1 SAMUEL 18 - Dios Rimashcata Quillcashcami

Jonatanpish, Davidpish shuc ari ninacuita ruhuashcamanta

¹ David Saulhuan parlanata ña tucuchicpimi, Jonatanca Davidhuan shuc shinalla tucushpa, quiquin cuyaric shina Davidtaca cuyarca.

² Saulca chai punzhallatacmi Davidta paihuan causachun saquichishpa, paipac taitapac huasimanca mana cacharca.

³ Jonatanca Davidta yallita cuyashcamantami paihuan shuc ari— ninacuita ruhuarca. Jonatanca quiquin cuyaric shinami Davidtaca cuyarca.

⁴ Jonatanca paipac churanata llucchishpami shuctac churanacunandi Davidman curca. Shinallatac paipac espadatapish, arcotapish, chumbitapish curcami.

⁵ Davidca Saúl maiman cachacpipish ricllami carca. Shinallatac tucui chaicunapica allitami ruhuac carca. Chaimantami Saulca soldadocunata mandac cachun churarca. Davidca tucui gentecunapac ñaupapipish, Saulta serviccunapac ñaupapipish allimi ricurirca.

Davidta gentecuna cuyacpi, Saúl piñarishcamanta

⁶ Chai filisteota David huañuchishca quipa, paicuna cutimucpimi, tucui Israel llactapi cac pueblocunamanta huarmicunaca cantashpa, danzashpa, panderocunahuan, shuctac tocanacunapi cushilla tocashpa jatun mandac Saulta tupangapac llucshirca.

⁷ Chai huarmicuna danzashpa cantashpaca: «¡Saulca huaranga runacunatami huañuchishca! ¡Davidca chunga huaranga runacunatami huañuchishca!» nircacuna.

⁸ Chashna nishpa cantashcaca Saulmanca mana allichu carca. Chaimantami yallita piñarishpa: «Davidca chunga huaranga runatami huañuchirca, Saulca shuc huaranga runatami huañuchirca nincunami. ¡Ashtahuanpish Davidca jatun mandacmi ninallami faltan!» nishpa yuyarca.

⁹ Chai punzhamanta pachami Saulca Davidtaca piñai callarirca.

¹⁰ Cayandi punzhaca Mandac Dios cachashca shuc millai espíritu japicpimi, Saulca pai mandana ucupi musparishpa rimariricurca. Davidca ñaupa punzhacuna shinallatacmi maquihuan arpapi tocacurca. Cutin Saulca lanzatami maquipi charicurca.

¹¹ Shina charicushpami Saulca: «¡Lanzahuan shitashpami Davidtaca pirca quingraipi huañuchisha!» nishpami yuyarca. Ashtahuanpish ishcai cutinmi Davidca ladoyarca.

¹² Mandac Dios paimanta anchurishpa Davidhuan cacta yachashpami Saulca mancharca.

¹³ Chaimantami Saulca paimanta anchurichun Davidtaca huaranga soldadocunata mandachun churarca. Shina churacpimi, Davidca soldadocunata pushashpa puric carca.

¹⁴ Davidca Mandac Dios paihuan cacpimi, ima ruhuanapipish allita ruhuac carca.

¹⁵ David imata ruhuashpapish allita ruhuacpimi, Saúl ashtahuan mancharca.

¹⁶ David tucui soldadocunata allita pushashpa puricpimi, israelcunapish, Judá llacta gentecunapish Davidtaca mai cuyarca.

¹⁷ Chaimantami Saulca Davidtaca: —Riqui, ñuca punta ushi Merabtami cambac huarmi cachun cugrini. Can Mandac Diosmanta sinchita macanacushpa atichunmi cambac huarmi cachun cugrini— nirca. Shina nicpipish, Saulca Davidtaca: «Mana ñuca maquihuan huañuchishachu. ¡Ashtahuanpish filisteocuna huañuchichun!» yuyashpami, chashna nirca.

¹⁸ Shina nicpimi, Davidca Saultaca: —Jatun mandacpac yerno tucungapacca ¿Ñucaca pitac caniyari? ¿Ñuca taitapac familiacunapish, israelpurapica imatac canyari?— nirca.

¹⁹ Ashtahuanpish Saulca paipac ushi Merab solterata Davidhuan cazarachina punzhapica mana paihuan cazarachishpami, Mehola pueblomanta Adrielhuan cazarachirca.

²⁰ Shina cacpipish Saulpac quipa ushi Micalmi Davidta yallita cuyarca. Chaita Saúl yachashpaca maimi cushicurca.

²¹ Chaimantami Saulca: «Tucllapi urmachic shinami filisteocunapac maquipi paicuna huañuchichun cazarachisha» yuyarca. Chaimantami Saulca cutinllatac Davidtaca: —Cunanmi ñuca yerno cagringui— nirca.

²² Shina nicpimi, Saulca paita serviccunata mandashpaca: —Davidhuan pacalla parlashpa: “Riqui, jatun mandacpish cuyanmi. Paita serviccunapish yallimi cuyan. Chaimanta jatun mandacpac yerno tucuilla” nigrichic— nirca.

²³ Saulta serviccunaca cai nishcacunatami Davidman parlagrirca. Chaita parlacpimi Davidca: —¿Jatun mandacpac yerno tucunaca jahuallachu imatacyari? Ñucaca imatapish mana charic, pipacpish mana ricsishca runami cani— nirca.

²⁴ Shina nicpimi, Saulta serviccunaca David tucui imata nishcacunata Saulman huillarca.

²⁵ Shina huillacpi Saulca: —Davidtaca: “Jatun mandacca ushimanta pagachunca mana munanchu. Ashtahuanpish pai jatun mandacta piñaccuna llaquichishcamanta patsac filisteocunata huañuchishpa paicuna charishca asha aicha carata pitishpa apamuchunmi munan” nigrichic— nirca. Saulca Davidta filisteocuna huañuchichun yuyashpami chashnaca nirca.

²⁶ Saulta serviccuna chashna huillacpimi, Davidca jatun mandacpac yerno alli cana cacpi, jatun mandacpac yerno tucunata yuyarirca. Saúl mandashca punzha manarac pactacpimi,

²⁷ Davidca paipac soldadocunahuan rishpa, ishcai patsac filisteocunata huañuchishpa, paicuna charishca aicha carata pitishpa jatun mandacman cungapac apamurca. Davidca jatun mandacpac yerno tucungapacmi chashna ruhuarca. Chaimantami Saulca paipac ushi Micalhuan Davidtaca cazarachirca.

²⁸ Ashtahuanpish Saulca Mandac Dios Davidhuan cactapish, paipac ushi Micalpish yallita cuyacta ricushpami,

²⁹ Davidtaca ashtahuan manchashpa, tucui paipac causaipi Davidtaca piñarca.

³⁰ Filisteocunata mandaccunaca macanacungapacmi shamushpa catirca. Chashna ima horas shamucpipish Saulta serviccunamanta yallica Davidmi ashtahuan atic carca. Chaimantami paitaca yallita cuyashpa, alli nic carca.