1 TIMOTEO 3 - Dios Rimashcata Quillcashcami

Criccunata pushaccuna ima shina canamanta

¹ Maijanpish tandanacushca criccunata pushac casha nishpaca, alli ruhuanatami yuyan. Cai rimashcaca chashnatacmi can.

² Ashtahuanpish tandanacushca criccunata pushacca, pi mana juchanchishca alli causac, shuc huarmiyuclla, alli yuyaita charic, alli nishca, huasiman chayaccunatapish alli chasquic, yachachinatapish alli yachachic,

³ mana machac, piñanacunatapish mana munac, cullquita charingaraicu ima mana allitac mana ruhuac, chaipac randica pitapish llaquic, ima piñanacui tiyacpipish allichic,

⁴ paipac huasipipish allita pushashpa causac, huahuacunatapish alli cazuchic, alli canata yachachicmi cana can.

⁵ Maijanpish quiquin huasipi mana alli pushashpaca, ¿ima shinatac Diospaclla tandanacushca criccunataca pushangayari?

⁶ Chai pushacca unai cricmi cana can. Pacta jatun tucushpa diablo urmashca shina llaquichishca cangapac urmanman.

⁷ Ima llaquipi, supaipac ima pandachinapi ama urmangapacca, tucui gentecunapac alli nishcami cana can.

Criccunata ayudaccuna ima shina canamanta

⁸ Shinallatac criccunata ayudaccunaca, mana machac, mana llullac, cullquita japingaraicu ima mana allitac mana ruhuac, tucui gentecunapacpish alli nishcami cana can.

⁹ Alli huillaita yachachishcacunataca, chashnatac cashcata crishpa chuya yuyaihuan caticmi cana can.

¹⁰ Shinallatac criccunata ayudaccuna cachun manarac churashpami, paicuna ima shina cactarac ricuna can. Chaipi pi mana juchanchicpimi criccunata ayudac cachunca churana can.

¹¹ Shinallatac huarmicunapish tucuipac alli nishca, mana huashalla parlac, alli yuyaita charic, imapipish allita ruhuaccunami cana can.

¹² Criccunata ayudaccunaca shuc huarmiyuclla, huahuacunatapish, huasi ucupuratapish allita yachachicmi cana can.

¹³ Criccunata ayudaccuna chashna allita ruhuashpaca, alli nishcami cangacuna. Apunchic Jesusta crinamantapish mana manchashpami huillangacuna.

Ñucanchic crishcaca tucuimanta yalli alli cashcamanta

¹⁴ Canta ñalla ricugrina yuyailla cashpapish, caitami quillcashpa cachani.

¹⁵ Ñuca unaiyacpipish, canca Diospac huasipi ima shina cana cashcata yachachunmi munani. Tandanacushca criccunaca, cashcata nic, pilar shina causac Diospac tandanacushcacunami can.

¹⁶ Ñucanchic crishcaca, tucuimanta yalli jatunmi can: Diosca aichayuc tucushpami ricurirca. Paipac Espiritupica tucuitami misharca. Paitaca angelcunami ricurca. Mana israelcunamanpish huillashcami carca. Cai pachapipish crircacunami. Jahua pachapipish alli nishpami chasquishca carca.