2 CORINTIOS 11 - Dios Rimashcata Quillcashcami

Llullac huillaccunata Pablo rimashcamanta

¹ Ñuca yuyai illac shina rimarishcata ashata uyaichic. Ima shina cashpapish uyaichicyari.

² Diosca paipaclla causachun munashcamantami, ñucapish chashnallatac causachun munani. Ñucaca shuc cusallahuan cazarachingapac, manarac pihuan chayarishca solterata ari nichic shinami cancunataca Cristohuan ari nichishpa paipacllata ricuchisha nini.

³ Shina cashpapish ima shinami culebra paipac yachac tucushca cashcahuan Evata umashpa crichirca, chashnallatac cancunamantapish Cristota tucui shunguhuan catina yuyaita anchuchishpa, chingachinatami manchani.

⁴ Maijanpish ñucanchic huillashca Jesusmanta shuctaclayaman huillangapac chayacpi, cancuna chasquishca Espiritumanta shuctaclaya espiritutapish, cancuna chasquishca alli huillaimanta shuctaclaya huillaitapish cancunaca chasquinguichicllami.

⁵ Ñucaca, quipata huillangapac shamuc «jatun yachaccunami» nishca huillaccunamanta “yangallami cani” ninataca mana ninichu.

⁶ Paicuna shina rimanata mana alli yachashpapish, Diosmantaca allimi yachani. Chai shina cashcataca ima shinapish allimi ricuchircani.

⁷ ¿Cancuna jatun tucuchunchu ñucaca cancunamanta imata mana japishpa, Diosmanta alli huillaitaca yangalla tucushpa huillarcani? ¿Chaita ruhuashpachu juchallircani?

⁸ Cancunata servingapacca shuctac tandanacushca criccunamantami cullquita chasquircani. Chashna japishpaca paicunamanta shuhuac shinami ruhuarcani.

⁹ Cancunahuan cashpaca, ima illac cashpapish imata mana mañarcanichu. Chai imalla illashcataca Macedonia llactamanta shamuc criccunami curcacuna. Cancunataca imata mañashpa mana piñachircanichu, shinallatacmi mana piñachishpa catinata munani.

¹⁰ Cristomanta cashcata nic shimicunataca ñucaca ricsinimi. Chashna cashcamantami ñuca imata mana japishpa cushicunataca, tucui Acaya llactapi causaccunapish mana jarcanga nini.

¹¹ Chashna nishpaca, ¿cancunata mana cuyashcamantachu chashnaca nini? Diosllatacmi ñuca cancunata cuyac cashcataca yachan.

¹² Chai llullashpa puriccuna huillashpa ama cushicuchunmi, ima shina ruhuacuc shinallatac imata mana chasquishpa ruhuashpa catisha.

¹³ Chaicunaca llullashpa huillashpa pandachiccunami, shinallatac “Cristopac apostolcunami canchic” nic tucuccunami.

¹⁴ Caicunata ricushpaca, mana mancharinachu. Satanasllatacmi achic nicuc ángel shina tucunlla.

¹⁵ Chashnaca mana mancharinachu canchic. Paicunata serviccunapish cashcata ruhuaccuna shinami ricurincuna. Shina cacpipish paicuna imata ruhuacushca shinallatacmi chingaringacuna.

Apóstol cachun Jesús acllashca Pablo llaquita apashcamanta

¹⁶ Cutinllatacmi cancunamanca: Ñucataca ama “yuyai illacmi” nishpa yuyaichicchu nishpa nini. Chai shina yuyacushpapish, ñuca ashata jatun tucushpa yuyai illac shina rimashcata uyaichic.

¹⁷ Cashna rimashpaca, mana Apunchic Jesús munashca shinachu nini, ashtahuanpish jatun tucuna yuyaihuanmi yuyai illac shina rimarini.

¹⁸ Taucacuna “ñucallami alli cani” nishpa, jatun tucucucpica, chashnallatacmi ñucapish jatun tucusha nini.

¹⁹ Cancunaca “yalli yachacmi canchic” nishpa yuyashpapish, ¡yuyai illaccuna rimashcataca alli munaihuanmi chasquinguichic!

²⁰ Shinallatac servichiccunatapish, shuhuashpa quichuccunatapish, umaccunatapish, mana ricunayachiccunatapish, piñashpa ñahuipi huactaccunatapish, imata mana nishpami chasquinguichiclla.

²¹ Ñucanchic chai shinatac ruhuangapacca yallimana irquicunami carcanchic. ¡Chaimantaca pinganayanmi! Shina cacpipish shuctaccuna imamantapish jatun tucucpimi ñucapish yuyai illac shina rimarishpa jatun tucusha nini.

²² Paicunaca “hebreocunami canchic” ninchayari, ñucapish chaillatacmi cani. Paicunaca “israelcunami canchic” ninchari, ñucapish chaillatacmi cani. Paicunaca “Abrahampac huahua huahuacunami canchic” ninchari, ñucapish chaillatacmi cani.

²³ Paicunaca “Cristota serviccunami canchic” ninchari, ñucapish paicunamanta yalli alli servicmi cani. Caitaca yuyai illac shinami rimani. Paicunamanta yallimi ñucaca trabajarcani. Paicunamanta yallimi carcelpi carcani. Paicunamanta yallimi macashca carcani. Shinallatac tauca cutinmi huañunallapish carcani.

²⁴ Israelcunaca pichca cutinmi quimsa chunga iscunhuan azotircacuna.

²⁵ Quimsa cutinmi caspihuan macarcacuna. Shuc cutinca rumihuan shitashpami macarcacuna. Quimsa cutinmi barcopi ricushpa, barcondi yacupi ucuyarcani. Shinallatac shuc punzha, shuc tutami yacupi aguarinalla carcani.

²⁶ Tauca cutinmi ñucaca ñancunapipish, yacupipish huañuna manchai, shuhuana manchai, ñuca llacta gentecunamantapish, caru llacta gentecunamantapish manchai carcani. Pueblocunapipish, shitashca pambacunapipish, mama cuchapipish manchaimi carcani. “Criccunami canchic” nishpa, llullashpa puriccunamantapish manchaimi purircani.

²⁷ Quiquin maquihuanmi shaicucta trabajarcani. Tauca cutinmi mana sueñushpa pacarircani. Yarcaihuanpish, yacunayaihuanpish carcanimi. Tauca cutinmi mana micurcani. Chirimantapish, churana illaimantapish llaquitami aparcani.

²⁸ Cai llaquicunahuan cashca jahuapish punzhantami tucui tandanacushca criccunata yuyarishpa, llaquita apacuni.

²⁹ Maijan ungucpica, ñucapish ungunimi. Maijanta pandachishpa urmachicpica, piñarishpami llaquirini.

³⁰ Imamanta jatun tucuna cacpica, imata mana ruhuaipac shina cashcamantami jatun tucusha.

³¹ Huiñaita “allimari cangui” nina, Apunchic Jesuspac Diosllami, ñuca cashcatatac nicuctaca yachan.

³² Damasco pueblopi ñuca cacpica, jatun mandac Aretas churashca mandacmi, japingapac chai llucshina pungucunapi soldadocunata churarca.

³³ Shina cacpipish jatun tazapi ñucata churashpami, pueblota jarcacuc pirca ventanamanta urai cacharircacuna. Chashnami chai mandacpac maquimantaca atircani.