1 SAMUEL 6 - Dios Rimashcata Quillcashcami

Filisteocuna Arcata cutichishcamanta

¹ Mandac Diospac Arcaca canchis quillatami filisteocunapac llactapi carca.

² Filisteocunaca curacunatapish, yachaccunatapish cayashpaca: —¿Mandac Diospac Arcataca imatatac ruhuashun? Apamushca pushtullamantac ima shina cachanataca huillaichicyari— nirca.

³ Shina nicpimi paicunaca: —Israelcunapac Diospac Arcata saquingapac rishpaca, mana chashnallachu saquigrina canguichic. Ashtahuanpish cancunapac juchamanta imallatapish cunami canguichic. Chaita ruhuashpami chai ungüimantaca alli tucunguichic. Shinallatac cancunata llaquichinataca imamanta mana saquishcatapish yachanguichic— nirca.

⁴ Shina nicpimi filisteocunaca: —Chai juchata anchuchichunca ¿Imatatac cushunyari?— nirca. Shina tapucpimi curacunaca: —Filisteocunata mandaccuna mashna cashca shinallatac pichca curi chuputapish, pichca curi ucuchatapish saquigringuichic. Chai ungüillatacmi tucui cancunatapish, cancunata mandaccunatapish llaquichicun.

⁵ Cancunapac llactata tucuchicuc chupu shinata, ucuchacuna shinata curimanta ruhuashpa israelcunapac Diostaca allimari cangui nichic. Chashna ruhuacpica cancunatapish, cancunapac dioscunatapish, cancunapac allpacunatapish, paipac poderhuan llaquichinataca saquingapishchari.

⁶ ¿Ima nishpatac cancunapac shungutaca Egiptopi causaccuna shina, Faraón shina sinchiyachinguichic? ¿Manachu Dios llaquichicpi, israelcunataca richun saquircacuna?

⁷ Cunanca shuc mushuc carretata ruhuashpa, huahuayuc manarac yugoshca ishcai vacacunata yugoshpa carretata aisachichic. Huahua becicuna catishpa ricpica, corralpi saquinguichic.

⁸ Chai quipaca Diospac Arcata carretapi churaichic. Shinallatac cancunapac juchamanta cushca curicunataca shuc uchilla cajonpi churashpa, Diospac Arca ladopi churanguichic. Quipaca chai yugoshca vacacuna maimanpish richun saquinguichic.

⁹ Shina saquishpaca caitami alli ricuna canguichic: Carreta aisashca vacacuna Bet-semes puebloman rina ñanta Israel llactaman ricpica, Diosllatac llaquichicushcatami yachashun. Ashtahuanpish mana chai ñanta ricpica, mana paipac poderhuan llaquichicushcata, ashtahuanpish cai llaquicunaca imapish llaquicuna cashca shinatami yachashun— nirca.

¹⁰ Shina nicpimi, chai runacunaca mandashca shinallatac ruhuarca. Huahuayuc ishcai vacacunata yugoshpa carretata aisachirca. Ishcai huahua becicunataca corralpimi huichcarca.

¹¹ Chai quipaca Diospac Arcatapish, curi ucuchatapish, curi chuputapish uchilla cajonpi churashpami carretapi churarca.

¹² Chashna ruhuashca quipami, chai vacacunaca Bet-semes puebloman rina ñanta alli ladomanpish, lluqui ladomanpish mana ladoyashpa huacashpa rircacunalla. Filisteocunata mandaccunapish, Bet-semes pueblo linderocamanmi catishpa rirca.

¹³ Bet-semes pueblopi causaccunaca pugru pambapimi trigota piticurca. Chaimanta huichai chapashpaca, Arcata ricushpami, yallita cushicurcacuna.

¹⁴ Chai carreta aisashca vacacunaca Bet-semes pueblopi causac Josuepac allpaman chayashpami shuc jatun rumi ladopi shayarirca. Chaipimi paicunaca carreta caspicunataca yantata ruhuashpa, chai vacacunataca Mandac Diosman cushpa tucui rupachirca.

¹⁵ Levitacunami Mandac Diospac Arcatapish, chai ladopi tiyac curimanta ruhuashca imallacunata churashca uchilla cajontapish carretamanta uricuchishpa, chai jatun rumi jahuapi churarca. Chai punzhami Bet-semes pueblopi causaccunaca chai vacacunata huañuchishpa, Mandac Diosman cushpa tucui rupachirca. Shuctac caranacunatapish Mandac Diosman curcacunami.

¹⁶ Chashna ruhuacta filisteocunata pichca mandaccuna ricushpaca, chai punzhallatacmi Ecrón puebloman cutirca.

¹⁷ Filisteocuna paicunapac juchamanta Mandac Diosman cushca curi chupucunaca: Shuctaca Asdodmanta, shuctaca Gazamanta, shuctaca Ascalonmanta, shuctaca Gatmanta, shuctaca Ecrón pueblomantami curca.

¹⁸ Curi ucuchacunaca filisteocunapac pueblocunata pichca mandaccuna shinallatacmi pichca carca. Muyundi pircashca pueblocuna mashna tiyashca, pirca illac uchilla pueblocuna mashna tiyashca shinallatacmi carca. Mandac Diospac Arcata churashca jatun rumica Bet-semes pueblopi causac Josuepac allpapimi cunancaman tiyacun.

¹⁹ Diosca Bet-semes pueblopi causaccunataca Mandac Diospac Arcata pascashpa ricushcamantami, canchis chunga runacunata huañuchirca. Chashna achcacunata huañuchicpimi, chai pueblopi causaccunaca yallita llaquirishpa huacarca.

²⁰ Chaimantami Bet-semes pueblopi causaccunaca: «¿Pitac cai jucha illac Diospac ñaupapi shayari pudingayari? ¿Ñucanchic ladomantaca maimantac cachashunyari?» nirca.

²¹ Chaimanta Quiriat-jearim pueblopi causaccunapacman huillaccunata cachashpaca: «Mandac Diospac Arcataca filisteocunaca ñami cutichirca. Cunanca apangapac utca huichai shamuichic» nichunmi cacharca.