1 SAMUEL 12 - Dios Rimashcata Quillcashcami

Samuel, Saúl mandanata israelcunaman huillashcamanta

¹ Tucui israelcunatami Samuelca: —Riquichic, cunanca cancuna tucui ima mañashcata uyashpami ñucaca cancunaman jatun mandacta churani.

² Riquichic, cunanca cai jatun mandacmi cancunapac ñaupata ringa. Ñucaca ña yuyac, yurac accha jundami cani. Shina cacpipish, ñuca churicunaca cancunahuanmi. Ñucaca huambramanta pacha cunan punzhacamanmi cancunataca pushacushcani.

³ Cunanpish caipimi cani. Cunan imatac nina cashpapish, mandac Diospac ñaupapi nichiclla. Huagrata cashpa, burrota cashpa maijanmanta quichushca cacpica, ñahui ñahui nichiclla. Maijanta cashpapish yanga juchanchishpa llaquichishca cacpi, mana cashpaca maijanmanta imatapish pacalla japishpa ñahuita huichcac shina mana ima nishpa saquishca cacpica huillaichiclla. Ñucaca cancunaman ima cutichina cacpipish cutichishallami— nirca.

⁴ Shina nicpimi paicunaca: —Pita mana juchanchircanguichu, mana llaquichircanguichu. Maijanpac maquimantapish imata mana japircanguichu— nircacuna.

⁵ Shina nicpimi Samuelca: —Cunanca Mandac Diospish, paillatac churashca jatun mandacpish ricucunmi. Ñucataca imata juchanchinata mana charinguichicchu— nirca. Shina nicpimi paicunaca: —¡Ari, chashnami can!— nirca.

⁶ Shina nicpimi, Samuelca israelcunataca: —Cancunapac taitacunata Egiptomanta llucchichun Moisesta, Aaronta acllashpa cachac Mandac Diosmi ricucun.

⁷ Cunanca cancunamanpish, cancunapac ñaupa taitacunamanpish Mandac Dios allita ruhuashcatami Mandac Diospac ñaupapi sinchita rimagrini. Cunanca alli uyaichic.

⁸ Egiptoman Jacobo paipac huahua huahuacunandi chayacpica, yallitami chaipi causaccunaca llaquichirca. Chaimantami Mandac Diostaca caparishpa mañarca. Chashna cacpimi, cancunapac taitacunata Egiptomanta llucchichun Moisesta, Aaronta Mandac Diosca cacharca. Paicuna llucchishpami, cai llactapi causachun churarca.

⁹ Ashtahuanpish paicunaca paicunata Mandac Diosta cungarircami. Chaimantami Hazor pueblomanta soldadocunata mandac Sisarapac maquipi, filisteocunapac maquipi, Moab llactata jatun mandacpac maquipi churarca. Chai mandaccunami macanacungapac shamurca.

¹⁰ Chaimantami paicunaca Mandac Diostaca: “Mandac Diosta saquishpa Baal, Astarte yangalla dioscunata servishpami juchallishcanchic. Cunanca ñucanchicta piñaccunapac maquimanta quishpichiyari. Canllatacmi servishpa causashun ninchic” nishpa caparishpa mañarca.

¹¹ Chaimantami Mandac Diosca cancunapac muyundipi causac cancunata piñaccunapac maquimanta quishpichichun Jerobaalta, Baracta, Jefteta shinallatac Samuelta cacharca. Chaimantami ima llaquipish mana japicpi, sumacta causarcanguichic.

¹² Ashtahuanpish amonitacunata jatun mandac Nahas cancunata piñashpa macanacungapac shamucta yachashpaca: “Ñucanchicta mandachunca shuc jatun mandactami munanchic” nircanguichic. Cancunata Mandac Dios cancunapac jatun mandac cacpipish, shuctac mandacta charinatami munarcanguichic.

¹³ Cunanca cancuna mañashpa acllashca jatun mandacca caipimi. Mandac Diosllatacmi cancunata mandachun churarca.

¹⁴ Cancunapish, cancunata mandacpish Mandac Diospac ñaupapi allita causaichic. Paita servishpa, cazushpa, pai mandashcacunata pactachishpa causashpaca allimi causanguichic.

¹⁵ Ashtahuanpish Mandac Dios mandashcacunata mana cazushpa, pai nishcatapish mana uyashpa cariyacpica paipac maquihuanmi cancunatapish, cancunata mandactapish llaquichinga.

¹⁶ Cunanca Mandac Dios cancunapac ñaupapi sumaimana ricuchinata ricuchigricushcata ricungapac shuyaichic.

¹⁷ Cunanca mana tamya punzhacunachu, ashtahuanpish trigota cosechana punzhacunami. Shina cacpipish, ñucaca Mandac Dios tamyachichunmi mañagrini. Paica relampatapish, tamyatapish yallitami cachanga. Chaita ricushpami, cancunaca shuctac jatun mandacta munanchic nishpa Mandac Diospac ñaupapi yalli mana allita ruhuashcata yachanguichic— nirca.

¹⁸ Shina nishca quipami Mandac Diosta caparishpa Samuel mañacpica, Mandac Diosca relampatapish, tamyatapish chai punzhapica yallita cacharca. Shina ruhuacpimi Mandac Diostapish, Samueltapish tucui gentecuna yallita mancharca.

¹⁹ Chaimantami tucui gentecuna Samueltaca: —¡Canta servic ñucanchic ama huañuchun canta Mandac Diosta mañaiyari! Ñucanchicca tucui juchacunata ruhuashca jahuami jatun mandacta munanchic nishpa ashtahuan mana allita ruhuashcanchic— nirca.

²⁰ Shina nicpimi Samuelca: —Ama manchaichicchu. Ari cunanca cai tucui juchatami ruhuarcanguichic. Shina cacpipish, chai tucuita ruhuashcamantaca cunanca, Mandac Diosta catinataca mana saquishpami, tucui shunguhuan servina canguichic.

²¹ Yanga dioscunata ama catichicchu. Paicunaca yanga cashcamanta imapac mana servinchu. Mana quishpichinchu.

²² Ashtahuanpish Mandac Diosca paipac shuti jatun cashcamantaca pai acllashcacunata mana chingachingachu. Mandac Diosca paipaclla cachunmi cancunataca acllarca.

²³ Ñucamanta nishpaca, cancunamanta Mandac Diosta mañanata saquishpa juchallichunca Dios ama munachun. Ashtahuanpish cancunataca allita purichun, sumacta causachun yachachishallami.

²⁴ Mandac Diosllatac manchashpa, tucui shunguhuan servishpa causaichic. Cancunamanca Mandac Diosca achca allicunata ruhuashcataca allitami yuyarina canguichic.

²⁵ Ashtahuanpish mana allita ruhuashpa catishpaca cancunapish, cancunata jatun mandacpish huañunguichicmi— nirca.