1 SAMUEL 11 - Dios Rimashcata Quillcashcami

Saúl amonitacunata atishcamanta

¹ Chai quipami amonitacunata mandac Nahasca llactapi cac Jabes-galaad llactapi causaccunahuan macanacungapac soldadocunahuan huichai rishpa, carpa huasicunata shayachishpa tiyarirca. Ashtahuanpish Jabes llactapi causaccunaca Nahastaca: —Ñucanchic-huan mana macanacungapac ari ni. Shina ari nicpica, canta servishpami causashun— nirca.

² Shina nicpimi, amonitacunapuramanta Nahasca: —Ari, cancuna mañashcata ruhuashami. Shina cacpipish, tucui cancuna alli lado ñahuita surcushpa, israelcunata pingaichicpimi, chai ari nishcataca pactachisha— nirca.

³ Shina nicpimi, Jabes pueblota pushac yuyaccunaca: —Ñucanchic tucui Israel llactapi causaccunaman huillachingacaman canchis punzhata shuyai. Pipish ñucanchicta mana quishpichingapac shamucpica, cambacllamantami shamushun— nirca.

⁴ Huillachun cachashca runacuna Saúl causacuc Gabaa puebloman chayashpaca tucui gentecunamanmi cai llaquita huillarca. Chaita uyashpami, tucui gentecuna caparishpa huacarca.

⁵ Saulca huagracunahuanmi pambamanta shamucurca. Chashna rishpaca: —¿Ima nishpatac gentecunaca cashna huacacun?— nishpa tapurca. Shina tapucpimi, Jabes pueblomanta shamuc runacuna ima nishcata tucui huillarca.

⁶ Shina nishcata Saúl uyacpimi, Diospac Espirituca Saulpacman shamurca. Shina shamucpimi, paica nina japiric shina yallita piñarirca.

⁷ Shina piñarishpami ishcai huagracunata japishpa, pitinacushpa tucui Israel llactapi causaccunaman ricuchichun huillaccunata cacharca. Paicunataca: «Maijanpish Saulhuan Samuelhuan tandanacungapac mana llucshic runacunapac huagracunatapish, chashnallatacmi ruhuanga» nichun cacharca. Shina cachacpimi, Mandac Dios cachashca manchaica chai gentecunapac jahuapi urmarca. Chaimantami paicunaca shuc shinalla tandanacushpa llucshirca.

⁸ Bezec pueblopi Saúl yupacpica, israelcunaca quimsa patsac huaranga runacunami carca. Cutin Judá aillumantaca quimsa chunga huaranga runacunami carca.

⁹ Chai quipami huillangapac shamuc runacunataca: —Galaad llactapi cac Jabes pueblopi causaccunataca: “Caya punzha inti yallita rupachicuc horasmi cancunataca quishpichishun” ninmi nigrichic— nirca. Huillac runacunaca Jabes puebloman cutimushpaca tucui ima nishcatami huillarca. Shina huillacpimi, chaipi causaccunaca yallita cushicurca.

¹⁰ Chaimantami Jabes pueblopi causaccunaca: —Cayami ñucanchicca cancunapacman llucshimushun. Chaipica cancuna munashcata ruhuanguichiclla— nirca.

¹¹ Ña cayandi punzha manarac alli achicyacpimi Saulca paipac soldadocunata quimsapi chicanyachishpa amonitacunapac carpa huasi chaupiman yaicurca. Chashna yaicushpaca intihuan punzha cunurina horascamanmi macashpa chugrichishpa huañuchirca. Chaimantami mana huañuccunaca caita chaita callparcacuna, pipish ishcaipuraca mana saquirircachu.

¹² Chai quipami israelcunaca Samueltaca: —¿Picunatac: “¿Saulchu ñucanchictaca mandagrin?” nishpa rimaccunaca? ¡Chai runacunata huañuchingapac ñucanchicman cuichic!— nirca.

¹³ Shina nicpimi Saulca: —Cunanmi Mandac Diosca israelcunata macanacuipi ayudashpa mishachishca. Chaimanta cunan punzhaca maijanpish mana huañungachu— nirca.

¹⁴ Chai quipami Samuelca israelcunataca: —¡Cai llactata mandacta allita churangapac Gilgal puebloman jacuchic!— nirca.

¹⁵ Shina nicpimi, tucui israelcuna Gilgal puebloman rirca. Chaipimi Mandac Diospac ñaupapi Saultaca jatun mandac cachun churarca. Chai quipami Mandac Dios-huan alli cangapac animalcunata cushpa huañuchirca. Chashna ruhuashpami Saulpish, tucui israelcunapish yallita cushicurca.