1 SAMUEL 1 - Dios Rimashcata Quillcashcami

Ana huahuata cuchun Diosta mañashcamanta

¹ Efraín urcupi cac Ramataim pueblopimi, zufitapuramanta Elcana runa causarca. Elcanaca Jerohampac churimi carca. Jerohamca Eliupac churimi carca. Eliuca Tohupac churimi carca. Tohuca Zufpac churimi carca. Zufca efrateopurami carca.

² Elcanaca ishcai huarmitami charirca. Shuc huarmica Ana, caishuc huarmica Peninami carca. Peninaca huahuacunata charircami. Ashtahuanpish, Anaca mana charircachu.

³ Elcanaca Mandac Diosta alli ningapac animalta cushpa huañuchingapacmi, pai causana pueblomantaca Silo puebloman huatanta huichai ric carca. Chaipica Elipac ishcai churicuna Ofni, Fineesmi, Mandac Diospac curacuna carca.

⁴ Elcana Diosman animalta cushpa huañuchina punzha chayacpica, paipac huarmi Peninamanpish, paipac churicunamanpish, ushicunamanpish carana cashcata cucmi carca.

⁵ Ashtahuanpish Anamanca chaimanta yallitami carac carca. Mandac Diosllatac huahuata mana cucpipish, Anatami ashtahuan cuyac carca.

⁶ Mandac Diosllatac Ana huahuata mana charichun saquishcamantami paita piñac huarmica yallita rimashpa llaquichic carca.

⁷ Chashnami huatanta Mandac Diospac huasiman rishpa, Peninaca Anataca yallita llaquichic carca. Chaimantami Anaca huacashpalla mana micuc carca.

⁸ Chaita ricushpami paipac cusa Elcanaca: «Ana, ¿ima nishpatac huacangui? ¿Ima nishpatac mana micungui? ¿Ima nishpatac cambac shungupi llaquilla cangui? ¿Manachu ñucaca chunga churicunatapish yalli cani?» nirca.

⁹ Silo pueblopi micushpa, ubiashca quipami Anaca jatarishpa Mandac Diospac huasiman rirca. Elí curaca Mandac Diospac huasi pungu pilar ladopimi tiyacurca.

¹⁰ Chaipimi Anaca tucui almahuan llaquirishpa yallita huacashpa Mandac Diosta mañarca.

¹¹ Paica pactachishatacmi nishpami, «Tucuita Mandac Dioslla, canta servic ñuca cashna llaquihuan cacta yuyariyari. Canta servic ñucataca ama cungarishpa, ashtahuanpish ñucaman shuc cari huahuata cuiyari. Can cucpica, chai huahuataca tucui paipac causaipimi can Mandac Diosllatac servishpa causachun cusha. Shinallatac paipac acchatapish mana pitichishachu» nirca.

¹² Mandac Diospac ñaupapi Ana ña unaita mañacucpimi, Elica paipac shimita ricucurca.

¹³ Anaca shungu ucullapi mañashpami, shimillata cuyuchicurca. Ashtahuanpish pai rimashcaca mana uyarircachu. Chaimantami Elica cai huarmica machashcami nishpa yuyacurca.

¹⁴ Chashna yuyacushpami Elica: —¿Ima horascamantac machashcalla cagringui? ¡Vinota ubianataca ña saquiyari!— nirca.

¹⁵ Shina nicpimi Anaca: —Ñuca amito, mana machashcachu cani. Vinotapish, machana yacutapish mana ubiarcanichu. Ashtahuanpish ñuca shungupimi, achca llaquihuan cani. Chaimantami ñuca tucui almahuan Mandac Diosta mañacuni.

¹⁶ Canta servic ñucataca ama Diosta mana manchacmi nishpa yuyaichu. Ashtahuanpish jatun llaquihuan huacashpa causacushpami, cunancaman mañacurcani— nirca.

¹⁷ Shina nicpimi Elica: —Cunanca cushicushpa rilla. Israelcunapac Diosca can imata mañashcataca cushca cachun— nirca.

¹⁸ Shina nicpimi Anaca: —Canta servic ñucapish, cambac ñaupapica alli ricurishca cashpami alli caiman— nirca. Shina nishpaca pai maita shamushcata cutishpami micungapac tiyarirca. Chai punzhamanta pachami ña mana ashtahuan llaquilla carca.

Samuel huacharishcamanta

¹⁹ Cayandica utca jatarishpami, Mandac Diosta alli nircacuna. Chai quipaca Ramá pueblopi cac paicunapac huasimanmi rirca. Elcanaca paipac huarmi Anapimi chayarirca. Chashna chayaricpimi, Mandac Diosca Ana mañashcata uyarca.

²⁰ Chashnami Ana huicsayuc tucushpa, sajuarina punzha pactacpica, shuc cari huahuata sajuarirca. Chai huahuataca: «Mandac Diostami ñucaca mañarcani» nishpami Samuelta shutichirca.

²¹ Chai quipami Elcanaca tucui paipac familiacunandi Mandac Diosman animalta cushpa huañuchishpa pai ari nishcata pactachingapac Diospac huasiman rirca.

²² Ashtahuanpish Anaca mana rishpami paipac cusataca: —Cai huahua chuchumanta raquingacaman mana rishachu. Ña raquirishca quipami cai huahuataca paipac huasipi servishpa causachun, Mandac Diosman cushpa paipac ñaupapi saquingapac risha— nirca.

²³ Shina nicpi, paipac cusa Elcanaca: —Canman ashtahuan alli canata ruhuailla. Shinashpaca cai huahuata chuchumanta raquingacaman saquirilla. ¡Mandac Dios pai ruhuasha nishcataca pactachishpami alli canman!— nirca. Shina nicpimi, Anaca huasipi saquirishpa paipac cari huahuataca chuchumanta raquiringacaman huiñachirca.

²⁴ Huahuata chuchumanta raquishca quipami, Mandac Diospac huasiman Silo puebloman apamurca. Paihuanca quimsa huatata charic becitapish, ishcai chunga ishcai kilo harinatapish, shuc puñu vinotapish aparcami. Huahuaca uchillaracmi carca.

²⁵ Becita Diosman cushpa huañuchishca quipami, chai huahuataca Elí curaman curca.

²⁶ Shina cushpami Anaca: —¡Ñuca amitolla! Canca causacunguimi. Cambac ladopi mañashpa tiyacushca huarmillatacmi cani.

²⁷ Cai huahuamantami mañacurcani. Mandac Diosca ñuca mañashcata curcami.

²⁸ Chaimantami cai huahuataca ñucapish Mandac Diosman cuni. Paica tucui causaipimi, Mandac Diospacta ruhuashpa causanga— nirca. Shina nishpami Mandac Diosta allimari cangui nirca.