1 SAMUEL 17 - Dios Rimashcata Quillcashcami

Goliatta David huañuchishcamanta

¹ Filisteocunaca soldadocunata tandachishpami israelcunahuan macanacungapac Judá llactapi cac Soco pueblopi tandanacurca. Chashna tandanacushpaca Soco puebloman Azeca pueblohuan chaupipi tiyac Efes-damin pueblo ladopimi carpa huasicunata shayachishpa tiyarirca.

² Shinallatac Saulpish, israelcunata tandachishpami Ela pambapi carpa huasicunata shayachishpa tiyarirca. Chaipimi filisteocunahuan macanacungapac allichirirca.

³ Filisteocunaca shuc lado lomapimi carca. Cutin israelcunaca caishuc lado lomapimi carca. Chai lomacuna chaupipica shuc pugru pambami tiyarca.

⁴ Chashna cacpimi, filisteopuramanta Gat pueblopi causac macanacunata alli yachac Goliat llucshirca. Paica quimsa metro yalli altomi carca.

⁵ Paipac umapica bronce cascota churarishca, paipac cuerpopipish broncellamantatac ruhuashca churanata churarishcami carca. Chai churanaca pichca chunga canchis kilotami llasharca.

⁶ Changacunapipish broncellamantatac ruhuashca churanata churashcami carca. Paipac rigra jahuapi charicushca lanzapish broncellamantatacmi carca.

⁷ Paipac lanzaca telar pilluna caspi shina racumi carca. Chai lanzapac fierro puntaca canchis kilotami llashac carca. Paipac escudohuanca shuc runami ñaupashpa puric carca.

⁸ Goliat chashna shayarishpami tandanacushca Israel soldadocunataca: —¿Cancunaca imapactac macanacungapac allichiringuichic? Ñucaca filisteomi cani. Ashtahuanpish cancunaca Saulta serviccunallami canguichic. Ñucahuan macanacuchun cancunapuramanta shucta acllaichic.

⁹ Pai ñucahuan macanacushpa ñucata aticpica, ñucanchicca cancunata serviccunami tucushun. Ashtahuanpish ñuca paita aticpica, cancunami ñucanchicta servishpa causanguichic— nirca.

¹⁰ Shinallatac: —¡Cunanmi ñucaca Israel soldadocunahuan ricunacusha nini! ¡Ñucahuan macanacuchun shuc runata cachaichic!— nirca.

¹¹ Chai filisteo runa chashna nicta Saulpish, tucui israelcunapish uyashpaca munai mancharishpami upayarcacuna.

¹² Davidca Judá llacta Belén pueblopi causac efrateopuramanta Isaipac churimi carca. Isaica pusac churicunatami charirca. Saúl mandacui punzhacunapica ña yallita yuyacmi carca.

¹³ Isaipac quimsa punta churicunaca macanacuimanmi Saulta catishpa rirca. Chai quimsa churicunapac shuticunaca, Eliab, Abinadab shinallatac Samami carca.

¹⁴ Davidca tucuipac quipa churimi carca. Chai quimsa punta churicunaca Saultami catirca.

¹⁵ Ashtahuanpish Davidca Saulpacman rishpapish paipac taitapac ovejacunata michingapacmi Belenman rin cutin puric carca.

¹⁶ Filisteopuramanta Goliatca chishi, tutamantami chuscu chunga punzhacaman israelcunataca macanacushun nishpa llaquichic carca.

¹⁷ Isaica paipac churi Davidtaca: —Shuc efa trigo camchatapish, chunga tandatapish apashpa cambac huauquicuna tiyacuc carpa huasicunaman utca ri.

¹⁸ Shinallatac chunga quesellota huaranga soldadocunata mandacman apai. Cambac huauquicuna ima shina cashcata ricumungui. Paicuna alli cashcata yachangapacca imallatapish paicunapacta apamungui— nirca.

¹⁹ Chai shina cacpica, Saulpish, Davidpac huauquicunapish, tucui israelcunapish Ela pugru pambapimi filisteocunahuan macanacucurca.

²⁰ Davidca tutamanta utca jatarishpami ovejacunata cuidachunca shucta saquishpa, paipac taita saquimugrichun nishcacunata apashpa rirca. Pai ña chayacpica, tucui soldadocunami macanacungapac caparishpa llucshicurca.

²¹ Shinami Israel soldadocunapish, filisteo soldadocunapish allichirishpa macanacungapac chimbapurashpa shayarirca.

²² Davidca pai imalla apashcacunata micunatapish, macanacunatapish cuidac runaman saquishpami soldadocunapacman callpashpa rishpa, paipac huauquicunataca: “¿Allillachu canguichic?” nirca.

²³ David paipac huauquicunahuan parlacucpiracmi Gad pueblomanta macanacunata alli yachac Goliatca filisteo soldadocunapac chaupimanta llucshishpa ñaupaman rimashpa llaquichic shinallatac llaquichirca. Chaitami Davidca uyarca.

²⁴ Tucui israelcunami chai runata ricushpaca, yallita mancharishpa paipac ñaupamanta miticungapac callparca.

²⁵ Paicunaca: —Ñucanchicta rimashpa manchachic runa llucshimuctaca ¿Manachu ricunguichic? Maijanpish paita atic runataca jatun mandacca yalli chayuctami ruhuanga. Paipac ushihuanpish cazarachingami. Shinallatac paipac huasi ucupurapish mana impuestota pagangachu— nirca.

²⁶ Shina cacpimi, Davidca paipac ladopi caccunataca: —Cai filisteo runata huañuchishpa, israelcunata llaquichishpa rimacta tucuchicpica, ¿imatatac cunga? Causac Diospac soldadocunata llaquichic mana circuncisionta ruhuashca filisteo runaca, ¿imatacyari?— nirca.

²⁷ Shina nicpimi paicunaca: —Maijanpish chai runata aticmanca ñacaman nishca shinallatacmi cunga— nirca.

²⁸ Chashna parlanacucta uyashpami paipac punta huauqui Eliabca Davidhuan yallita piñarishpaca: —¿Imapactac caiman shamurcangui? ¿Shitashca pambapica, ashalla ovejacunataca pimantac saquimurcangui? Can cari tucushca cashcata, millai shungu cashcatapish yachanimi. Canca cai macanacuita ricungapacllami shamushcangui— nirca.

²⁹ Shina nicpimi Davidca: —Ñucaca ¿Imatatac ruhuashcaniyari? Rimana cashcallatami rimashcani— nirca.

³⁰ Paipac ladomanta anchurishpami, shuccunamanpish chashnallatac tapurca. Paicunapish caishuccuna nishca shinallatacmi nirca.

³¹ David tapushcata uyaccunaca Saulmanmi huillangapac rirca. Chaimantami Saulca Davidta cayachun cacharca.

³² Saulpacman David chayashpaca: —Chai filisteota ricushpaca, pi mana manchanachu canguichic. Chai filisteohuanca canta servic ñucami macanacungapac risha— nirca.

³³ Shina nicpimi, Saulca Davidtaca: —Canca huambraracmi cangui. Chaimanta chai filisteo runahuanca mana macanacui pudinguichu. Ashtahuanpish paica huambramanta pacha macanacunata alli yachac runami— nirca.

³⁴ Shina nicpimi, Davidca Saultaca: —Canta servic ñucaca ñuca taitapac ovejacunata michicmi cani. Chaipi michicucpi, león cashpa, oso cashpa oveja manadamanta shuc ovejata apacpica,

³⁵ cati rishpami chugrichishpa shimimanta quichuc carcani. Shina quichucpi, ñucata caningapac shamucpica, jazhamanta japishpami huactashpa huañuchic carcani.

³⁶ Canta servic ñucaca leonta cashpa, osota cashpa huañuchicllami carcani. Circuncisionta mana ruhuashca filisteo runaca causac Diospac soldadocunatami rimashpa llaquishca. Chaimanta paitapish chai animalta shinallatacmi huañuchisha— nirca.

³⁷ Chashnallatacmi Davidca: —Mandac Diosca leonpac, osopac shimimantapish quishpichircami. Paillatacmi cai filisteo runapac maquimantapish quishpichinga— nirca. Shina nicpimi, Saulca Davidtaca: —¡Shina cashpaca rilla! Mandac Dios canhuan cachun— nirca.

³⁸ Saulca paipac broncemanta ruhuashca churanacunatami Davidman umapipish cuerpopipish churachirca.

³⁹ Davidca paipac churana jahuallapitac espadata huarcuchishpami puri callarirca. Davidca jaicapi cai churanacunataca mana churaricchu carca. Chaimantami Davidca Saultaca: —Cai churanataca jaicapi mana churaricchu carcani. Chaimanta mana puri pudinichu— nirca. Shina nishpami chai churanataca tucui llucchishpa,

⁴⁰ tauna caspita japishpa, pichca yacu rumita acllashpa, michishpa purina mochilapi churarca. Chashnami paipac huaracata apashpa filisteopacman rirca.

⁴¹ Cutin filisteopish paipac escudota apac runata ñaupachishpami Davidpacman allimanta shamurca.

⁴² Chai filisteo Davidta ricushpaca, uchilla huambrarac cashcamantami yangapi churarca. Chai huambraca puca accha alaja ñahui huambrami carca.

⁴³ Chai filisteoca Davidtaca: —Caspicunahuan ñucata macangapac shamuchunca, ¿ñucaca allcuchu cani imatacyari?— nishpami tapurca. Paipac dioscunapac shutipimi Davidtaca maldiciarca.

⁴⁴ Shinallatac Filisteoca Davidtaca: —¡Cambac aichataca jahuata volac animalcunaman, sacha animalcunaman carangapac ñucapacman shamui!— nirca.

⁴⁵ Chaimantami Davidca chai filisteotaca: —Canca ñucahuan macanacungapacca espadahuan, uchilla lanzahuan, jatun lanzallahuanmi shamungui. Ashtahuanpish ñucaca tucuita Mandac Dios, Israel soldadocunapac Mandac Diospac shutipimi canhuan macanacungapac shamuni. Canca chai Diostami rimarishpa piñachircangui.

⁴⁶ Cunan Mandac Dios canta ñuca maquipi churacpimi, canta atishpa, cambac umata pitisha. Cunanmi cambac aichatapish, filisteo soldadocunapac aichatapish jahuata volac animalcunaman, sacha animalcunaman carasha. Chashna ruhuacpimi, tucui cai pachapi causaccunaca israelcunapac Dios tiyashcata yachangacuna.

⁴⁷ Shinallatac Mandac Diosca mana espadahuan, mana lanzahuan quishpichic cashcatami tucui caipi cac gentecunaca yachanga. ¡Cai jatun macanacuica Mandac Diospacmi! ¡Paimi cantaca ñucanchic maquipi churanga!— nirca.

⁴⁸ Chai filisteo Davidhuan macanacungapac cuchuyamucpimi, Davidca chai filisteopacman utca callpashpa, macana pushtupi tupagrirca.

⁴⁹ Chashna tupashpami Davidca paipac mochilamanta shuc rumita llucchishpa, huaracapi churashpa, chai filisteo runapac frentepi shitarca. Chai rumi chugrichishpa frentepi yaicushpa saquiricpimi, chai filisteoca pambapi ñahuihuan urmarca.

⁵⁰ Shinami Davidca chai filisteotaca huaracahuan, shuc rumillahuan huañuchirca. Paica shuc espadallatapish maquipica mana charircachu.

⁵¹ Chashnami callpashpa chai filisteopac jahuapi shayarishpa, paipacllatac espadata llucchishpa umata pitirca. Filisteocunaca paicunapuramanta jatun sinchi runata huañuchishcata ricushpami callparcacuna.

⁵² Chashna callpacpimi, israelcunapish, Judá llacta gentecunapish caparishpa pugru pambapi tiyac Gat, Ecrón pueblo yaicunacaman filisteocunataca catircacuna. Filisteocuna huañushca cuerpocunaca Saaraim pueblo ñanmantaca Gat Ecrón pueblocunacamanmi siricurca.

⁵³ Israelcunaca filisteocunata huañuchishpa cutimushca quipami filisteocunapac carpa huasipi yaicushpa, ima tiyashcacunataca tucui aparcacuna.

⁵⁴ Davidca chai filisteopac umataca Jerusalenmanmi aparca. Ashtahuanpish chai filisteopac macanacunataca paipac carpa huasipimi huacaichirca.

⁵⁵ Chai filisteohuan macanacungapac David ricta Saúl ricushpami paipac soldadocunata mandac Abnertaca: —¿Chai huambraca pipac churitac?— nishpa tapurca. Shina tapucpimi Abnerca:

⁵⁶ —¡Jatun mandaclla, pipac churi cactaca mana yachanichu! Cambac causaimanta nini— nirca. Shina nicpimi, jatun mandacca: —Chai huambra pipac churi cacta tapugri— nirca.

⁵⁷ Chai filisteota huañuchishpa David umata apashpa chayacpimi, Abnerca chai umataca Saulpacman aparca.

⁵⁸ Chaipimi Saulca: —¿Canca pipac churitac cangui?— nishpa tapurca. Shina tapucpi Davidca: —Ñucaca Belén pueblomanta canta servic Isaipac churimi cani— nirca.