1 TIMOTEO 5 - Dios Rimashcata Quillcashcami

Criccunapura ima shina causanamanta

¹ Ñaupa huiñai taitacunata rimashpaca, ama sinchita rimanguichu, ashtahuanpish quiquin taitata shina cunangui. Quipa huiñaicunataca, quiquin huauquita shina rimangui.

² Ñaupa huiñai mamacunatapish quiquin mamata shina, quipa huiñai solteracunataca quiquin panita shina chuya shunguhuan rimangui.

³ Imata mana charic viuda huarmicunamanca ayudangui.

⁴ Ashtahuanpish maijan viuda huahuacunata, nietocunata charicpica, paicunarac ima shina taita mama huiñachishcata yuyarishpa, mamata ayudachun yachachingui. Chaimi alli, shinallatac Diostapish cushichinmi.

⁵ Imata mana charic viudaca Diospi shunguta churashpami, “paica cungallami” nishpa punzhapish, tutapish mañacunlla.

⁶ Ashtahuanpish quiquin munaita ruhuashpa causac viudaca, causacushpapish huañushca shinami can.

⁷ Paicunata shuccuna ama juchanchichunmi, caicunata yachachishpa mandachun nini.

⁸ Maijanpish quiquin familiata, ashtahuancarin quiquin huasi ucupi caccunata mana llaquicca, crishcata saquishcami, shinallatac Jesusta mana ricsictapish yallimi can.

⁹ Viudacunapac quillcanapica, shuc cusallahuan causashca sucta chunga yalli huatata charic viudacunapac shuticunallata quillcangui.

¹⁰ Paicunaca huahuacunata alli huiñachishca, huasiman shamuccunatapish alli chasquic, llaquilla causaccunata cushichic, criccunapac chaquita jahuac, shinallatac imatapish allita ruhuashcacunami cana can.

¹¹ Huambrarac viudacunataca, viudacunapac quillcanapica ama quillcanguichu. Paicunaca mana alli yuyaicuna shamucpi Cristopacta ruhuanata saquishpami cutin cazarasha ningacuna.

¹² Chashna cazarashpaca, paicuna Cristopacta ruhuanata mana pactachishcamantami llaquiman ringacuna.

¹³ Shinallatac huasi huasi purishpami, yanga siriccuna tucun. Chashnallapish mana canchu, ashtahuanpish huashalla parlaccuna, tucuipi satirishpa manapish cashcata parlaccunami tucuncuna.

¹⁴ Chaimantami huambrarac viudacunataca cazarashpa, huahuacunata charishpa, quiquin huasipi sumacta pushashpa causachun nini. Chashna cacpimi, criccunata piñaccunaca mana juchanchingacuna.

¹⁵ Ñami maijancunaca Cristota catinata saquishpa, Satanasta catishcacuna.

¹⁶ Tandanacushca criccunaman ama yallimana ayudana cachunca, criccunapac familiapi viuda tiyacpica, paicunaracmi ayudana can. Chaipimi, tandanacushca criccunamanca imatapish mana charic viudacunallaman ayudana tucunga.

¹⁷ Tandanacushca criccunata allita pushaccunaca, ashtahuancarin alli huillaita huillaccuna, yachachiccunami tucuimanta yallita japina can.

¹⁸ Dios quillcachishcapica: «Trillac huagrataca pacta shimita huatanguiman» ninmi. Shinallatac: «Imata ruhuashcamantaca, japinata charinmi» ninmi.

¹⁹ Tandanacushca criccunata pushactaca ama imata juchanchinguichu, ashtahuanpish ishcai, quimsa huillaccuna tiyacpica juchanchingui.

²⁰ Juchata ruhuashpa caticcunataca, tucuipac ñaupapi rimangui. Chashna ruhuacpimi, shuccunapish manchangacuna.

²¹ Diospac, Quishpichic Jesucristopac, shinallatac Diospac acllashca angelcunapac ñaupapimi, pimanpish mana tucushpa, imapish cashcallata ruhuachun nishpa caicunataca mingani.

²² Diospacta ruhuac cachun manarac alli yuyarishpaca maijanpac umapipish ama utca maquita churaichu. Pacta shuccunapac juchapi chapuringuiman. Tucui mana allimanta huacaichiringui.

²³ Huicsa, shinallatac shuctac nanaicunahuan ama ungushcalla canguica, ama yacullata ubiachu, asha vinotapish ubiai.

²⁴ Maijancunapac juchaca manapish pi tapucpimi ricurinlla. Cutin maijancunapacca quipatami ricurin.

²⁵ Chashnallatacmi imapish allita ruhuashcacunaca tigrai ricurin. Mana tigrai ricurishpapish, quipatami ricuringa. Pacallaca mana saquiringachu.