1 SAMUEL 8 - Dios Rimashcata Quillcashcami

Jatun mandacta churachun nishpa israelcuna mañashcamanta

¹ Samuelca ña yuyac cashpami israelcunapac juezcuna cachunca paipac churicunata churarca.

² Paipac punta churica Joelmi carca. Quipa churica Abiasmi carca. Paicunami Beerseba pueblopi juezcuna carca.

³ Ashtahuanpish churicunaca paicunapac taita shinaca mana causarcacunachu. Paicunaca charicyangaraicu cullquita pacalla japishpami cashcataca mana ruhuarcacuna.

⁴ Chaimantami israelcunata mandac yuyaccunaca tucui tandanacushpa Samuelman parlangapac Ramá puebloman rirca.

⁵ Chaipimi: —Riqui, canca ñami yuyac cangui, cambac churicunaca mana can shina mandacuncunachu. Chaimanta cunanca tucui llactacuna shinallatac ñucanchicpish juezta charingapac, jatun mandacta churaiyari— nirca.

⁶ Paicuna: «Ñucanchicpac juez cachun shuc jatun mandacta churaiyari» nishpa mañacpimi, Samuelca yallita llaquirirca. Chaimantami Samuelca Mandac Diosta mañarca.

⁷ Mandac Diosca: «Israelcuna imata mañashcataca ruhuailla. Paicunaca mana cantachu mana valichincuna, ashtahuanpish ñucatami yangapi churashpa, paicunata ama ashtahuan ñuca mandachun shuc mandacta charishun nincuna.

⁸ Paicunaca Egiptomanta ñuca llucchimushca punzhamanta cunan punzhacamanmi shuctac dioscunata servishpa ñucata mana cazuncuna. Chashnallatacmi canhuanpish ruhuancuna.

⁹ Cunanca paicuna ima mañashcata ruhuailla. Ashtahuanpish shuc jatun mandac yaicushpa paicunata ima shina mandashpa charina cashcata allita yapachishpa huillangui» nirca.

¹⁰ Samuelca jatun mandacta churai nishpa mañac gentecunamanca Mandac Dios ima nishcatami tucui huillarca.

¹¹ Paica: —Caita alli yuyarichic. Cancunata jatun mandacca cancunapac churicunata apashpami macanacuna carretacunapi, caballocunapi tiyachishpa paipac carretapac ñaupata richun churanga. Maijancunataca paicunata cuidac cachunmi churanga.

¹² Shuccunataca huaranga soldadocunata mandachun, shuccunataca pichca chunga soldadocunata mandachunmi churanga. Shinallatac shuctaca paipac allpacunapi yapushpa tarpuchun, chai chagracunatapish tandachichunmi churanga. Shuccunataca macanacunata ruhuachunpish, carretacunapi ima minishtishcacunata ruhuachunpish churangami.

¹³ Cancunapac ushicunatapish maijancunataca mishquilla ashnacuc jambicunata ruhuachun, shuccunataca yanuchun, shuccunataca tandata ruhuaccuna cachunmi churanga.

¹⁴ Shinallatac cancunapac ashtahuan alli uvascunata pucuc, alli olivos yuracuna pucuc allpacunata quichushpami paita serviccunaman cunga.

¹⁵ Cancunapac huagracunatapish, uvascunatapish chungamanta shucta japishpami, pai churashca mandaccunaman, paita serviccunaman cunga.

¹⁶ Paita servishpa imatapish ruhuachingapacmi, cancunata servic caricunatapish, huarmicunatapish, alli huagracunatapish, burrocunatapish paipacta ruhuachun quichushpa apanga.

¹⁷ Cancunapac ovejacunatapish, chungamanta shuctami japinga. Cancunapish paita servishpami causanguichic.

¹⁸ Cancunallatac acllashca jatun mandac llaquichicuc punzhacunapi caparishpa mañacpipish, Mandac Diosca mana uyangachu— nirca.

¹⁹ Ashtahuanpish gentecunaca Samuel chashna nicpipish mana uyashpami: —Ima cachunpish jatun mandacta charinatami munanchic.

²⁰ Chashna cacpica, ñucanchicpish shuctac llactacuna shinami cashun. Ñucanchictaca jatun mandacmi mandanga. Paimi ñucanchic ñaupata rishpa, ñucanchicpac jatun macanacuitapish ruhuanga— nirca.

²¹ Israelcuna tucui ima nishcata uyashpami Samuelca Mandac Diosman tucui huillarca.

²² Shina huillacpimi Mandac Diosca Samueltaca: —Paicuna nishcata uyashpa jatun mandacta churailla— nirca. Shina nicpimi, Samuelca Israelcunataca: —Cancuna causana pueblocunaman cutichiclla— nishpa cacharca.