2 CORINTIOS 2 - Dios Rimashcata Quillcashcami

¹ Chaimantami cancunata mana llaquichingaraicu, cutin rinataca jarcarircani.

² Ñuca cancunata llaquichicpica, tucui cancunami llaquilla tucunguichicman. Shina cacpica, ¿pitac ñucataca cushichingayari?

³ Chaimantami ñuca cancunapacman ricpi, ama llaquichichun, ashtahuanpish cushichichun nishpa quillcarcani. Ñuca cushilla cacpica, cancunapish cushillami canguichic.

⁴ Cancunaman quillcashpaca, yallita llaquihuan cashpami huacashpa quillcarcani. Shina cashpapish mana cancunata llaquichingapacchu, ashtahuanpish cancunata yallita cuyac cashcata cancuna yachachunmi, chashnaca quillcarcani.

Paita piñacta Pablo perdonashcamanta

⁵ Maijanpish ñucata llaquichishpaca, mana ñucallatachu llaquichirca, ashtahuanpish tucui cancunatami maipica llaquichirca. Chashna nishpaca, chai runata mana yalli llaquichingapacmi nini.

⁶ Chai llaquichic runaman cancunamanta taucacuna llaquita churashcaca, ña chailla cachun.

⁷ Cunanca perdonaichic shinallatac cushichichic. Mana chashna ruhuacpica, caita chaita yuyashpami, yalli llaqui tucunga.

⁸ Chaimanta cutinllatac paita cuyaccuna cashcata ricuchichic nini.

⁹ Chai shinaca ñuca ima nishcata cancuna pactachic cashcata, mana pactachic cashcata ricungapacmi quillcarcani.

¹⁰ Maijanta cancuna perdonacpica, ñucapish perdonanimi. Imapish mana perdonashca cacpica, cancunata llaquishcamantami Cristopac ñaupapi chai shinaca ña perdonarcani.

¹¹ Chai shina ruhuacpimi, Satanasca ñucanchictaca mana pandachinga. Pai ima shinapish pandachisha nicushcataca allimi yachanchic.

Troas pueblopi Pablo mana cushilla cashcamanta

¹² Troas pueblopi Cristomanta alli huillaita huillangapac chayacpica, Apunchic Jesusllatacmi imatapish huillachunca pungu pascashca shinata ruhuarca.

¹³ Shina cacpipish huauqui Tito mana tupashcamantaca, maimi llaquilla carcani. Chaimantami paicunata caya minchacaman nishpa, Macedonia llactaman rircani.

Cristohuan mishaccuna cashcamanta

¹⁴ Diostaca pagui ninimi. Paimi ñucanchictaca Cristo Jesus-huan mishaccuna cashcata ricuchishpa punzhanta pushacun. Shinallatac mai llactapipish mishquilla ashnacuc shina Cristopac alli huillaica ñucanchicmantami huillaricun.

¹⁵ Diosmanca ñucanchicca Cristomantami mishquilla ashnacuc incienso shina canchic. Chai mishquilla ashnacucmi quishpirinaman riccunapurapipish, chingarinaman riccunapurapipish ashnacun.

¹⁶ Chingarinaman riccunataca cai mishquilla ashnacuc shina alli huillaica huañuimanmi pushacun, ashtahuanpish quishpirinaman riccunataca cai mishquilla ashnacuc shina alli huillaica causaimanmi apacun. Shina cacpica, ¿pitac cai alli huillaitaca huillai pudingayari?

¹⁷ Ñucanchicca mana caishuccuna shina imata japingaraiculla Diosmanta alli huillaitaca chagrushpa huillacunchicchu, ashtahuanpish mana llullashpami Diospac ñaupapi paillatac cachashcacuna cashcamanta, Cristomantaca huillacunchic.