1 SAMUEL 3 - Dios Rimashcata Quillcashcami

Mandac Dios Samuelta cayashcamanta

¹ Samuel huambraca Elí curapac ñaupapimi Mandac Diospacta ruhuashpa causarca. Chai punzhacunapica Mandac Diospac rimashca shimica maijan cutinllami uyarirca. Shinallatac maijan cutinllami muscuipi shina ricuric carca.

² Shuc punzhami Elí curaca paipac ñahui mana alli ricui pudicpi pai sueñuna ucupi sueñucurca.

³ Samuelca Mandac Diospac huasipimi sueñucurca. Diospac Arcapish chai huasipimi carca. Chai huasi ucupi rupacuc Diospac lamparapish manarac huañucpimi,

⁴ Mandac Diosca Samuelta cayarca. Shina cayacpimi Samuelca: —Caipimi cani— nirca.

⁵ Shina nishpa, Elipacman callpashpa rishpaca: —Caipimi cani. ¿Imapactac cayangui?— nirca. Shina nicpimi Elica: —Ñucaca mana cayarcanichu. Sueñungapac rilla— nirca. Shina nicpimi, Samuelca cutin sueñugrirca.

⁶ Mandac Diosca cutinllatac Samuelta cayashpaca: —¡Samuel!— nirca. Shina cayacpi Samuel jatarishpa Elipacman rishpaca: —Caipimi cani. ¿Imapactac cayangui?— nirca. Shina nicpimi Elica: —Ñuca huahualla, ñucaca mana cayarcanichu. Sueñungapac rilla— nirca.

⁷ Samuelca Mandac Diostaca manarac ricsircachu. Shinallatac Mandac Diospac shimitapish manarac uyarcachu.

⁸ Mandac Diosca caihuanca ñami quimsa cutin cayarca. Samuelca Elipacman shamushpami: —Caipimi cani. ¿Imapactac cayarcangui?— nirca. Chaipimi, Elica Samuelta Mandac Dios cayacucta entendirca.

⁹ Chaimantami Elica Samueltaca: —Cutin sueñungapac rilla. Cutin cayacpica: “Mandac Dioslla, canta servic ñucaca uyacunimi, rimailla” ningui— nirca. Shina nicpi, Samuelca maipi sueñucushcallamantac rishpa sueñugrirca.

¹⁰ Mandac Dios shamushpami puntaman shinallatac: —¡Samuel, Samuel!— nishpa cayarca. Shina cayacpimi Samuelca: —Canta servic ñucaca uyacunimi, rimailla— nirca.

¹¹ Shina nicpimi, Mandac Dios Samueltaca: —Riqui, cai israelpurapica jatun mancharinatami ruhuagrini. Chashna ruhuashcata maijan uyashpaca ishcai ringritami nanachinga.

¹² Chai punzhapimi Elí curata llaquichishpa, paipac huasi ucupurata llaquichisha nishcataca callarimanta tucuricaman pactachisha.

¹³ Paipac churicuna mana allita ruhuacpi, pai mana rimashcamantami paipac huasi ucupurataca huiñaita llaquichisha. Chaitaca paica yachanmi.

¹⁴ Chaimantami Elipac huasi ucupuracuna mana allita ruhuashcataca animalta ñucaman cushpa rupachicpipish, ofrendata cucpipish, manatac perdonashachu nishpa ari nircani— nirca.

¹⁵ Samuelca cayandi tutamantacamanmi sueñucurca. Ña jatarishpaca, Mandac Diospac huasi pungucunatami pascarca. Shina cashpapish muscuipi ricushcata Eliman parlanataca mancharcami.

¹⁶ Chashna cacpimi, Elí Samuelta cayashpaca: —Ñuca huahua Samuel-lla— nirca. Shina nicpimi Samuelca: —Caipimi cani— nirca.

¹⁷ Shina nicpimi Elica: —¿Diosca imatatac canman huillarca? Pai ima nishcataca mana pacashpa huillai. Canman tucui ima parlashcata pacashpa mana huillacpica, Diosllatac cantaca yallita llaquichichun— nirca.

¹⁸ Shina nicpimi, Samuel imatapish mana pacashpa tucui huillarca. Chaita uyashpami Elica: —¡Paica Mandac Diosmi! Paiman ima alli cacpica, chashnallatac ruhuachunlla— nirca.

¹⁹ Samuelca huiñarcami, Mandac Diospish paihuanmi carca. Chaimantami Dios rimashca shimicunata tucui pactachirca.

²⁰ Tucui israelcunami Dan pueblopi causaccunamanta callarishpa Beerseba pueblopi causaccunacaman Samueltaca Mandac Dios ima nishcata huillashpa alli pactachic cacta yacharca.

²¹ Mandac Diosca cutinllatacmi, Silo pueblopi ricurirca. Mandac Diosca Silo pueblopimi Samuelman paipac rimashca shimitaca huillac carca.