1 TESALONICENSES 5 - Dios Rimashcata Quillcashcami

¹ Cuyashca criccuna, Apunchic Jesús ima huata, ima punzha cutimuna cashcataca, mana quillcanachu cani.

² Cancunallatac Apunchic Jesús shuc shuhuac tuta shamuc shina, mana yuyashca horas cutimuna cashcataca, alli yachanguichicmi.

³ Gentecunaca: «Cushillami sumacta causacunchic» nicucpica, jatun llaquica shuc huarmita sajuarina nanai japic shinami cungailla japinga. Chai llaquimantaca pipish mana quishpiringachu.

⁴ Chaimanta Apunchic Jesús shuhuac shina shamushpaca, mana manchachingachu.

⁵ Tucui cancunami achic punzhapac canguichic. Mana amsapacchu, mana tutapacchu canguichic.

⁶ Chaimanta mana caishuccuna shina sueñunachu canchic. Ashtahuanpish riccharishca shina chaparanami canchic.

⁷ Maijanpish sueñucca tutami sueñun, maijanpish machacca tutami machan.

⁸ Ashtahuanpish ñucanchicca punzhapac cashcamantaca, alli yuyaihuanmi catina canchic. Fierro churanata churaric shinaca, Apunchic Jesusta crishpa, cuyaihuan causanami canchic. Umapi fierro cascota churaric shinaca, quishpirina yuyaihuanmi shuyana canchic.

⁹ Dios ñucanchicta acllashpaca, mana piñarishpa llaquichingapacchu acllarca. Ashtahuanpish chaipac randica, ñucanchic Apunchic Jesusmanta quishpirichunmi acllarca.

¹⁰ Causacushpapish, huañushpapish paihuan pacta cachunmi, Jesucristoca ñucanchicmanta huañurca.

¹¹ Chaimanta ima shinami cunan cancuna caticuc shinallatac, caishuc chaishuc-huan alli catina yuyaita cunacushpa, ayudanacushpa causaichic.

Criccunata Pablo cunashcamanta

¹² Cuyashca criccuna, cancunapurapi Apunchic Jesusta serviccunata, cunashpa yachachiccunata alli cazunguichic.

¹³ Paicuna allita ruhuacushcamantaca, cuyashpa alli ninami canguichic. Shinallatac caishuc, chaishuc-huanmi cushilla causanguichic.

¹⁴ Shinallatac cuyashca criccuna, chai quilla runacunatapish rimaichic, llaquilla caccunataca cushichichic, manarac sinchi criccunatapish yachachichic. Shinallatac tucuihuan sumacta caichic.

¹⁵ Shuccuna cancunata ima mana allita ruhuacpica, cancunapish ama chashnallatac ruhuaichicchu. Chaipac randica punzhanta cancunapurapipish, tucui gentecunahuanpish allita ruhuaichic.

¹⁶ Punzhanta cushilla caichic.

¹⁷ Punzhanta Diosta mañaichic.

¹⁸ Tucui imamantapish Diostaca pagui nicuichiclla. Jesucristota criccunataca chashna ruhuachunmi Diosca munan.

¹⁹ Diospac Espiritutaca ama chiriyachichicchu.

²⁰ Dios ima nishcata huillactaca chasquinami canguichic.

²¹ Tucuita allita ricushpa, allitaca huacaichishpa causaichic.

²² Tucui mana allimanta huacaichirichic.

²³ Cushi causaita cuc Diosllatac cancunapac espiritutapish, almatapish, cuerpotapish Apunchic Jesús cutimuna punzhapacca jucha illac, pi mana juchanchipacta ruhuashpa huacaichichun.

²⁴ Cancunata cayac Diosca imatapish pactachic cashcamantami, tucui caicunatapish pactachinga.

Ña tucuchingapac allilla cashca cachun nishcamanta

²⁵ Cuyashca criccuna, ñucanchicmanta Diosta mañaichic.

²⁶ Tucui criccuna muchashpa caishuc chaishuc saludanacuichic.

²⁷ Apunchic Jesuspac shutipimi, cai quillcataca tucui criccunapac ñaupapi rezachun nini.

²⁸ Ñucanchic Apunchic Jesucristopac cuyai tucui cancunahuan cachunmi ninchic.