1 SAMUEL 10 - Dios Rimashcata Quillcashcami

¹ Chai quipami Samuelca pai charishca botellamanta aceiteta Saulpac umapi tallishpa muchashpaca: —Cantaca Mandac Diosmi pai acllashca israelcunata mandachun aceiteta tallishpa cahuirca.

² Cunan ñucapacmanta can rishpaca, Benjamín llacta Selsa pueblopimi Raquelta enterrashca ladopi ishcai runacunahuan tupangui. Paicunaca: “Can mashcacushca burrocunaca ñami taririshca. Cambac taitaca chingarishca burrocunamantaca mana llaquiricunchu. Ashtahuanpish cancunamanta llaquirishpami: ‘Ñuca churica mana uyarinchu. ¿Imatatac ruhuashayari?’ nicun” ninga.

³ Chaimanta ashtahuan rishpaca, Tabor pambapi shayacuc encina yura ladopimi Bet-el pueblopi Diosta mañangapac huichai ricuc quimsa runacuna tupanga. Paicunaca shucca quimsa chivota, shucca quimsa mishqui tandata, shucca shuc shila vinota apashpami ricungacuna.

⁴ Paicunaca ¿Allillachu cangui? nishpami, ishcai tandata cungacuna. Shina cucpica japinguilla.

⁵ Chaimanta rishpaca, filisteo soldadocuna cuidacuc Diospac lomamanmi chayangui. Chai puebloman ña yaicushpaca, Dios ima nishcata huillaccuna tandanacushpa chai lomamanta urai shamucucpimi tupangui. Paicunapac ñaupataca saltereopi, panderopi, flautapi, arpapi tocashpami shamucunga. Paicunaca Dios ima nishcata huillashpami shamucunga.

⁶ Shina tupashpaca Mandac Diospac Espíritu jatun poderhuan cambacman shamucpimi, canpish paicuna shinallatac huillangui. Shinallatac shuctac runami tucungui.

⁷ Ñuca huillashcacuna chashnatac pactacpica, can imata ruhuasha nishcata ruhuailla. Diosca canhuanmi canga.

⁸ Chai quipaca Gilgal puebloman ñuca manarac chayacpimi, canrac chayangui. Ñucaca quipatami Diosman cushpa tucuita rupachinatapish, paihuan alli tucungapac cushpa huañuchinatapish, apashpa cambacman chayasha. Chaipica cambacman ñuca chayangacaman canchis punzhata shuyangui. Chaipimi can imata ruhuana cashcata yachachisha— nirca.

⁹ Saúl Samuelta cayacaman nishpa anchurincami, Diosca Saulpac shunguta mushucta ruhuarca. Samuel imata nishcacunaca chai punzhallatacmi tucui pactarca.

¹⁰ Paicuna chai lomaman chayacpica, Dios ima nishcata huillac runacunami tandanacushpa Saulta tupangapac llucshirca. Chaipimi Diospac Espíritu jatun poderhuan Saulpacman shamucpi, paicuna shinallatac Dios ima nishcata huillai callarirca.

¹¹ Dios ima nishcata huillaccunahuan cashna huillacpimi, puntaman paita ricsic gentecunaca caishuc chaishuc rimanacushpaca: —¿Cispac churi Saulca imatac tucurca? ¿Paipish Dios ima nishcata huillacchu tucushca?— ninacurca.

¹² Shina rimacpimi, chaipi caccunapuramanta shuc runaca: «¿Paicunapac taitaca pitacyari?» nirca. Chaimantami shuc yuyaita cuc shimicunata rimashpaca: «¿Saulpish Dios ima nishcata huillacpurachu?» nircacuna.

¹³ Dios ima nishcata huillashca quipami Saulca lomaman chayarca.

¹⁴ Chaipimi Saultapish, paita servictapish paipac tioca: —¿Maimantac rircanguichic?— nishpa tapurca. Shina tapucpi Saulca: —Burrocunata mashcangapacmi rircanchic. Mana tariricpimi Samuelpacman chayarcanchic— nirca.

¹⁵ Shina nicpimi, paipac tioca: —Samuel ima nishcata huillaiyari— nirca.

¹⁶ Shina nicpimi, Saulca paipac tiotaca: —Burrocunaca taririshca nishpami huillarca— nirca. Shina huillashpapish pai jatun mandac tucuna cashcata Samuel huillashcataca imata mana huillarcachu.

¹⁷ Chai quipami Samuelca israelcunata cayashpa Mandac Diospac ñaupapi Mizpa pueblopi tandachirca.

¹⁸ Chashna tandachishpami israelcunataca: «Israelcunata Mandac Diosca: Ñucami israelcunataca Egipto gentecunapac maquimanta, shuctac jatun mandaccunapac maquimantapish cacharichishpa chai llactamantaca llucchimurcani.

¹⁹ Shina cacpipish, cancunaca tucui llaquicunahuan llaquichishca causacushcamanta llucchic cancunapac Diostami llaquichircanguichic. Chashna cashpami ñucataca: “Ima cachunpish jatun mandacta churaiyari” nishcanguichic. Chashna cashcamanta cunanca tucui aillucunapish huaranga huarangapi tandanacushcacunapish Mandac Diospac ñaupaman shamuichicyari» nirca.

²⁰ Ña tucui tandanacushca quipami Samuelca tucui Israel aillucuna cuchuyachun mandarca. Ña tucui cuchuyacpica, Benjamín aillutami acllarca.

²¹ Benjamín ailluta, familiacunata catishpa cayashpaca, Matri runapac familiatami acllarca. Chai familiacunamantaca Quispac churi Saultami acllarca. Saulta mashcashpapish mana tarircacunachu.

²² Chaimantami Saúl chayamushcata yachangapac Mandac Diostaca: —¿Chai runaca ñachu caiman shamurca?— nishpa tapurca. Shina nicpimi, Mandac Diosca: —Riquichic, paica macanacungapac tucui apamushca chaupipimi miticushca can— nirca.

²³ Shina nicpimi, paicunaca callpa rishpa llucchimurca. Paita apamushpa tucui israelcunapac chaupipi shayachicpica, shuctac gentecunaca hombroscamanllami carca. Paica tucuita yalli jatunmi carca.

²⁴ Chaimantami Samuelca israelcunataca: —Mandac Dios acllashca runataca ñami ricunguichic. ¡Tucui israelpuramantaca pai shinaca shucllapish mana tiyan!— nirca. Shina nicpimi, israelcuna cushicushpaca: —¡Jatun mandacca causachunlla!— nishpa caparircacuna.

²⁵ Chai quipami Samuelca jatun mandac ima shina mandanata huillashpa, chai nishcacunata quillcashpa, Mandac Diospac huasi ucupi huacaichirca.

²⁶ Chai quipami, Samuelca tucui gentecunata paicunapac huasicunaman cacharca. Shinallatac Saulpish Gabaa llactapi tiyac paipac huasimanmi rirca. Macanacungapac cac sinchi runacunapish paicunapac shungupi Dios alli nicpimi, Saulhuan rircacuna.

²⁷ Ashtahuanpish mana alli shunguyuc runacunaca: «¿Ima shinatac ñucanchictaca llaquimanta llucchinga?» nishpami, yangapi churashpa imata cungapacpish mana apamurca. Ashtahuanpish Saulca mana uyac tucushpa rircallami.