1 SAMUEL 25 - Dios Rimashcata Quillcashcami

Samuel huañushcamanta

¹ Samuel huañucpica, tucui israelcunami tandanacushpa huacarca. Paitaca pai causana Ramá pueblollapitami enterrarca. Chai quipaca Davidca shitashca pamba Paranmanmi rirca.

Davidmantapish, Abigaíl huarmimantapish

² Maón pueblopi causac shuc runami Carmel pueblopi shuc haciendata charirca. Paica chayucmi carca. Paica quimsa huaranga ovejata, shuc huaranga chivotami charirca. Chai runaca Carmel pueblopimi ovejacunata rutucurca.

³ Paica Nabal shutimi carca. Paipac huarmica Abigaíl shuti alli yuyaiyuc alaja huarmimi carca. Ashtahuanpish paipac cusa Nabalca sinchi shungu, mana allita ruhuac Calebpac huahua huahuacunamantami carca.

⁴ Davidca shitashca pambapi cashpami, Nabalca paipac ovejacunatami rutucun nishcata uyarca.

⁵ Chaimantami Davidca chunga mosocunata cachashpaca: —Carmel puebloman huichai rishpa, Nabalta ñuca shutipi saludashpa:

⁶ “¡Canpish, cambac familiapish, tucui can ima charishcacunapish alli cachunmi munani!

⁷ Cantaca ovejata rutucuctami uyarcani. Cunanpish cambac ovejacunata michiccunaca ñucanchic-huanmi carca. Paicunataca ima llaquita mana ruhuashcanchicchu. Tucui punzhacuna Carmel pueblo ladopi michicucpica, paicunamanca imapish mana illarcachu.

⁸ Chaitaca canta serviccunaman tapunguilla, paicunaca huillangallami. Shina cashcamanta ñuca cachashca mosocuna cambac ñaupapi alli ricurishca cachun. Ñucanchicca cushicui punzhapimi chayamushcanchic. Shina cashcamanta can imata charishca micunacunata canta serviccunaman, cambac churi Davidman cachai ninmi” nigrichic— nirca.

⁹ David cachashca mosocunaca Nabalpacman chayashpaca, tucui nishcata Davidpac shutipi huillashpami, upalla shayacurcacuna.

¹⁰ Nabalca David cachashca mosocunataca: —¿Pitac Davidca? ¿Pitac Isaipac churica? Cunan punzhacunaca achca serviccunami paipac amocunamanta miticushpa puricuncuna.

¹¹ ¿Ñucaca tandata, yacuta, ñuca ovejacunata rutuccunaman carana yanushca aichatachu mana ricsishca pi mai runacunaman carasha?— nirca.

¹² Shina nicpimi, David cachashca mosocunaca paicuna rishcallatatac Davidpacman cutishpa, Nabal nishcata huillarcacuna.

¹³ Chai quipami Davidca paipac runacunataca: —¡Tucui mashna cancunapac espadata japichic!— nirca. Shina nicpimi, paicunaca espadata japishpa chumbillirinapi churarcacuna. Shinallatac Davidpish paipac espadata chumbillirinapi apacpimi, chuscu patsac shina runacuna Davidta catishpa huichai rircacuna. Ishcai patsac runataca ima huacaichishcacunata cuidachunmi saquirca.

¹⁴ Ashtahuanpish serviccunapuramanta shucmi Nabalpac huarmi Abigailman huillashpaca: —Riqui, Davidca shitashca pambapi cashpami ñucanchic amota ¿allillachu cangui? nichun cacharca. Ashtahuanpish paica rimashpami llaquichirca.

¹⁵ Chai runacunaca ñucanchic-huanca mai allimi carca. Paicunaca jaicapi mana llaquichircachu. Shitashca pambapi paicunahuan puricui tucui punzhacunaca imapish mana illacmi carcanchic.

¹⁶ Paicunahuan ovejacunata ñucanchic michicucpica, punzhapish, tutapish pirca shinami cuidashpa charirca.

¹⁷ Cunanca, ima ruhuana cacpipish, alli yuyarishpa rimailla. Ñucanchic amotapish, paipac familiatapish llaquica japigrintacmi. Cambac cusaca yallita millai cashpami pi imata nicpipish mana entendin— nirca.

¹⁸ Shina nicpimi, Abigaíl huarmica utcashpa ishcai patsac tandata, ishcai puñu vinota, pichca oveja aicha cusashcata, chaupi quintal camchata, patsac racimo uvasmanta ruhuashca tortillata, chaquishca higomanta ruhuashca ishcai patsac tandata burrocunapi apachirca.

¹⁹ Chai quipami chai serviccunataca: —Cunanca ñaupashpa richiclla. Ñucaca quipata catimushallami— nirca. Caitaca paipac cusa Nabalmanca mana huillarcachu.

²⁰ Paica shuc burropi montashpami, loma shuctac ladota uraita rirca. Cutin Davidca paipac runacunandimi shuctac ladota shamucurca. Chaita ricushpami paihuan tupangapac rirca.

²¹ Davidca: «Shitashca pambapi tucui imata chai runa charishcataca yangami cuidacushcani. Pai charishcacunaca imapish mana chingarishcachu. Paiman allita ruhuashcamantaca mana allitami ñucamanca ruhuan.

²² Shina cashcamanta paipac huasi ucupurata caya tutamantacaman tucui caricunata ñuca mana huañuchicpica, ¡chaimantapish yallita Dios ñucata llaquichichun!» nirca.

²³ Abigaíl huarmi Davidta ricushpaca, burromanta uricushcahuanmi Davidpac ñaupapi pambacaman cumurirca.

²⁴ Paica Davidpac chaqui ñaupapi cungurishpaca: —¡Ñuca mandaclla, ima juchata ruhuashcapish ñucapac jahuapi cachun! Ashtahuanpish canta servic ñucami, canhuan caita parlasha nini. Ñuca ima nishcata uyai.

²⁵ Ñuca mandaclla, chai millai Nabal ima nishcataca ama cazuichu. Paipac shuti cashca shinallatacmi yuyai illac can. Ashtahuanpish canta servic ñucaca can cachashca mosocunataca mana ricushcanichu.

²⁶ Cunanca ñuca mandaclla, ¡Mandac Diospac shutipi, cambac shutipi nini: Mana allita ruhuashcamanta cambac maquihuanllatac huañuchishpa yahuarta jichanamantaca Mandac Diosmi cantaca jarcashca! Canta piñaccunapish, ñuca mandacta llaquichisha niccunapish, Nabal shina llaquita apachun.

²⁷ Cunanca, ñuca mandacman carangapac canta servic ñuca apamushcata chasquishpa, ñucata mandacta catishpa puric runacunaman carai.

²⁸ Canta servic ñuca piñachishcataca perdonai. Mandac Diosllatacmi can ñucata mandacmanca huiñaita mandanata cunga. Ñuca amomi Mandac Diosmanta macanacucun. Cambac tucui causaipi ima mana allica canpica mana tiyangachu.

²⁹ Canta huañuchingapac maijan caticpipish, ñucata mandacpac causaitaca canta Mandac Diospac maquipimi alli causaccunahuan tandachishca. Ashtahuanpish canta piñaccunataca Paillatacmi rumi huaicuta shitac shina tucuchinga.

³⁰ Mandac Dios ñuca mandacman pactachishami nishcata pactachishpa, israelcunata mandachun churashpaca,

³¹ ñuca mandaclla, mana faltayucta huañuchishpa yahuarta jichashcamanta, cambac quiquin maquihuan canta piñaccunata mana llaquichishcamantaca mana shungupi llaquiringuichu. Mandac Dios ñuca mandacman allita ruhuacpica, canta servic ñucata yuyaringui— nirca.

³² Shina nicpimi, Davidca Abigailtaca: —¡Cantaca ñucahuan tupachun cachashcamantaca israelcunata Mandac Diosca alli nishca cachun!

³³ Cambac alli yuyaipish alli nishca cachun. Huañuchishpa yahuarta jichangapac rinamantapish, ñucata llaquichinamantapish canmi ñucata jarcashcangui. Chaimanta alli nishcami cangui.

³⁴ ¡Israelcunata Mandac Diospac shutipimi nini: Paimi canta llaquichinamantaca jarcashca! Ñucahuan tupangapac can mana utca shamushca cacpica, caya punzhapacca Nabalpac runacunataca shucllapish mana saquirinmanchu carca— nirca.

³⁵ Shina nishpa Davidca Abigaíl imalla apamushcata japishpaca: —Imatapish mana manchashpa, cambac huasiman rilla. Riqui, can ima nishcatapish uyashpami cazuni— nirca.

³⁶ Shina nicpimi, Abigaíl huarmica Nabalpacman cutirca. Huasipica Nabalca jatun mandaccuna micuna shina jatun micuitami ruhuashca carca. Paipac shungupica yallita cushilla cashpami, yallita machashca carca. Shina cacpimi, Abigaíl huarmica cayandi punzhacaman imata mana huillarca.

³⁷ Ashtahuanpish cayandi tutamanta Nabal vino ubiashca pasaricpimi, paipac huarmi Abigailca tucui ima tucushcata huillarca. Shina huillacpimi, Nabalca shungu upayashpa rumi shina saquirirca.

³⁸ Chaimanta chunga punzha quipaca, Mandac Diosllatac anchayachicpimi, Nabalca huañurca.

³⁹ Nabal huañushcata David yachashpaca: «¡Mandac Diosca alli nishca cachun! ¡Nabaltaca ñucata rimashpa pingaichishcamantami llaquichishca! ¡Mandac Diosmi paita servic ñuca mana allita ruhuanamantaca jarcarca! ¡Mandac Diosllatacmi, Nabal mana allita ruhuashcamantaca paillatatac llaquichirca!» nirca. Chai quipami Davidca Abigaíl huarmihuan cazarangapac rimachun cacharca.

⁴⁰ Davidta serviccuna Carmel puebloman chayashpa Abigaíl huarmihuan tupashpaca: —Davidca canhuan cazarasha nishpami huillachun cachan— nirca.

⁴¹ Shina nicpimi, Abigaíl allpacaman cumurishpaca: —Riqui, Davidta servic ñucaca caipimi cani. Chaimanta ñucata mandacpac serviccunapac chaquitapish jahuashallami— nirca.

⁴² Chai quipami Abigaíl huarmica utca jatarishpa, paita servic pichca solteracunahuan David huillachun cachashca runacunata catishpa rirca. Chashna rishpami Davidhuan cazararca.

⁴³ Shinallatac Davidca Jezreel pueblomanta Ahinoam huarmihuanpish cazararcami. Ishcaitacmi paipac huarmicuna carca.

⁴⁴ Cutin Saulca Davidpac huarmi Micaltaca Galim pueblomanta Laispac churi Paltimanmi cushca carca.