1 SAMUEL 21 - Dios Rimashcata Quillcashcami

David Saulmanta miticushpa rishcamanta

¹ Davidca Nob pueblopi causac Ahimelec curapacmanmi rirca. Ahimelec cura Davidta ricushpaca yallita mancharishpami: —¿Ima nishpatac pitapish mana pushashpa canlla shamungui?— nirca.

² Shina nicpimi, Davidca Ahimelec curataca: —Jatun mandacmi caita ruhuachun mandashpaca: “Imapac cachashcatapish, ñuca imata ruhuagricushcatapish ama pi yachachun” nirca. Shinallatac ñucapac runacunamanca maipi tupanatapish ñami huillarcani.

³ Cunanca ¿Ima micunatatac maquipi charicungui? Pichca tandata, mana cashpaca mashna tiyashcatapish cui— nirca.

⁴ Shina nicpimi, Ahimelec curaca Davidtaca: —Yangalla tandataca mana charinichu. Diosman chicanyachishca tandallatami charini. Shina cacpipish, cambac runacuna huarmicunallapipish mana chayarishca cacpica cushallami— nirca.

⁵ Shina nicpimi, Davidca curataca: —Cainapish, sarunpish huarmicunamantaca carupimi carcanchic. Caiman shamuna mana alli cacpipish runacunaca chuyanllami. Chashna cashpaca cunancarin chuyanllami. Mana llullashpami nini— nirca.

⁶ Shina nicpimi, Ahimelecca ashtahuan shuc tanda mana tiyashcamanta Diosman chicanyachishca tandata Davidman curca. Chai punzhaca cunuclla tandata churangapacmi Mandac Diospac ñaupamanta chai tandataca anchuchishpa charicurca.

⁷ Chai punzhallatacmi Saulta servicpuramanta shuc runa Mandac Diospac huasipi saquirishca carca. Paica Saulpac ovejacunata michiccunata mandac Edom llactamanta Doegmi carca.

⁸ Davidca Ahimelec curataca: —¿Manachu caipi lanzata, mana cashpaca espadata charingui? Jatun mandac utca ri nicpimi, ñuca maquipica espadatapish, shuctac macanacunatapish mana apamurcani— nirca.

⁹ Shina nicpimi, chai curaca: —Ela pambapi can filisteopuramanta Goliathuan macanacushpa atishpa quichushca espadallami shuc pañohuan pillushca efod huashapi tiyacun. Chaita japinata munashpaca japilla. Ashtahuan shuc espadaca mana tiyanchu. Chaillami tiyan— nirca. Shina nicpimi Davidca: —¡Shuctac alli espadaca mana tiyanchu! ¡Chaita apamuilla!— nirca.

¹⁰ Chai punzhallatacmi Davidca Saulpac ñaupamanta miticushpa Gat pueblota jatun mandac Aquispacman rirca.

¹¹ Chaiman chayacpi, Aquista serviccunaca: —¿Manachu paica Israel llactata jatun mandac David? ¿Manachu paitaca: “Saulca huaranga runacunatami huañuchirca, Davidca chunga huaranga runacunatami huañuchirca” nishpa cantashpa danzacurca?— nirca.

¹² Davidca shina parlanacucta uyashpaca paipac shungupi yuyarishpami Gat pueblota jatun mandac Aquistaca yallita mancharca.

¹³ Chaimantami Davidca paicunapac ñaupapi yuyai illac tucushpalla pungucunapipish maipish cachun quillcashpa, babastapish paipac barbas uraita shutuchicurca.

¹⁴ Shina cacpimi Aquisca paita serviccunataca: —¡Riquichic, cai runaca yuyaitami chingachishca! ¿Imapactac ñucapacman apamurcanguichic?

¹⁵ ¿Ñuca huasipica yuyaita chingachiccunaca illanchu? ¿Chashna cashca jahuachu cai runataca ñuca ñaupapi imatapish ruhuashpa musparichun apamurcanguichic? Cai runaca ñuca huasimanca mana yaicunachu carca— nirca.