yachashcamanta pachami, paipac cuyaica ñucanchicman yuyaita cun. Cristo huañushcamantami tucui mashna huañushca shina canchic.

¹⁵ Cristoca cunan causaccuna ama paicuna quiquinpaclla causachun, ashtahuanpish paipaclla causachunmi tucuimanta huañurca. Chashnaca tucuipac allipacmi huañushpa causarirca.

¹⁶ Ñucanchicca pitapish caimanta ñaupamanca gentecuna yuyashca shinaca, ña mana yuyanchic. Ñaupaman gentecuna Cristomanta yuyashca shina yuyac cashpapish, cunanca ña mana chashna yuyanchicchu.

¹⁷ Chaimanta maijanpish Cristohuan shuc shinalla tucushpaca, mushuc runami tucun. Ñaupa causaita saquishpami, mushuc causaita causan.

¹⁸ Tucui caicunataca Diosmi ruhuarca. Diosca Cristomanta ñucanchic-huan alli tucushpami, ñucanchictaca gentecuna paihuan alli tucuchun nishpa, huillaccuna cachun mingarca.

¹⁹ Diosca gentecunapac juchata mana yuyarishpami, Jesucristomanta tucui cai pachapi causaccuna paihuan alli tucuchun chasquicun. Dios-huan alli tucunata huillaccuna cachunmi, ñucanchicman mingarca.

²⁰ Chashnaca Cristopac randi huillachun cachashca huillaccunami canchic. Shina cashpami Diosllatac “ñucahuan alli tucuichic” nicuc shina, ñucanchicta huillachicun. Chashna cashcamantami “Cristopac shutipi Dios-huan alli tucuichic” nishpa mañacunchic.

²¹ Cristo mana juchayuc cacpipish, Diosca ñucanchic juchacunamantami llaquita apachun curca. Shina cacpica, Jesusmantami Dios-huan alli tucunchic.