1 SAMUEL 7 - Dios Rimashcata Quillcashcami

¹ Quiriat-jearim pueblopi causaccuna shamushpami, Diospac Arcata apashpa shuc lomapi cac Abinadabpac huasipi churarca. Mandac Diospac Arcata cuidashpa causachunca Abinadabpac churi Eliazartami Diospaclla cachun acllarca.

Israelcuna Samuelta pushac cachun acllashcamanta

² Diospac Arca Quiriat-jearim puebloman chayamushcaca ñami unai huatacuna carca. Ishcai chunga huatami tucurca. Chaipimi tucui israelcunaca huacashpa Mandac Diosta mashcarca.

³ Chaimantami Samuelca israelcunataca: —Mandac Diosman tucui shunguhuan cutirishpaca ruhuashcalla shuctac dioscunata, Astarot huarmi diostapish cancunamanta anchuchinguichic. Chai quipaca shungumanta allichirishpa Mandac Diosllatac servishpa causanguichic. Chashna causacpimi, filisteocunapac maquimantaca cacharichinga— nirca.

⁴ Shina nicpimi, israelcunaca Baal, Astarot dioscunata anchuchishpa, Mandac Diosllatac servirca.

⁵ Shina cacpimi Samuelca: —Israelcunata Mizpa pueblopi tandanacuchun mandaichic. Ñucami cancunamanta Mandac Diosta mañasha— nirca.

⁶ Israelcunaca Mizpa pueblopi tandanacushpami yacuta llucchishpa, Mandac Diospac ñaupapi tallirca. Chai punzhami ayunashpa: «Juchata ruhuashpami Mandac Diostaca llaquichishcanchic» nirca. Samuelca israelcuna piñanacushcamantaca Mizpa pueblopimi allichirca.

⁷ Israelcuna Mizpa pueblopi tandanacushcata filisteocunata mandaccuna yachashpami israelcunahuan macanacungapac shamurca. Israelcuna chaita uyashpaca yallitami mancharca.

⁸ Chaimantami israelcunaca Samueltaca: «Filisteocunapac maquimanta ñucanchicta huacaichichunca Mandac Diosta ñucanchicmanta mañanataca ama saquinguichu» nirca.

⁹ Shina nicpimi, Samuelca chuchucuc huahua ovejata japishpa, Mandac Diosman cushpa, tucui rupachirca. Shina ruhuashpa Mandac Diosta tucui israelcunamanta mañacpica, Diosca uyarcami.

¹⁰ Mandac Diosman cushca ovejata Samuel tucui rupachicucpimi, filisteocunaca israelcunahuan macanacungapac chayarca. Ashtahuanpish Mandac Diosca sinchita tulun nichishpami filisteocunataca manchachishpa muspachirca. Chashna ruhuacpimi, israelcunaca filisteocunata atirca.

¹¹ Israelcunaca Mizpa pueblomanta llucshishpami filisteocunataca Bet-car pueblo ura ladocaman catishpa huañuchirca.

¹² Chai quipami Samuelca shuc jatun rumita japishpa, Mizpa pueblohuan Sen pueblohuan tupanacui chaupipi churashpaca: «¡Mandac Diosca caicamanmi ñucanchictaca ayudashca!» nishpa, Eben-ezerta shutichirca.

¹³ Chashna israelcuna filisteocunata mishashpa llaquichicpimi, Israel llactamanca mana cutin yaicui pudirca. Mandac Diospac maquica Samuel tucui causacui punzhacunami filisteocunataca llaquichirca.

¹⁴ Filisteocuna macanacushpa israelcunamanta quichushca pueblocunaca Ecrón pueblomanta Gat pueblocamanmi carca. Chai pueblocunatami israelcunaca filisteocunahuan macanacushpa atishpa cutin japirca. Amorreocunahuanpish sumactami causarcacuna.

¹⁵ Samuelca tucui paipac causaipimi israelcunataca mandacurca.

¹⁶ Paica huatantami Bet-el, Gilgal, Mizpa pueblocunapi israelcunapurapi ima tiyashcata allichingapac ric carca.

¹⁷ Chai quipaca Ramá pueblopi cac paipac huasimanmi cutic carca. Paica chai pueblopipish tucui israelcunata mandashpami causarca. Chai pueblollapitacmi Mandac Diosman shuc altartapish ruhuarca.