1 SAMUEL 23 - Dios Rimashcata Quillcashcami

Keila pueblopi causaccunata David quishpichishcamanta

¹ Davidman huillashpaca: «Riqui, filisteocunami Keila pueblopi causaccunata macashpa, trillana pambacunamanta granocunata shuhuashpa apacun» nirca.

² Shina huillacpimi Davidca Mandac Diostaca: —¿Chai filisteocunahuan macanacugrishachu?— nishpa tapurca. Shina tapucpimi, Mandac Diosca Davidtaca: —Filisteocunahuan macanacushpa, Keila pueblopi causaccunata quishpichigri— nirca.

³ Ashtahuanpish Davidpac runacunaca: —Riqui, ñucanchicca cai Judá llactapi cashpapish manchaihuanmi canchic. ¡Keila puebloman rishpa, filisteocunahuan macanacunatacarin ashtahuanmi manchanayanga!— nirca.

⁴ Shina nicpi, David Mandac Diosta cutinllatac tapucpimi Mandac Diosca: —Jatarishpa Keila puebloman rilla. Ñucami filisteocunataca cambac maquipi churasha— nirca.

⁵ Shina nicpimi, Davidca paipac runacunahuan Keila puebloman rishpa, filisteocunataca macashpa tucuita atirca. Chashna atishpami, paicunapac animalcunatapish quichushpa Keila pueblopi causaccunataca quishpichirca.

⁶ Ahimelecpac churi Abiatar miticushpa Davidta catishpa Keila puebloman rishpaca efod churanata apashpami rirca.

⁷ Keila puebloman David shamushcata Saulman huillacpimi, Saulca: «Diosmi ñuca maquipi churashca. Chaimantami Davidllatac puebloman yaicushpa, pungucunata huichcarishpa aldabarishca» nishpa yuyarca.

⁸ Chaimantami Saulca Keila pueblopi macanacungapac ringapac tucui paipac runacunata tandachirca. Paica Davidtapish, paipac runacunatapish muyunacushpa japinatami yuyarca.

⁹ Ashtahuanpish Davidca Saúl ima shina huañuchinata yuyaricushcata yachashpami Abiatar curataca: —Efodta apamui— nirca.

¹⁰ Chai quipami Davidca: —Israelcunata Mandac Dioslla, Keila pueblopi causaccunataca canta servic ñucamanta Saúl tucuchingapac shamugricushcatami yachani.

¹¹ ¿Keila pueblopi causaccunaca Saulpac maquipi ñucata churangacunachu? ¿Canta servic ñuca uyashca shina Saulca urai shamungachu? Israelcunata Mandac Dioslla, canta servic ñuca tapushcataca huillaiyari— nirca. Shina tapucpi Mandac Diosca: —Ari, Saulca urai shamungami— nirca.

¹² Shina nicpi, Davidca cutinllatac tapushpaca: —¿Keila pueblopi causaccunaca ñucatapish, ñuca runacunatapish Saulpac maquipi churangacunachu?— nirca. Shina nicpimi, Mandac Diosca: —Ari, canta japichingacunami— nirca.

¹³ Shina nicpimi, Davidca paihuan cac sucta patsac runacunandi, Keila pueblomanta llucshishpa maiman rina cashcata mana yachashpa rircacunalla. David Keila pueblomanta miticushpa rishcata Saúl yachac chayashpaca, mana rishpami saquirirca.

¹⁴ Shinami Davidca shitashca pamba Zif urcucunaman rishpa pirca huashacunapi miticushpa causacurca. Saulca punzhanta mashcacucpipish Diosca Davidtaca mana paipac maquipi churarcachu.

¹⁵ Davidca paita huañuchingapac Saúl mashcangapac llucshishcata yachashpami, Zif shitashca pambapi cac Hores pamballapitac saquirirca.

¹⁶ Chaita yachashpami, Saulpac churi Jonatanca Hores pambapi Davidta ricungapac rirca. Diospi yuyaita churashpa ashtahuan sinchiyachun nishpami,

¹⁷ Jonatanca: —Ama manchaichu, ñuca taita Saúl canta mashcacushpapish mana taringachu. Canmi israelcunata jatun mandac tucungui. Ñucaca cambac catic mandacmi tucusha. Chaitaca ñuca taita Saulpish allimi yachan— nirca.

¹⁸ Ishcaita Mandac Diospac ñaupapi ari ninacushpami, Davidca Hores pamballapitac saquirirca. Cutin Jonatanca paipac huasimanmi cutirca.

¹⁹ Chai quipami Zif pueblopi causaccunaca Gabaa puebloman huichai rishpa Saultaca: —¿Davidca ñucanchic llacta Hores pambamanta ura ladoman cac Haquila lomacunapi mai mana chayanapimi miticushca canga?

²⁰ Cunanca jatun mandaclla, can yuyashca shina, utca urai shamuilla. Ñucanchicmi can jatun mandacpac maquipi churashun— nirca.

²¹ Shina nicpimi Saulca: —Cancuna ñucata llaquishpa, huillangapac shamushcamantaca Mandac Diosllatac bendiciachun.

²² Cunanca, maipi miticushca pushtuta alli ricushpa ricsigrichic. Pi ricushcatapish, alli yachaichic. Paica yalli vivo cashcatami ñucamanca huillancuna.

²³ Alli alli ricushpa maipi miticuctapish allita yachashpa ñucaman huillac shamunguichic. Chashna huillacpica, cancunahuan rishallami. Chai llactapi cacpica, Judá llactapi causacuc huaranga huaranga gentecunapimi mashcasha— nirca.

²⁴ Shina nicpimi, paicunaca Saulpac ñaupamantaca Zif puebloman cutircacuna. Ashtahuanpish Davidca Arabá llactapi cac Maón shitashca pamba ura ladopimi paipac runacunandi carca.

²⁵ Saulca paipac soldadocunandimi mashcangapac rirca. Chaita Davidman huillacpimi, shitashca Maón pambapi cac jatun rumi quingraita urai rirca. Chaita Saúl yachashpami, shitashca Maón pambata Davidta catishpa rirca.

²⁶ Saulca shuc lado urcuta ricpica, Davidca paipac runacunandimi caishuc lado urcuta miticungapac callpashpa rircacuna. Ashtahuanpish Saulca paipac soldadocunahuanmi Davidtaca paipac runacunandi japingapac muyunacugrirca.

²⁷ Shina cacpimi Saulpacman shuc huillac shamushpaca: —Filisteocunami ñucanchic llactapi macanacungapac yaicushca. Chaimanta utca shamui— nirca.

²⁸ Shina huillacpimi, Saulca Davidta huañuchingapac caticushcata saquishpa, filisteocunahuan macanacungapac cutirca. Chaimantami chai pambataca Sela-hama-lecotta shutichirca.

²⁹ Chaimantami Davidca chaimanta huichai rishpa, maita mana chayaipac shitashca En-gadi pamba quingraicunapi miticushpa causagrirca.