1 SAMUEL 27 - Dios Rimashcata Quillcashcami

Davidca filisteocunapac llactapi cashcamanta

¹ Chai quipami Davidca paipac shungupica: «Ima punzha cashpapish Saulca huañuchingami. Chaimanta ama ashtahuan ñucata cai Israel llactapi mashcashpa puricuchunca, Filisteocunapac llactapi miticungapac risha. Shina rishpami, paipac maquimantaca quishpirisha» nishpa yuyarca.

² Shina yuyarishpami Davidca paihuan cac sucta patsac runacunandi Gat pueblota jatun mandac Maocpac churi Aquispacman rirca.

³ Davidca paipac runacunandimi Aquis mandacuc Gat pueblopi quiquin familiahuan causarca. Davidca paipac ishcai huarmicunata pushashpami causarca. Davidpac huarmicunaca: Jezreel pueblomanta Ahinoam, Carmel pueblomanta viuda Abigailmi carca. Paipac cusaca Nabalmi carca.

⁴ David Gat puebloman miticushpa rishcata uyashpami Saulca mana ashtahuan mashcarca.

⁵ Davidca Aquistaca: —Cambac ñaupapi ñuca alli ricurishca cacpica, llactacunapi cac maijan shuc uchilla pueblopi causangapac cuiyari. Canta servic ñuca can mandashpa tiyana pueblopi causanaca mana allichu— nirca.

⁶ Shina mañacpimi, Aquisca chai punzhallatac Siclag pueblota curca. Chaimantami Siclag puebloca cunancaman Judá llactata jatun mandaccunapac tucushca.

⁷ Filisteocunapac llactapi Davidca shuc huata chuscu quillatami causarca.

⁸ Davidca paipac runacunandi huichai rishpami gesurita, gezrita, amalecita gentecunahuan macanacurca. Paicunami punta huatacunamanta pacha Shur shitashca pambaman rina ñan lado llactamantaca Egipto llacta ladocaman causarca.

⁹ Davidca chai llactapi causaccunataca caricunata, huarmicunata huañuchishpami, ovejacunata, vacacunata, burrocunata, camellocunata, churanacunata apashpa Aquispacman cutirca.

¹⁰ Chaita ricushpami Aquisca: «¿Maijan pueblocunatatac cunanca llaquichimunguichic?» nishpa tapucpica, Davidca: «Judá llactapi cac Neguev pambapi causaccunata, mana cashpaca Neguev pambapi causac ceneocunata, mana cashpaca Jerameel pambapi causaccunatami llaquichimunchic» nic carca.

¹¹ Davidca pai llaquichishcata Gat pueblota jatun mandacman ama huillangapac shamuchunmi maijan pueblopi cashpapish caritapish, huarmitapish tucui huañuchirca. Chashnami paica filisteocunapac llactapi causacui punzhacunaca ruhuarca.

¹² Ashtahuanpish Aquisca David ima nishcatapish crishpami: «Davidca Israel llactapica piñai tucushcami. Shina cashpaca, huiñaitami ñucata servic canga» nirca.