1 TESALONICENSES 2 - Dios Rimashcata Quillcashcami

Tesalónica pueblopi Pablo imallata ruhuashcamanta

¹ Cuyashca criccuna, ñucanchic cancunapacman rishcaca, mana yanga cashcataca cancunallatac yachanguichicmi.

² Filipos pueblopi ñucanchic camishca, llaquichishca cashcatapish yachanguichicmi. Chashna llaquihuan cacpipish, alli huillaita huillachun Diosllatac sinchiyachishcatapish yachanguichicmi.

³ Alli huillaita huillashpaca mana pandatachu, mana pita umangaraicuchu huillarcanchic.

⁴ Ashtahuanpish Diosllatacmi alli nishpa, alli huillaita huillachun ñucanchicman mingarca. Chai shina huillashpaca, mana gentecunatachu cushichishun ninchic, ashtahuanpish ñucanchic shungu imata yuyacushcata yachac Diostamari cushichishun ninchic.

⁵ Chaica ñucanchic huillashpaca, mishqui shimicunahuan mana huillashcanchicchu. Mana jatun tucungaraicu, mana cullquita japingaraicu huillashcanchicchu. Chaitaca cancunapish yachanguichicmi, Diospish yachanmi.

⁶ Cancunapac, shuccunapac pipac ñaupapipish mana alli nishca gentecuna shina ricurishun nircanchicchu.

⁷ Ñucanchic Jesuspac apostolcuna cashcamantaca, cancunata mandanchicmanmi carcanchic. Shina cashpapish cuyac shunguhuanmi cancunahuanca carcanchic. Shuc mama huahuacunata cuidashpa charic shinami cancunataca yallita cuyanchic.

⁸ Cancunataca yallitami cuyanchic. Chaimantami quishpirinamanta alli huillaita huillashpapish mana cushicunchic, ñucanchic causaita cuna cacpipish cunchicmanmi.

⁹ Ñucanchic micungapacca yallita shaicushpami trabajarcanchic. Alli huillaita huillacushpaca, cancunamanta imata mañashpa mana llaquichingapacmi tutapish, punzhapish trabajarcanchic. Chaitaca cancunallatac yachanguichicmi

¹⁰ Ñucanchicca cancunahuan cashpaca, jucha illac, cashcata ruhuac, pipish mana juchanchipacmi carcanchic. Chaitaca cancunapish yachanguichicmi, shinallatac Diospish yachanmi.

¹¹ Shuc taita huahuacunata yachachic shinami, ñucanchicca cancunataca caishucta chaishucta cunarcanchic, cushichircanchic. Chaitaca cancunallatac yachanguichicmi.

¹² Shinallatac Diospac huahuacuna shina causachunmi yachachircanchic. Cancunataca Diosllatacmi paihuan mandachun, alli nishca cachun acllarca.

¹³ Ñucanchic Diospac shimita huillacpi, cancuna mana gentecunalla huillashcata yuyashpa, ashtahuanpish Diosmantatac cashcata yuyashpa chasquishcamantami punzhanta Diostaca pagui nicunchiclla. Chai rimashca cancunata shuctacyachicpimi, sumacta causacunguichic.

¹⁴ Cancuna Jesusta criccunaca Judea llacta Jesusta cric Diospaclla tandanacushca criccuna shinallatacmi quiquin llacta gentecuna llaquichishca canguichic.

¹⁵ Diosmanta ñaupa huillaccunatapish, Apunchic Jesustapish, israelcunaca huañuchircacunami. Cutin ñucanchictaca piñashpami llucchishpa cacharca. Chashnaca Diostapish piñancunami.

¹⁶ Mana israelcuna quishpirichun, ñucanchic huillashun nicpipish mana saquinchu. Chashnami ashtahuan juchayuc tucuncuna. Chaimantami Diosca yallita piñarishpa llaquichinga.

Tesalónica criccunata Pablo cutin ricugrisha nishcamanta

¹⁷ Cuyashca criccuna, cancunamanta asha punzhacunata caruyashpapish, cancuna yuyailla cashpami, cancunata ricugrina yuyailla carcanchic.

¹⁸ Ricuc shamushun nishpapish mana pudircanchicchu. Ñucaca tauca cutinmi ricuc shamusha nircani. Shina cacpipish Satanasca jarcarcami.

¹⁹ Apunchic Jesús cutimui punzhapi, paipac ñaupapica, ¿pimantatac cushicushun? ¿Pimantatac alli nishca cashun? Shinallatac ¿pimantatac cushicushpa shuyacushcata japishun? Chaitaca cancunamantami japishun.

²⁰ Ari, cancunamantami ñucanchicca cushicushun, shinallatac alli nishca cashun.