1 SAMUEL 2 - Dios Rimashcata Quillcashcami

Diosta alli nishpa Ana cantashcamanta

¹ Ana Diosta mañashpaca: «Ñuca shunguca Mandac Diospimi cushicun. Mandac Diosmantami ñucaca imatapish ruhuaclla cani. Can quishpichishcamanta cushicushpami, ñuca shimipish ñucata piñaccunata rimangapac pascarirca.

² Mandac Dios shina jucha illacca mana tiyanchu. Canmanta ashtahuan shucca mana tiyanchu. Ñucanchic miticuna rumi shina Diosca mana tiyanchu.

³ Ama sinchi rimaicunata rimaichicchu. Mandac Diosca tucuita yachac Diosmi. Ama cancunallatac alli cashcataca yuyaichicchu. Paimi ima ruhuashcatapish, pezac shina ricucun.

⁴ Sinchi runacunapac arcocunatapish paquircami. Ashtahuanpish imata mana yachaccunaca chumbillic shinami fuerzata japincuna.

⁵ Mana nicta micushpa causaccunaca micunata japingapacmi trabajashpa causancuna. Ashtahuanpish yarcaihuan causaccunaca ña mana yarcachincunachu. Huahuata mana charic huarmipish canchis huahuatami charin. Achca huahuata charic huarmica llaquirishpami causacun.

⁶ Mandac Diosmi huañuitapish causaitapish cun. Paimi Seolmanpish cachan, paillatacmi chaimantapish llucchin.

⁷ Mandac Diosmi huacchatapish, charictapish ruhuan. Paimi yangallatapish, alli nishcatapish ruhuan.

⁸ Imata mana charictapish ñuto allpamantami jatarichin. Imatapish mana charictaca mapa shitanamanta llucchishpami jatun nishcacunahuan tiyachin. Jatun mandaccunahuan tiyachingapacmi chashnaca ruhuan. Allpa callari sapitaca Mandac Diosmi ruhuarca. Chai callari jahuapimi, cai pachata churarca.

⁹ Paimi paihuan causaccunataca maita purinapipish huacaichin. Ashtahuanpish paita mana manchaccunaca pura tutapimi chingaricun. Pipish paipac fuerzallahuanca imatapish mana ruhuai pudingachu.

¹⁰ Mandac Diosta piñaccunataca paillatacmi ñutuchishpa chingachinga. Paicunata llaquichingapacca jahua pachamantami tulun ninga. Tucui cai pachapi causaccuna ima ruhuashcataca Mandac Diosmi ricuchinga. Pai acllashca jatun mandaccunamanpish paimi yachaita cunga. Aceitehuan cahuishpa paipacllata ruhuashcacunataca paimi imatapish ruhuacllata ruhuanga» nirca.

¹¹ Chai quipami Elcanaca Ramá pueblopi tiyac paipac huasiman cutirca. Chai huambraca Elí curapac ñaupapimi Mandac Diospacta ruhuangapac saquirirca.

Elipac churicuna juchata ruhuashcamanta

¹² Elipac churicunaca Diosta mana manchaccuna cashpami, Mandac Diosmantaca imatapish mana yacharca.

¹³ Curacunaca: Maijanpish animalta Diosman cushpa huañuchicpi, chai aicha yanuricucpica, curacunata servicmi garfio nishca quimsa puntayuc fierrohuan ric carca.

¹⁴ Chai fierrotaca caldero mangapi, jatun mangapi, mana cashpaca, pailapimi satic carca. Chai garfio fierropi tucui llucchishcatami curacunaca micuc carca. Chashnami Silo puebloman shamuc tucui israelcunahuanca ruhuaccuna carca.

¹⁵ Shinallatac manarac huirata rupachicpipish, curata servic animalta huañuchic runapacman rishpaca: «Aichata cusashpa curaman carangapac cui. Paica yanushca aichata cucpica, mana chasquingachu, chahua aichata cucpimi chasquinga» nic carca.

¹⁶ Animalta huañuchic runa: «Shuyai huiratarac rupachisha, quipaca can munashcata apanguillami» nicpica: «Mana, cunanllatac cuilla. Can mana cucpica, quichushpami apasha» niccunami carca.

¹⁷ Elipac churicunaca Diosman cushca aichataca yanga cashcatami yuyaccuna carca. Chaimantami paicunapac juchaca Mandac Diospac ñaupapica yallita mana alli carca.

¹⁸ Samuel huambraca linomanta ruhuashca efodta churarishpami, Mandac Diospac ñaupapi Diospacta ruhuac carca.

¹⁹ Paipac taita mamaca Diosman animalta cushpa huañuchingapacmi Diospac huasiman huatanta shamuccuna carca. Chashna shamushpaca Samuelmanmi túnica churanata apashpa shamuc carca.

²⁰ Shina shamucpimi Elcanatapish, paipac huarmitapish, Elica: «Mandac Diosta mañacpi carashca cai huahuapac randica Mandac Diosllatac canmanca ashtahuan huahuacunata cuchun» nishpami bendiciarca. Quipaca paicunapac huasiman cuticllami carcacuna.

²¹ Anaman Mandac Dios allicunata cucpimi, huicsayuc tucushpa quimsa cari huahuata, ishcai huarmi huahuata charirca. Samuel huambraca Mandac Diospac ñaupapimi huiñarca.

²² Elica ña yuyacmi carca. Shina cashpapish, paipac churicuna israelcunata imata ruhuacucta shinallatac Dios-huan tupana huasi pungupi cuidac huarmicunahuan ima shina sueñushpa causacushcatapish tucuitami yacharca.

²³ Chaimantami paica: —¿Ima nishpatac chashna mana allita ruhuacunguichic? Cancuna mana allita ruhuashcacunataca tucui gentecunami parlancuna.

²⁴ Ñuca huahuacunalla, mana chashna ruhuanachu canguichic. Cancunata mana alli nishpa parlanacushcaca mana alli uyarinchu. Mandac Dios acllashcacunatami juchata ruhuachinguichic.

²⁵ Maijanpish shuc runata piñashpa llaquichicpica, juezcunami allichinga. Ashtahuanpish Mandac Diosta piñashpa juchata ruhuacpica, ¿pitac allichingayari?— nirca. Shina nicpipish, paicunaca taita rimashcataca mana uyasha nircacunachu. Chaica Mandac Diosllatac causaita paicunamanta quichugricucpimi mana uyarca.

²⁶ Ashtahuanpish Samuel huambraca ashtahuanmi huiñarca. Paica Diospac ñaupapipish, runacunapac ñaupapipish alli nishcami carca.

²⁷ Chai punzhacunapimi Diospac shuc runa Elipacman shamushpaca: «Mandac Diosca: “Cambac ñaupa taitacuna Egipto llactapi Faraonta servishpa causacucpimi, mana pacashpa tucui huillachircani.

²⁸ Ñuca altarman rishpa, ñucapac ñaupapi efodta churarishpa, inciensota rupachichunmi tucui Israel aillucunamanta ñucapacllata ruhuac cura cachun acllarcani. Shinallatac israelcuna ofrendata ñucaman cushcatapish, cambac taitacunapac huasi ucupuramanmi curcani.

²⁹ ¿Ima nishpatac ñucaman animalta cushpa huañuchishcatapish, shuctac ofrendacunatapish yangapi churanguichic? Chaicunataca ñucahuan tupana huasipi rupachichunmi mandarcani. Cambac churicunatami ñucata yalli alli nishpa, ñuca acllashca israelcuna cushcacunamantaca ashtahuan allita carashpa huirayachishcangui” ninmi.

³⁰ Chaimantami israelcunata Mandac Diosca: “Cambac huasi ucupurapish, cambac taitacunapac huasi ucupurapish huiñaitami ñuca ñaupapi causangacuna” ninmi. Ashtahuanpish Mandac Diosca: “¡Manatac chashna cachun saquishachu! Ñucata alli niccunataca alli nishami, ñucata mana alli niccunataca mana alli nishachu.

³¹ Riqui, cantapish, cambac huasi ucupuracunatapish tucuchina punzhacuna chayamucunmi. Cambac huasi ucupuramantaca pipish yuyaccamanca mana causangachu.

³² Ñuca israelcunaman allicunata cucucpica, ñucanchicpish japicunchicmanlla nishpami llaquiricunguichic. Cancunapac huasi ucupurapica pipish mana yuyaccamanca causangachu.

³³ Cambac ñahui amsayashpa, shungupi yallita llaquirichunmi, ñuca altarpi rupachishpa causac cambac huasi ucupuramanta maijanta saquisha. Tucui cambac huasipi causaccunaca cunan huiñai runacunami huañunga.

³⁴ Chashnatac cagricushcata can ricuchunmi cambac churicuna Ofni, Fineasca shuc punzhallatac ishcaita huañunga.

³⁵ Chai quipami ñucata alli cazuc curata churasha. Paica ñuca shungu ñuca alma munashcatami ruhuanga. Paipac huasi ucupuratapish sinchi cachunmi churasha. Shina ruhuacpimi, aceitehuan cahuishca ñucapaclla runapac ñaupapi punzhanta causanga.

³⁶ Ashtahuanpish cambac huasi ucupuramanta saquirishca runa, asha cullquita, asha micunata charingaraicu chai runapac ñaupapi cungurishpaca: ‘Asha micunata charingapac curacuna ruhuana cashcapi ayudangapac ñucata churaiyari’ nishpa mañangami” ninmi» nirca.