1 TIMOTEO 2 - Dios Rimashcata Quillcashcami

Ima shina Diosta mañanamanta

¹ Tucuimanta yallica cancuna Diosta mañacushpa, Dios-huan parlacushpa, Diosta rogacushpa, imamanta pagui nicushpaca, tucui gentecunamanta,

² jatun mandaccunamanta, llactatac mandaccunamanta, ñucanchic sumacta apanacushpa cangapacca, Diosta mañashpa causachunmi munani. Shina mañashpami Diosta cazushpa, imapipish alli nishca cashun.

³ Chashna mañashpami allita ruhuanchic, shinallatac ñucanchicta Quishpichic Diostapish cushichinchic.

⁴ Paica quishpirinamanta alli huillaica chashnatac cashcata yachac chayashpa, tucui gentecuna quishpirichunmi munan.

⁵ Shuclla Diosmi tiyan. Dios-huan gentecunahuan alli tucuchicpish, shucllami tiyan. Paica runa tucungapac shamushca Jesucristomi.

⁶ Tucui gentecunata quishpichingapac, paillatac japi tucushpa huañushpami, Dios munashca punzhacuna pactacpica, quishpichic cashcata ricuchirca.

⁷ Tucui caicunata mana israelcunaman crinamanta cashcata nic alli huillaita huillashpa yachachichunmi, Jesusca ñucata acllarca. Ñucaca mana llullashpami, chashnatac cashcata nini.

⁸ Jesusta cric caricunaca, maipi cashpapish mana piñarishpa, mana piñanacushpa, jahuaman maquita chutashpa alli shunguhuan Diosta mañachunmi munani.

⁹ Shinallatac huarmicuna churarishpapish, churana cashca shina churarichun. Umata huatallishpapish ama yallita allichirishpa curimanta, perlasmanta ruhuashcacunahuan shinallatac yalli valic churanacunahuanpish ama allichirichunmi munani.

¹⁰ Chaipac randica Diosta cazuc huarmicuna ruhuana cashca shina, imapish allicunallata ruhuachun ninimi.

¹¹ Huarmica yachachiccunata cazushpa, upalla uyashpa yachacuchunmi nini.

¹² Caricunata mandashpa, tandanacuipi yachachichunca mana munanichu, ashtahuanpish upalla cachunmi nini.

¹³ Diosca Adantaracmi ruhuarca. Quipatami Evataca ruhuarca.

¹⁴ Shinallatac mana Adanchu pandachishcaca carca, ashtahuanpish Evami diablo pandachicpi, Dios mandashcata mana cazushpa juchapi urmarca.

¹⁵ Shina cashpapish huahuacunata charic huarmica alli cric cashpa, cuyashpa, alli yuyaihuan, Diospaclla causashpaca quishpiringami.