1 SAMUEL 15 - Dios Rimashcata Quillcashcami

Saúl Mandac Diosta mana cazushcamanta

¹ Chai quipami Samuelca Saultaca: —Mandac Diosmi pai acllashca israelcunata jatun mandac cachun cantaca aceitehuan cahuichun ñucata cacharca. Chaimanta cunanca Mandac Dios ima nishcata alli uyangui.

² Tucui imatapish ruhuac Mandac Diosca: “Amalecitacuna israelcunata ima ruhuashcamantaca ñucami llaquichigrini. Paicunaca Egiptomanta huichai shamucucpimi, ñanpi jarcarcacuna.

³ Shina cashcamanta amalecitacunata tucui huañuchigri. Paicuna ima charishcacunataca mana llaquishpa tucui chingachingui. Caricunata, huarmicunata, huahuacunata, chuchucuc huahuacunata, vacacunata, ovejacunata, camellocunata, burrocunatapish mana llaquishpa tucui huañuchingui” ninmi— nirca.

⁴ Shina nicpimi, Saulca Telaim puebloman soldadocunata cayashpa yuparca. Chaquillahuan ric soldadocunaca ishcai patsac huarangami carca. Judá llactamanta soldadocunaca chunga huarangami carca.

⁵ Chai quipami Saulca amalecitacunapac puebloman rishpa, chai pueblo lado pugru pambapi pacalla chapaccunata churarca.

⁶ Chai quipaca chaipi causac ceneocunata Saulca: —Cancuna paicunahuan pacta mana huañungapacca paicunapac chaupimanta llucshichic. Cancunaca israelcuna Egiptomanta shamucucpica llaquishpami, allita ruhuarcanguichic— nirca. Shina nicpimi, ceneocunaca amalecitacunapac pueblomanta utca llucshi rirca.

⁷ Saulca amalecitacunataca Havila llactamantaca Shur llactacamanmi huañuchirca. Shur llactaca Egiptomanta inti llucshic ladomanmi carca.

⁸ Amalecitacunata jatun mandac Agagtaca causacta prezushpami, tucui gentecunataca espadahuan huañuchirca.

⁹ Saulpish, paipac soldadocunapish Agagtaca mana huañuchircachu. Shinallatac alli ovejacunatapish, huagracunatapish, tucui huira animalcunatapish, cari ovejacunatapish, tucui allicunataca mana tucuchishpami imapish mana valic yangacunallata tucui tucuchirca.

¹⁰ Chai quipami Mandac Diosca Samueltaca:

¹¹ —Saulta jatun mandac cachun churashcamantaca yallitami llaquirini. Paica ñucamanta anchurishpami ñuca mandashcataca mana pactachirca— nirca. Shina nicpimi, Samuelca yallita llaquirishpa Mandac Diostaca tucui tuta mañarca.

¹² Chai quipami Samuelca manarac alli punzhayacpi, utca jatarishpa Saulhuan tupangapac rirca. Samuel chaiman chayacpica: —Saulca ñami Carmel puebloman rirca. Riquichic, paita yuyarina pircata shayachishpami Gilgal puebloman muyushpa urai rirca— nirca.

¹³ Samuel Saulpacman chayacpimi paica: —¡Cantaca Mandac Dios bendiciachun! Mandac Dios mandashcataca ñami pactachini— nirca.

¹⁴ Shina nicpimi Samuelca: —Shinashpaca ¿Ima nishpatac ovejacuna, vacacuna huacashca ñuca ringripica uyaricunyari?— nishpa tapurca.

¹⁵ Shina tapucpi Saulca: —Amalecitacunapac ashtahuan alli ovejacunata, vacacunatami soldadocunaca mana huañuchishpa, canta Mandac Diosman cushpa huañuchingapac apamushca. Ashtahuanpish shuccunataca tucuimi tucuchircacuna— nirca.

¹⁶ Shina nicpimi, Samuelca Saultaca: —¡Ña chailla! Cunan tuta Mandac Dios ima nishcatami canman huillagrini— nirca. Shina nicpimi Saulca: —Huillailla— nirca.

¹⁷ Shina nicpimi Samuelca: —Can, cambac yuyaipi yanga runami cani yuyacpipish, ¿manachu cantaca Israel aillucunata mandac cachun churarca? Mandac Diosmi cantaca Israel llactata jatun mandac cachun aceitehuan cahuishpa acllarca.

¹⁸ Chaimantami Mandac Diosca cantaca: “Juchata ruhuac amalecitacunata tucuchigri” nishpa mandarca.

¹⁹ ¿Ima nishpatac Mandac Dios mandashcata mana cazushpa, chai piñaccunapac ima tiyashcacunata apamushpa, Mandac Diospac ñaupapica mana allita ruhuarcangui?— nirca.

²⁰ Shina nicpimi, Saulca Samueltaca: —Ashtahuanpish Mandac Dios mandashpa imata ruhuachun nishcata pactachircanimi. Chaimantami amalecitacunata jatun mandac Agagtaca prezushpa amalecitacunataca tucui tucuchircani.

²¹ Ashtahuanpish soldadocunami ashtahuan alli ovejacunata, vacacunata canta Mandac Diosman cushpa Gilgal pueblopi rupachingapac apamurca— nirca.

²² Shina nicpimi Samuelca: —Mandac Diosca, ¿paiman cushpa, tucui rupachicpi, paiman animalcunata cushpa huañuchicpichu cushicunga? Ashtahuanpish pai mandashcata cazunami Diosman animalta huañuchinatapish ashtahuan yalli alli can. Shinallatac ovejacunapac huirata cunapac randica pai nishcata uyanami ashtahuan alli can.

²³ Paita mana cazunaca adivinashpa juchallishca shinami can. Sinchi shungu canapish ruhuashca dioscunata adorashpa causacuc shinami can. Chashna ruhuashpa, Mandac Diospac shimita yangapi churashcamantaca cantapish jatun mandac cashcamanta anchuchishcami cangui— nirca.

²⁴ Shina nicpimi, Saulca Samueltaca: —Shinashpaca juchatami ruhuashcani. Mandac Dios mandashcatapish, can ima nishcatapish mana cazushcanichu. Gentecunata manchashpami paicuna ima mañashcata ruhuachun saquircani. Shina cacpipish, ñuca juchata perdonai.

²⁵ Mandac Diosta alli nishpa mañangapac ñucahuan cutishun— nirca.

²⁶ Shina nicpimi, Samuelca Saultaca: —Canhuanca mana cutishachu. Canca Mandac Diospac shimitami yangapi churarcangui. Chaimantami Mandac Diospish cantaca yangapi churashpa, Israel llactata jatun mandac cashcamanta anchuchigrin— nirca.

²⁷ Chashna nishpami Samuelca cutishpa ri callarirca. Ña ricucpimi, Saulca Samuelpac jahualla churanata puntamanta chutarca. Chashna chutacpimi, chai churana puntaca lliquirirca.

²⁸ Shina lliquiricpimi Samuelca: —Mandac Diosca can chashna lliquishca shinami Israel llactata can mandanata quichushpa cambac ricsishca canta yalli ashtahuan alli runaman curca.

²⁹ Israelcunapac sumaimana Diosca imata ruhuasha nishpaca mana llullashpami ruhuan. Paica mana gentecuna shinachu quipata llaquirin— nirca.

³⁰ Shina nicpimi Saulca: —Ñucaca juchatami ruhuashcani. Shina cacpipish, israelcunata pushac yuyaccunapac ñaupapish, israelcunapac ñaupapipish jatun mandac cashca shinallatac ñucata alli ningui. Canta Mandac Diosta alli nishpa mañangapac ñucahuan cutishun— nirca.

³¹ Shina nicpimi, Samuelca Saulta catishpa cutirca. Saulca Mandac Diosta alli nircami.

³² Chai quipami Samuelca: «¡Amalecitacunata jatun mandac Agagta pushamuichic!» nirca. Agagca: «Llaquinayaita ñuca huañunamantaca ña quishpirinimi» yuyashpami, Samuelpacman cushilla cuchuyarca.

³³ Ashtahuanpish Samuelca: «¡Canca, cambac espadahuan huahuacunata huañuchishpami achca huarmicunata huahua illacta saquircangui! Chashnallatacmi cambac mamapish chai huarmicunapac chaupipica huahua illac saquiringa» nirca. Shina nishpami Agagtaca pitinacushpa Gilgal pueblopi Mandac Diospac ñaupapi huañuchirca.

³⁴ Chai quipami Samuelca Ramá puebloman rirca. Shinallatac Saulpish Gabaa pueblopi cac paipac huasiman rirca.

³⁵ Samuelca pai huañungacamanmi Saultaca maipi mana ricurca. Mandac Dios Israel llactata jatun mandac cachun Saulta churashcamanta mai llaquiricpimi, Samuelpish Saulmantaca mai huacarca.