1 TESALONICENSES 4 - Dios Rimashcata Quillcashcami

Dios munashca shina causanamanta

¹ Cuyashca criccuna, ñucanchic yachachishca shina Dios munashcata ruhuashpa causaichic. Shinallatac punzhanta Dios munashca shina causachunmi Apunchic Jesuspac shutipi mañanchic.

² Apunchic Jesús mandacpi, ñucanchic cancunata yachachishcataca ña yachanguichicmi.

³ Diosca jucha illac causachunmi munan. Ama huainayachun,

⁴ tucui mashna quiquin huarmillahuan causashpa, mapa illac cachun,

⁵ Diosta mana cazuccuna shina mapa yuyaicunallahuan ama causachunmi munan.

⁶ Pacta chashna mana allita ruhuashpa, maijan huauquita umashpa mana allita ruhuanguichicman. Chashna ruhuaccunataca tucuitami Apunchic Jesusca llaquichinga.

⁷ Diosca mana millaita ruhuashpa causachunchu acllarca, ashtahuanpish jucha illac causachunmi acllarca.

⁸ Chaimanta pipish cai yachachishcacunata mana chasquicca, mana runallatachu mana chasquin, ashtahuanpish paipac Espirituta cuc Diostami mana chasquin.

⁹ Diosllatacmi caishuc-huan chaishuc-huan cuyanacunataca ña yachachishca, chaimantami ña mana ashtahuan cuyanacunamantaca quillcana canchic.

¹⁰ Chashnami Macedonia llacta tucui criccunahuan cuyanacushpa causanguichic. Shina cacpipish, cuyashca criccuna, ashtahuan cuyanacushpa causachunmi mañanchic.

¹¹ Ñucanchic cancunata mandashca shinallatac, quiquin maquihuan imatapish ruhuashpa, tucuihuan sumacta causanata yuyaichic.

¹² Chashna ruhuashpa causashpami, imapish mana illaclla, shinallatac mana criccunapacpish alli nishca causanguichic.

Apunchic Jesús cutimunamanta

¹³ Cuyashca criccuna, huañushcacuna causarinata mana criccuna shina ama llaquilla cachunmi, huañushcacuna ima tucuna cashcata yachachun munanchic.

¹⁴ Apunchic Jesús huañushca cashpapish causarishcata crishpaca, Apunchic Jesusta shuyashpa huañushcacunata Jesus-huan Dios-huan causachina cashcatami crinchic.

¹⁵ Apunchic Jesús mandashca shinami pai cutimungacaman, ñucanchic causaccunaca huañushcacunata ñaupashpa, mana jahua pachaman rishun.

¹⁶ Mandac Dios caparishcapish, angelcunata mandac ángel caparishcapish, shinallatac Diospac trompeta tocashcapish uyaringami. Chashna uyaricpica, Apunchic Jesusllatacmi jahua pachamanta shamunga. Chashna tucucpica, maijanpish Apunchic Jesusta crishpa huañuccunaracmi causaringa.

¹⁷ Chai quipaca, ñucanchic causacuccunaca causarishcacunandimi Apunchic Jesus-huan jahua pachapi tupangapac puyupi apashca cashun. Chashnami Apunchic Jesus-huan huiñaita causashun.

¹⁸ Chaimanta cai rimashcacunahuan caishuc chaishuc cushichinacuichic.