1 SAMUEL 22 - Dios Rimashcata Quillcashcami

David shuc tandanacushcata pushac tucushcamanta

¹ David chaimanta rishpaca Adulam jatun jutcupimi miticungapac rirca. Chaipi cacta yachashpami paipac huauquicunapish, paipac taitapac huasi familiapish paipacman rirca.

² Shinallatac llaquichishca runacunapish, debiyuc runacunapish, shungupi llaquilla caccunapish Davidhuanmi tandarircacuna. Davidca paicunata pushacmi tucurca. Paica chuscu patsac shina runacunatami charirca.

³ Chaimantaca Davidca Moab llacta Mizpa pueblomanmi rirca. Chaiman chayashpami Moab llactata jatun mandactaca: —Dios ñucata imatapish mandangacaman ñuca taitatapish, ñuca mamatapish caipi cancunahuan causachun saqui— nirca.

⁴ Shina nishpami Moab llactata jatun mandacpacman pusharca. Pircashca huashapi David miticushpa causacui tucui punzhacunami paicunaca jatun mandac-huan causarca.

⁵ Shina causacucpimi, Diosmanta huillac Gadca Davidtaca: —Pircashca huashapica ama tiyacuichu. Chaimanta rishpa Judá llactapi yaicugri— nirca. Shina nicpimi, Davidca jatarishpa Haret sachaman rirca.

Nob pueblopi causac curacunata Saúl huañuchishcamanta

⁶ Saulca Gabaa urcu lomapi tiyac tamarisco yura ucupimi lanzata apashpa tiyacurca. Paita tucui serviccunaca muyundimi shayacurcacuna. Chaipi cashpami, Saulca Davidtapish, paihuan caccunatapish maita ricushcata yachac chayarca.

⁷ Chaimantami Saulca paipac muyundipi shayacuc paita serviccunataca: —Benjamín aillucuna uyaichic. ¿Isaipac churica tucui cancunaman allpacunatapish, uvas chagracunatapish cunga yuyanguichicchu? ¿Cancunataca huaranga soldadocunata, patsac soldadocunata mandachun churanga yuyashpachu

⁸ ñucata piñashpa pacalla parlanacucunguichic? Ñuca churi Jonatán, Isaipac churi Davidhuan imatapish ruhuangapac ari nishcata yachashpapish, mana huillarcanguichicchu. Cancunaca ñucata mana llaquinguichicchu. Chaimantami ñucata servic David ñucata piñashpa jatarichun ñuca churica yuyaita cushca. Cunanca paica chaitami ruhuacun— nirca.

⁹ Shina nicpimi, Saulta serviccunata mandac Edom llactamanta Doegca: —Ñucami Isaipac churitaca Nob pueblopi causac Ahitobpac churi Ahimelecpacman ricta ricurcani.

¹⁰ Chaipimi Ahimelecca David ima ruhuanata Mandac Diosman tapurca. Chai quipaca micunacunatapish, filisteopura Goliatpac espadatapish curca— nirca.

¹¹ Shina nicpimi, jatun mandac Saulca, Ahitobpac churi Ahimelec curatapish, paipac taitapac tucui familiacunatapish, Nob pueblomanta curacunatapish cayachun cacharca. Shina cayachicpimi, jatun mandacpacman tucui shamurca.

¹² Chaipimi Saulca Ahimelectaca: —Ahitobpac churi alli uyangui— nirca. Shina nicpimi Ahimelecca: —Ñuca mandaclla, caipimi cani— nirca.

¹³ Shina nicpimi Saulca: —¿Ima nishpatac canhuan, Isaipac churihuanca ñucata llaquichingapac huashalla rimanacurcanguichic? Tandatapish, espadatapish cushpami David ima ruhuanatapish, Diosman tapushcangui. Chaitaca ñucata piñashpa, pacalla chapashpa puringapacmi chashna ruhuashcangui. Cunan punzhaca paica chaitami ruhuacun— nirca.

¹⁴ Shina nicpimi, Ahimelec curaca jatun mandactaca: —¿Tucui canta servicpuramanta cambac yerno shina can mandashcata pactachicca pitac tiyanyari? Paica tucui canta cuidac soldadocunata pushacmi, shinallatac can mandashpa causana huasipipish tucuimi alli nincuna.

¹⁵ ¿Ñucaca Diosmanca punta cutinchu Davidmantaca tapurcani? ¡Mana chashnachu! Canta servic ñucaca canta huañuchisha nicushcataca ashallatapish mana yachanichu. Chaimanta canta servic ñucatapish, ñuca taitapac huasi familiatapish ama yanga juchanchichu— nirca.

¹⁶ Shina nicpimi, jatun mandacca: —¡Ahimelec canpish, cambac taitapac huasi familiapish huañunami canguichic!— nirca.

¹⁷ Shina nishpami, jatun mandacca paipac muyundi cuidashpa shayacuc soldadocunataca: —¡Mandac Diospac curacunata huañuchichic! Paicunaca Davidta ayudashpami, pai miticushpa ricta yachashpapish mana huillashcacuna— nirca. Shina nicpipish, jatun mandacta serviccunaca Mandac Diospac curacunata mana huañuchisha nircacunachu.

¹⁸ Chaimantami jatun mandac Doegtaca: —¡Can tigrarishpa curacunata huañuchi!— nirca. Shina nicpimi, chai punzhaca Edom llactamanta Doegca linomanta ruhuashca efodta churarishca pusac chunga pichca curacunata huañuchirca.

¹⁹ Shinallatac curacuna causana Nob puebloman rishpami caricunatapish, huarmicunatapish, huahuacunatapish, chuchucuc huahuacunatapish espadahuan huañuchirca. Shinallatac huagracunatapish, burrocunatapish, ovejacunatapish espadahuan chugrichishpami tucui huañuchirca.

²⁰ Ashtahuanpish Ahimelecpuramanta Ahitobpac churi Abiatarmi miticushpa Davidpacman rirca.

²¹ Abiatar Davidpacman chayashpami, Saúl Mandac Diospac curacunata ima shina huañuchichishcata huillarca.

²² Chashna huillacpimi, Davidca Abiatartaca: —Chai punzha ñuca chaipi cashpallatacmi Edom llactamanta Doeg Saulman huillanataca yacharcani. Cambac taitapac huasi familiacunaca ñucamantami huañushca.

²³ Shina cacpipish, canca ama manchaichu ñucahuan saquirilla. Ñucata huañuchingapac mashcac runaca cantapish mashcangami. Ashtahuanpish can ñucahuan saquirishpaca imapish mana tucunguichu— nirca.