1 SAMUEL 31 - Dios Rimashcata Quillcashcami

Saulpish, paipac churicunapish huañushcamanta

¹ Filisteocunaca israelcunahuanmi macanacurca. Israelcunaca filisteocunapac ñaupamanta miticushpa callpacpimi, taucacunata Gilboa urcupi filisteocunaca huañuchirca.

² Filisteocunaca Saulta catishpa rishpami paipac churi Jonatanta, Abinadabta, Malquisuata huañuchirca.

³ Ashtahuanpish Saulhuan macanacushpami, flechata shitaccunaca flechahuan chugrichishpa, Saulta yallita manchachirca.

⁴ Chaimantami Saulca paipac escudota apac runataca: «Cambac espadata llucchishpa, ñucata huañuchi. Circuncisionta mana ruhuashca chai runacuna shamushpa, ñucata huañuchishpa, asichunca mana munanichu» nirca. Shina nicpi, paipac escudota apac runaca yallita manchashpami, mana huañuchisha nirca. Chaimantami Saulca paipac espadallatatac japishpa, paillata huañurca.

⁵ Chai escudota apac runa Saúl huañushcata ricushpami, paipac espadallatatac japishpa, Saulhuan pacta huañurca.

⁶ Chai punzhami Saulpish, paipac quimsa churicunapish, paipac escudota apac runapish, paihuan puric tucui gentecunapish huañurca.

⁷ Pugru pamba chimba ladopi causac, Jordán yacu chimba ladopi causac israelcunapish, Israel soldadocuna miticushpa rishcata, Saulpish, paipac churicunapish huañushcata yachac chayashpami, paicuna causacuc pueblocunata saquishpa, miticushpa rircacuna. Chaimantami filisteocunaca chai pueblocunaman shamushpa, chaipi causarcacuna.

⁸ Chai cayandi punzha filisteocuna Gilboa urcupi huañushca israelcunapac churanata surcuchingapac rishpaca, Saulpish, paipac quimsa churicunapish Gilboa urcupi huañushca siricuctami tarircacuna.

⁹ Chashna filisteocuna tarishpami, paipac umata pitishpa, paipac macanacunatapish japishpa huillaccunata tucui llactacunapi, paicunapac dioscunata yuyarina huasicunapi huillachun cacharcacuna.

¹⁰ Shinallatac Saulpac macanacunataca Astarot huarmi diospac huasipi churashpa, paipac cuerpotaca Bet-sán pueblo pirca cuchupimi huarcurcacuna.

¹¹ Galaad llactapi cac Jabes pueblopi causac filisteocuna Saulta chashna ruhuashcata yachashpami,

¹² alli sinchi runacuna tandanacushpa shamurca. Chashna tucui tuta purishpa, shamushpami Bet-sán pueblo pircapi huarcushca Saulpac cuerpotapish, paipac quimsa churicunapac cuerpotapish, uricuchishpa Jabes puebloman apashpa rupachirca.

¹³ Chai quipami paicunapac tullucunata apashpa, Jabes pueblopi cac tamarisco yura ucupi enterrarca. Chai quipaca, canchis punzhacamanmi mana micurca.