2 CORINTIOS 3 - Dios Rimashcata Quillcashcami

Mushuc ari ninacuita huillaccuna cashcamanta

¹ Caita nishpaca, ¿ñucanchicllatac allimi canchic nishpa cutin nicushcatachu yuyanguichic, imatacyari? ¿Ñucanchicca shuccuna shinachu ima shina cashcata ricuchic quillcata cancunamanca mañana canchic, mana cashpaca ricuchina canchic, imatacyari?

² Cancunallatacmi ñucanchic quillcaca canguichic. Chai quillcashcaca ñucanchic shungupimi can. Chaitami tucui mashna ricushpa, ima shina cashcata yachancuna.

³ Cancunataca Cristollatac quillcashca gentecuna ricuna quillca shina cashcatami ricunchic. Chaitaca ñucanchicllatacmi cancunamanca curcanchic. Chai quillcaca mana tintahuan quillcashcachu, ashtahuanpish causac Diospac Espirituhuan quillcashcami. Chai quillcaca mana rumipi quillcashcachu, ashtahuanpish cancunapac shungupimi quillcashca can.

⁴ Cristomanta Diospi shunguta churashpami, tucui caicunaca chashnatac cashcata yachanchic.

⁵ Tucui caicunataca mana ñucanchic yachac cashcallamantachu ruhuanchic, ashtahuanpish Diosmi ruhuachicun.

⁶ Paillatacmi paipac mushuc ari ninacuita huillachun, ñucanchicman yachachirca. Chaica mana mandashcapi quillcashcachu, ashtahuanpish Diospac Espíritu yachachishcami. Mandashcaca huañuchinmi, ashtahuanpish Espirituca causaitami cun.

⁷ Chingarina cashcata ricuchic, tabla rumipi quillcashca mandashcata Dios Moisesman cushpaca, pai sumaimana cashcahuanmi achicyachirca. Chashna achicyachicpimi, israelcunaca Moisespac ñahuitaca mana ricui pudircacuna.

⁸ Chashna cacpica, ¡Diospac Espiritumanta mushuc ari ninacuita huillashcacarin, chaita yallimi mai sumaimana canga!

⁹ Chingarina cashcata ricuchic mandashcacuna sumaimana cacpica, “¡Dios-huan ña alli tucushcami cangui” nishpa huillashcacarin, chaita yallimi mai sumaimana canga!

¹⁰ Ñaupaman mandashca mai sumaimana cacpipish, cai quipa sumaimana huillashcahuan ricucpica, imapish mana canchu.

¹¹ Chai tucurinalla huillashca sumaimana cashca cacpica, mana chingaric huillashcacarin, huiñai huiñaipacmi sumaimana canga.

¹² Chai sumaimana huillashca yuyailla cashpami, mana manchashpa tucuiman huillacunchic.

¹³ Ñucanchicca mana Moisés paipac ñahuita pañohuan pacashca shinachu canchic. Moisesca israelcuna chai llipiacuc chingaricucta ama ricuchunmi, chashnaca ruhuarca.

¹⁴ Shina cacpipish israelcunaca mana entendircacunachu. Shinallatac ñaupaman Dios ari nishcataca cunan punzhacamanmi rezashpapish, paicunapac yuyai pañohuan jarcashca shina cacpi, mana entendincuna. Chai jarcashca pañotaca Jesucristollami anchuchin.

¹⁵ Cunan punzhacamanmi Moisés mandashcacunata quillca caticucpipish, paicunapac yuyaitaca chai pañoca jarcacunrac.

¹⁶ Shina cacpipish Mandac Diosman cutiricpica, chai jarcashca pañoca anchurinmi.

¹⁷ “Mandac Dios” nishpaca, paipac Espiritutami ninchic. Maijanpish Mandac Diospac Espirituhuan cashpaca, huatashcamanta cacharirishcami can.

¹⁸ Chaimanta tucui ñucanchicca ñaupaman ñahuita jarcacushca pañota anchuchishca cashpami, cunanca Apunchic Jesús sumaimana cashcata espejo shina ricuchicunchic. Shinallatac punzhantami pai shinallatac sumaimana tucushpa caticunchic. Paipac Espiritullatacmi pai shinallatac sumaimana cachun, ashtahuan ashtahuan allita ruhuashpa caticun.