1 SAMUEL 14 - Dios Rimashcata Quillcashcami

Jonatán macanacushpa mishashcamanta

¹ Shuc punzhami Saulpac churi Jonatanca escudota apac runataca: —Chimbapi cuidacuc filisteocunahuan macanacungapac pasashun— nirca. Shina rishpapish paipac taita Saulman mana huillashpami rirca.

² Saulca Gabaa urcu chaquipi shayacuc granadilla yura ladopimi sucta patsac shina gentecunahuan carca. Chai yuraca Migrón pueblo ladopimi shayacurca.

³ Ahitob runapac churi Ahiasmi efod nishcacunata apac carca. Ahitobca Fineespac churimi carca. Shinallatac Icabodpac huauquimi carca. Fineesca Elí curapac churimi carca. Elica Silo pueblopimi Mandac Diosta servic cura carca. Israelcunaca Jonatán rictaca mana yacharcacunachu.

⁴ Ashtahuanpish filisteocuna cuidacuc ladoman chayangapacca Boses, Sene jatun rumi quingrai chaupitami Jonatanca pasana carca.

⁵ Jahuaman cac rumi quingraica Micmas pueblohuan chimbapurapimi carca. Uraman cac rumica Gabaa pueblohuan chimbapurapimi carca.

⁶ Jonatanca paipac escudota apac runataca: —Circuncisionta mana ruhuashca soldadocunapac ladoman pasashun. Mandac Diosca ñucanchicta ayudangapishchari. Mandac Diospacca imapish mana sinchichu. Ñucanchic achca cacpipish ashalla cacpipish paica mishachingami— nirca.

⁷ Shina nicpimi, escudota apac runaca: —Cambac shungupi ima munashcata ruhuailla. Ñucaca can munashcata ruhuangapac caipimi cani— nirca.

⁸ Shina nicpimi Jonatanca: —Riqui, ñucanchicca chai runacunapacman pasashpa, paicunapac ñahuipi ricurishun.

⁹ Paicuna ricushpa: “Ñucanchic cancunapacman urai shamungacaman shuyaichic” nicpica, paicunapacman mana huichai rishpa shuyashun.

¹⁰ Ashtahuanpish paicuna: “Ñucanchicpacman huichai shamuichic” nicpica, paicunapacman huichai rishunmi. Paicuna huichai shamuichic nishpaca paicunata Mandac Dios ñucanchic maquipi churashcatami ricuchin— nirca.

¹¹ Ishcaitacmi filisteo soldadocunapac ñahuipi ricurirca. Chashna ricuricpimi filisteocunaca: «¡Riquichic, israelcunami miticushpa tiyacushca jutcumanta llucshicuncuna!» nirca.

¹² Chai quipami cuidac filisteocunaca Jonatantapish, escudota apac runatapish caparishpaca: «¡Ñucanchicpacman shamuichic, cancunaman shuc huillanatami charinchic!» nirca. Chashna nicpimi, Jonatanca escudota apac runataca: «Mandac Diosca paicunataca israelcunapac maquipimi churashca. Cunanca jacuchic, canca ñucata cati» nirca.

¹³ Jonatanca japirishpa, japirishpami huichai rirca. Huashataca paipac escudota apac runami catirca. Jonatán filisteocunata macashpa urmachicpica, escudota apac runami huañuchishpa catirca.

¹⁴ Chashnami cai punta macanacuipica Jonatanhuan paipac escudota apac runahuanca ishcai chunga shina filisteocunata uchilla pambapi huañuchirca.

¹⁵ Chaimantami carpa huasicunapi caccunapish, pambapi caccunapish tucui gentecuna yallita mancharirca. Cuidac soldadocunapish, cungailla yaicushpa macac soldadocunapish munaimi mancharirca. Allpapish chucchurcami. Chaimantami yallita mancharishpa imatapish mana ruhuai pudircacuna.

¹⁶ Saulpac chapac soldadocunaca Benjamín llactapi cac Gabaa pueblomantami filisteocuna caita chaita callpacucta ricurca.

¹⁷ Chaimantami Saulca paihuan cac soldadocunataca: «Ñucanchicpuramantaca maijan illacta alli ricuichic» nirca. Shina nicpi, tucuita alli ricucpica, Jonatanpish, paipac escudota apac runami illashca carca.

¹⁸ Shina cacpimi, Saulca Ahías curataca: «¡Diospac Arcata caiman apamui!» nirca. Chai punzhacunaca Diospac Arcataca israelcunami charicurca.

¹⁹ Saúl Ahías curahuan parlacucllapitacmi filisteocunapac carpa huasicunapica ashtahuan caparinacui uyarirca. Chaimantami Saulca chai curataca: —¡Ña ama apamuichu!— nirca.

²⁰ Saulca paipac tucui soldadocunata tandachishpami, macanacungapac rirca. Filisteocunaca yuyai illac tucushpami, paicunapura espadahuan huañunacurca.

²¹ Utcapi filisteocunahuan causac caishuc israelcunapish israelcunahuan macanacungapacmi filisteocunapac carpa huasicunaman shamurca. Paicuna filisteocunahuan causaccuna cashpapish Saulhuan, Jonatanhuan cac israelcuna partemi tucurcacuna.

²² Shinallatac Efraín urcupi miticushpa tiyacuc israelcuna filisteocuna miticushpa callpacucta ricushpaca, paicunapish macanacungapac llucshircacunami.

²³ Chashnami Mandac Diosca chai punzhaca israelcunataca quishpichirca. Macanacuica Bet-avén pueblocamanmi chayarca.

Saúl manchaipi churashcamanta

²⁴ Shina macanacuita mishashca cacpipish Saulca: «Ñucaca, ñucata piñaccunata paicuna llaquichishca shina, manarac tutayacpi llaquichingacaman mana micushachu. Maijanpish micuctaca mana alli nishcami canga» nishpami ari nichishca carca. Chaimantami tucui gentecuna imatapish mana micushpa yalli yarcaihuan huañunalla carca.

²⁵ Chai quipaca tucui soldadocuna sachaman rishpami, tucui pambapi bunga mishquita ricurcacuna.

²⁶ Chai sachaman yaicushpaca, abeja mishqui yacu shina callpacuctami ricurca. Shina ricushpapish ama imatapish micuchun nishpa ari nichishcamantami manchashpa ashallatapish mana mallirca.

²⁷ Ashtahuanpish Jonatanca paipac taita tucui gentecunata ama micunguichicchu nishpa ari nichishcataca mana uyashcachu carca. Chaimantami pai charicushca caspi puntata chai mishqui harneropi satishpa micushpa sinchiyarca.

²⁸ Chashna ruhuacpimi, paicunapuramanta shuc runaca: —Cambac taitami soldadocunataca: “Maijanpish micuctaca mana alli nishcami canga” nishpami ari nichirca. Chaimantami soldadocunaca yarcaihuan huañunalla canchic— nirca.

²⁹ Chashna nicpimi Jonatanca: —Ñuca taitaca cai llactapi causaccunataca pandachishcami. Riquichic, abeja mishquita ashata mallishpaca ashtahuan sinchiyanimi.

³⁰ ¡Filisteocunamanta ima quichushcacunata gentecuna micuchun saquishca cacpica, ashtahuan allimi canchicman carca. Chashna cashpaca ashtahuanmi filisteocunataca huañuchinchicman carca!— nirca.

³¹ Chai punzhapica Micmas pueblomanta Ajalón pueblocamanmi filisteocunataca chugrichishpa huañuchirca. Shina cashpapish Israel soldadocunaca munaimi shaicurcacuna.

³² Chaimantami soldadocunaca chai quichushca ovejacunata, vacacunata, becicunata huañuchishpa aichataca yahuarndi micurcacuna.

³³ Chaita ricushpami Saulman huillashpaca: —¡Gentecunaca aichata yahuarndi micushpami Mandac Diosta mana cazushpa juchallicuncuna!— nishpa huillarca. Shina huillacpimi Saulca: —¡Cancunaca mana cazuccunami canguichic! Shuc jatun rumita tangashpa caiman apamuichic— nirca.

³⁴ Shinallatac: —Tucui cancuna caita chaita rishpa: “Huagrata, ovejata caiman apamushpa huañuchishpa micuichic. Aichata yahuarndi micushpa, Mandac Diosta mana cazushpa ama juchallichicchu” ninmi nigrichic— nirca. Shina nicpica, tucui gentecunami chai tutallatac paicunapac huagracunata apamushpa huañuchirca.

³⁵ Cutin Saulca Mandac Diosmanmi shuc altarta ruhuarca. Chai altartami Mandac Diosmanca punta ruhuarca.

³⁶ Chai quipami Saulca: —Cunan tutallatac filisteocunahuan macanacungapac urai rishpa achicyangacaman paicunata huañuchishpa, paicunapac charishcata quichumushun— nirca. Shina nicpimi gentecunaca: —Imapish canman alli ricurina cacpica, chaita ruhuailla— nircacuna. Chashna nicpimi, shuc curaca: —Manarac macanacuiman rishpa Mandac Diosman cuchuyashunchic— nirca.

³⁷ Shina nicpimi, Saulca Mandac Diostaca: —¿Filisteocunata llaquichishpa catishunchu? ¿Paicunataca israelcunapac maquipi churanguichu?— nishpa tapurca. Shina tapucpipish, chai punzhaca Mandac Diosca imata mana nircachu.

³⁸ Chaimantami Saulca: —Soldadocunata tucui mandaccuna caiman tandanacuichic. Maijan ima juchata ruhuashcata tapushpa yachaichic.

³⁹ ¡Israelcunata quishpichic Mandac Diospac shutipimi nini: Maijan cashpapish, ñuca churi Jonatán cashpapish, juchata ruhuashca cashpaca huañungatacmi!— nirca. Shina nicpipish, soldadocunaca imata mana nircacunachu.

⁴⁰ Chaimantami Saulca israelcunataca: —Cancunaca shuc ladoman shayarichic. Ñucaca ñuca churi Jonatanhuan caishuc ladoman shayarishun— nirca. Shina nicpimi, gentecunaca Saultaca: —Canman ima alli cana cacpica chaita ruhuailla— nirca.

⁴¹ Shina nicpimi, Saulca israelcunata Mandac Diostaca: —Suerteta ruhuacpica, chashnatac cashcata ricuchinguiyari— nirca. Suerteta ruhuacpica Jonatanpi, Saulpimi urmarca. Gentecunaca mana llaquichishcachu saquirirca.

⁴² Chai quipami Saulca: —Ñucahuan, ñuca churi Jonatanhuan suerteta ruhuaichi— nirca. Shina ruhuacpica Jonatanmanmi urmarca.

⁴³ Chaimantami Saulca Jonatantaca: —¿Imatatac ruhuarcangui? Chaita huillai— nirca. Shina nicpimi Jonatanca: —Ari, ñuca charicushca caspi puntahuanmi asha abeja mishquita mallircani. Chaimantaca huañunatacmi cani— nirca.

⁴⁴ Shina nicpimi Saulca: —¡Mandac Dios chashna ruhuachun! Canta mana huañuchicpica, Mandac Dios chaitapish yallita llaquichichun— nirca.

⁴⁵ Shina nicpi, israelcunaca Saultaca: —¿Jonatanca macanacushpa israelcunata quishpichishca jahuachu huañugrin? ¡Chaitaca Dios ama munachun! ¡Mandac Diospac shutipimi nini: Paipac umamantaca shuc acchallapish mana allpapi urmangachu! Paica Mandac Dios ayudacpimi macanacuita misharca— nirca. Shinami Jonatanta mana huañuchishpa quishpichirca.

⁴⁶ Saulca filisteocunata catishpa llaquichinataca saquircami. Filisteocunapish paicuna causana pushtumanmi cutircacuna.

⁴⁷ Saulca Israel llactapi jatun mandac tucushpami, muyundi llactapi causac paita piñac Moab, Amón, Edom llactapi causaccunahuan, Soba llactata jatun mandac-huan, filisteocunahuan macanacurca. Maiman rishpapish paica aticmi carca.

⁴⁸ Shinallatac achca soldadocunata tandachishpami amalecitacunahuan macanacushpa atirca. Chashnami israelcunataca paicunapac ima charishcata quichuccunapac maquimanta quishpichirca.

⁴⁹ Saulpac churicunaca Jonatán, Isúi, Malquisuami carca. Shinallatac paica ishcai ushicunatami charirca. Punta ushica Merab quipa ushica Micalmi carca.

⁵⁰ Saulpac huarmica Ahimaaspac ushi Ahinoammi carca. Saulpac soldadocunata mandacca Nerpac churi Saulpac tio Abnermi carca.

⁵¹ Saulpac taita Cispish, Abnerpac taita Nerpish, Abielpac churicunami carca.

⁵² Saúl causacuc tucui huatacunapimi filisteocunahuanca yallita macanacushpa causarcacuna. Saulca maijanpish sinchi mana manchac runata ricushpaca, paipac soldado cachunmi tandachic carca.