1 SAMUEL 20 - Dios Rimashcata Quillcashcami

Davidhuan Jonatanhuan ari nishcamanta

¹ Davidca Ramá pueblopi cac Naiot pambamanta miticushpa Jonatanpacman shamushpaca: —Cambac taita ñucata huañuchisha nichunca, ¿ñucaca imatatac ruhuashcaniyari? ¿Ima mana allitatac ruhuashcaniyari? ¿Mana cashpaca ima juchatatac ruhuashcaniyari?— nirca.

² Shina nicpimi Jonatanca: —¡Riqui, canca manatac huañunguichu! Ñuca taitaca jatun ruhuaita cashpa, uchilla ruhuaita cashpapish ñucaman mana huillashpaca mana ruhuangachu. ¿Ima nishpatac caitaca ñuca taitaca upalla tucunyari? Mana chashnachu canga— nirca.

³ Shina nicpimi Davidca: —Cambac taitaca canhuan ñucahuan alli apanacuctaca allimi yachan. Chaimantami: “Jonatán ama llaquirichunca mana huillasha” nishca canga. ¡Mandac Diospac shutipi, cambac shutipimi nini!: Ñuca huañuica ñuca ñaupallapimi— nirca.

⁴ Shina nicpimi, Jonatanca Davidtaca: —Shinashpaca ¿imatatac canmantaca ruhuachun ningui?— nirca.

⁵ Chashna nicpimi Davidca Jonatantaca: —Riqui, cayaca llullu quillami. Ñuca jatun mandac-huanmi micungapac tiyarina cani. Ashtahuanpish canca quimsa punzhacaman pambapi ñuca miticugrichun saquingui.

⁶ Cambac taita ñucata tapucpica: “Paipac tucui familiacunami Belén pueblopi Diosman animalta cushpa huañuchishpa huatanta fiestata ruhuanata yachan. Chai puebloman ringapacmi ñucata saqui” nishpa mañarca ningui.

⁷ Cambac taita: “Shina cashpaca allimi” nicpica, canta servic ñucaca cushillami casha. Ashtahuanpish pai piñaricpica, huañuchingapac cashcatami yachangui.

⁸ Canta servic ñucata llaquingui. Canta servic ñucahuan alli apanacuc cangapacmi Mandac Diospac ñaupapi ari nircangui. Ima mana allita ñuca ruhuashca cacpica, canllatac huañuchi. ¿Imapactac cambac taitapacmanca pushacungui?— nirca.

⁹ Shina nicpimi Jonatanca: —¡Ama chashna yuyaichu! Ashtahuanpish ñuca taita huañuchishatac nicushcata yachashpaca ¿Manachu huillaiman?— nirca.

¹⁰ Shina nicpimi, Davidca Jonatantaca: —Cambac taita piñaricpica, ¿pitac ñucamanca huillangayari?— nirca.

¹¹ Shina nicpimi, Jonatanca Davidtaca: —Shamui chai pambaman llucshishun— nirca. Shina nishpami ishcai tucushpa pambaman llucshircacuna.

¹² Chaipimi Jonatanca Davidtaca: —Israelcunata Mandac Dios ricucunmi. Caya cashpa, mincha cashpa cai horasllatatacmi ñuca taita imata yuyacushcata tapushpa yachasha. Canmanta allita yuyacucpica, huillachun cachashallami.

¹³ Ashtahuanpish ñuca taita canta llaquichisha nicushcata yachashca jahua mana huillacpica, Mandac Diosllatac sinchita, ñucata llaquichichun. Mandac Diosca ñuca taitata pushashca shinallatac cantapish alli pushachun.

¹⁴ Ñuca causacucpica, Mandac Dios llaquic shinallatac ñucatapish llaquingui. Ñuca huañucpica,

¹⁵ ñuca familiataca tucui causaipi llaquingui. Davidta piñaccunata Mandac Dios cai pachamanta shucllancaman tucuchicpipish ñuca huasi ucupuracunata llaquinataca amatac saquinguichu— nirca.

¹⁶ Jonatanca: —¡Canta piñaccunataca Diosllatac llaquichichun!— nishpami Davidpac huasi ucupuracunahuan ari ninacurca.

¹⁷ Jonatanca Davidta tucui shunguhuan cuyashcamantami paita cutin ari nichirca.

¹⁸ Chai quipami Jonatanca: —Cayaca llullu quilla cacpimi, micunata ruhuanga. Cambac tiyarina chushaclla cacpica, cantaca piñangami.

¹⁹ Quimsa punzhata miticungui. Quipataca utcapi llaquihuan cashpa ima shina miticurcangui, chaillamantac utca rishpa, Ezel rumi huashapi shuyangui.

²⁰ Ñucaca allita yachacungapac shitacuc shinami quimsa flechacunata shitasha.

²¹ Chashna shitashpami ñucata servictaca: “¡Chai flechacunata mashcagri!” nishpa cachasha. Cutin: “¡Riqui, flechaca ashtahuan caimanmi!” nicpica, canca shamunguilla. Chashna nishpaca ima llaqui mana tiyagricushcatami huillasha. ¡Mandac Diospac shutipimi nini!

²² Ashtahuanpish chai servicta: “Riqui, flechaca canmanta ashtahuan chimbamanmi” nicpica, canca ringuilla. Mandac Diosmi cantaca cachacun.

²³ Ñucahuan canhuan cashna parlanacushcataca Mandac Diosmi tucui ñucanchic causaipi ricunga— nirca.

²⁴ Chai quipaca Davidca pambapimi miticungapac rirca. Ña llullu quilla chayacpica jatun mandac Saulca micungapacmi tiyarirca.

²⁵ Jatun mandacca pai utcapi tiyarina pushtullapitacmi pirca cuchupi cac tiyarinapi tiyarirca. Jonatán jataricpica, Abnermi Saulpac ladopica tiyarirca. Ashtahuanpish Davidpac tiyarinaca chushacllami carca.

²⁶ Chai punzhaca David illacta ricushpapish Saulca imata mana nircachu. Chaica: «Diospac ñaupapi ima mana allita ruhuashca cashpami manarac alli tucushca canga» yuyarcami.

²⁷ Llullu quilla cayandi punzhapish Davidpac tiyarina chushaclla cacpimi, Saulca paipac churi Jonatantaca: —¿Ima nishpatac Isaipac churica cainapish, cunanpish micungapacca mana shamun?— nishpa tuparca.

²⁸ Shina tapucpimi Jonatanca Saultaca: —Davidca Belenman ringapacmi, ñucaman yallita mañarca.

²⁹ Paica: “Ñucanchic familiacunami chai pueblopi Diosman cushpa animalta huañuchishpa fiestata ruhuacuncuna. Ñuca huauquica ñucatami shamuchun nishca. Chaimanta ñuca cambac ñaupapi alli ricurishca cacpica, ñuca huauquicunata ricungapac richun saquiyari” nirca. Chaimantami jatun mandac-huan micungapacca mana shamushca— nirca.

³⁰ Shina nicpimi, Saulca Jonatanhuan yallita piñarishpa: —¡Mana cazushpa millaita ruhuac huarmipac huahua! Canllatac pingaichishca tucushpa, cambac mamatapish pingaichingapac Isaipac churihuan apanacuc cashcataca ¿Manachu ñucaca yachani?

³¹ Isaipac churi cai pachapi causacucpica cambac causaipish, can mandanapish manchaillami causanguichic. Cunanca pushamuchun cachai. Paica huañuchishcatacmi canga— nirca.

³² Shina nicpimi, Jonatanca paipac taita Saultaca: —¿Ima nishpatac huañungayari? ¿Paica imatatac ruhuashcayari?— nirca.

³³ Shina nicpimi, Saulca Jonatantaca huañuchisha nishpa lanzahuan shitarca. Chashna ruhuacpimi, Jonatanca paipac taita Saúl Davidta huañuchishatac nicushcata yacharca.

³⁴ Chaimantami Jonatanca mizamanta munai piñarishpa jatarirca. Davidta paipac taita rimarishcamantami munai llaquirishpa, chai llullu quilla cayandi punzhapish mana micurca.

³⁵ Cayandi tutamantami Jonatanca utcapi Davidhuan parlanacushca shinallatac shuc uchilla huambrahuan pambaman rirca.

³⁶ Chaipimi chai huambrataca: —¡Ñucami flechacunata cachagrini! Canca callpashpa mashcamugringui— nirca. Chai huambra callpashpa ricpimi, paimanta ashtahuan chimbaman urmachun Jonatanca flechata shitarca.

³⁷ Flechacunata Jonatán shitashca pushtuman chai huambra chayacpica Jonatanca: —Flechacunaca canmanta ashtahuan chimbapimi— nishpa sinchita caparirca.

³⁸ Jonatanca cutinmi chai huambrataca: —¡Utca callpamui, ama shayacuichu!— nirca. Shina cacpimi Jonatanta servicca flechacunata tandashpa paipac amopacman shamurca.

³⁹ Ashtahuanpish chai servicca ima ruhuacushcataca mana entendircachu. Jonatanhuan, Davidllahuanmi imamanta chashna ruhuacushcataca yacharca.

⁴⁰ Chai quipami Jonatanca paipac macanacunataca paita servicman cushpaca: —Caita apashpa puebloman ñaupailla— nirca.

⁴¹ Chai servic huambra rishca quipami, Davidca chai ura ladopi jatarishpa quimsa cutincaman allpaman chayacta paipac ñaupapi cumurirca. Chai quipami ñahui quingraipi muchanacushpa ishcaita huacarca. Ashtahuanpish Davidmi ashtahuan huacarca.

⁴² Chai quipami Jonatanca Davidtaca: «Imatapish mana manchashpa rilla. Ñucanchicca ishcaitami Mandac Diospac ñaupapi: “Mandac Dios cantapish, ñucatapish, cambac huahuacunatapish, ñucapac huahuacunatapish huiñaita ricuchun” nishpami ari nircanchic» nirca. Shina nicpimi, Davidca jatarishpa rirca. Shinallatac Jonatanpish puebloman cutirca.