1 TIMOTEO 1 - Dios Rimashcata Quillcashcami

Timoteoman Pablo quillcashcamanta

¹ Ñucanchicta Quishpichic Dios, shinallatac Apunchic Jesucristo mandashcamanta, ñucanchic shunguta churashpa shuyana Apunchic Jesucristo acllashca apóstol Pablomi,

² Jesusta crishcamanta ñucapac quiquin huahua shina cac Timoteoman quillcashpa cachani. Ñucanchic Diospish, Apunchic Jesucristopish sumaimana cuyaihuan llaquishpa, canman sumac causaita cushca cachun ninimi.

Pandata yachachiccunata mana crina cashcamanta

³ Macedonia llactaman ñuca rishpaca, Efeso pueblopi can saquirishpa, chaipi pandata yachachiccuna ama yachachishpa catichun,

⁴ shinallatac yanga parlocunata, mana yupaipac ñaupa taitacunapac shuticunata ama uyashpa catichunmi cantaca jarcachun mañarcani. Tucui chaicunaca piñanacuipi churashpami, Dios quishpichisha nicushca crinataca jarcan.

⁵ Caita mandashpaca, chuya shunguhuan, chuya yuyaihuan, mana nic tucushpalla crishpa, caishuc chaishuc-huan cuyanacuchunmi nini.

⁶ Maijancunaca caicunata saquishpami, yanga parlocunata parlashpa pandaricuncuna.

⁷ Paicunaca imata yachachicushcatapish, imata nicushcatapish mana entendincunachu. Shina cashca jahuami, Dios mandashcacunata yachachiccuna canata munancuna.

⁸ Mandashcapi ima nicushcata allita yachashpa yachachicpica, mandashcacunaca alli cashcatami yachanchic.

⁹ Mandashcaca cashcata ruhuaccunata llaquichichunca mana canchu, ashtahuanpish millaita ruhuaccunata, mana cazuccunata, sinchi shungucunata, juchalliccunata, mana alli niccunata, burlaccunata, taita mamatapish shuccunatapish huañuchiccunata,

¹⁰ huaclliriccunata, caripura huarmipura chayariccunata, genteta shuhuaccunata, llullaccunata, llullashpapish mana llullanichu niccunata, shinallatac tucui alli yachachishcacunata mana cazuccunata llaquichichunmi can.

¹¹ Cai alli yachaicunataca quishpirinamanta sumac alli huillaimi yachachin. Chaita huillachunmi, tucui mashna alli nina Diosca ñucaman mingarca.

Dios llaquishcata yuyarishpa, Pablo pagui nishcamanta

¹² Ñucata sinchiyachishcamanta, ñuca paita cazuc cashcata yachashpa paita servichun churashcamantami, ñucanchic Apunchic Jesucristotaca pagui nicunilla.

¹³ Ñaupaca criccunata llaquichishpa, Jesusta piñashpa camicmi carcani. Shina cacpipish manarac cric cashpa, imata ruhuacushcata mana yachashcamantami, Diosca ñucata llaquirca.

¹⁴ Ñucanchic Apunchic Jesucristohuan shuclla tucucpica, cuyaitapish, crina yuyaitapish, ñucata yallita cuyashcamantami Apunchic Jesucristoca curca.

¹⁵ Jesucristoca juchayuccunata quishpichingapacca cai pachamanmi shamurca. Cai huillashcaca chashnatac cashcamantami tucui mashna crina canchic. Juchayuccunamanta nishpaca, ñucami punta yalli juchayucca cani.

¹⁶ Jesucristo llaquic cashcata ricuchunmi, yallita ñuca juchayuc cacpipish, Diosca ñucata llaquirca. Chashnami maijanpish Jesusta crishpa huiñai causaita japina cashcata ricuchingapac ñucataca acllarca.

¹⁷ ¡Chaimanta huiñaita causacuc Jatun Mandac, jaicapi mana chingaric, pipish mana ricushca, shuclla Diostaca, huiñai huiñaita “allimari cangui, sumacmari cangui” nishunchicyari! Chashna cachun.

¹⁸ Cuyashca ñuca huahua shina Timoteo, utcaman Diosmanta huillaccuna canmanta huillashca shinallatacmi, alli soldado shina Diospacta ruhuachun nishpa canmanca cai mandashcata mingani:

¹⁹ Cambac yuyai ama juchanchishca cachunca, crishcata alli huacaichingui. Maijancunaca quiquin yuyaipi mana jarcarishpami, yacupi aguaric shina crishcata saquishpa, llaqui tucurcacuna.

²⁰ Chaicunaca Himeneo shinallatac Alejandromi chashna tucurcacuna. Paicunatami Diosta ama camishpa catichun nishpa, Satanasman curcani.