1 REYES 8 - Dios Rimashcata Quillcashcami

Diospac Arcata Diospac huasiman apashcamanta

¹ Tucuita ruhuashca quipami Salomonca paipac ñaupaman israelcunata pushac yuyaccunata, Israel aillucunata tucui mandaccunata, Israel familiacunata mandaccunata Jerusalenman tandachirca. Paicunataca Mandac Dios ari nishca quillcata huacaichina Arcata Davidpac pueblo Sionmanta apamungapacmi tandachirca

² Etanim shuti canchis quillapimi tucui israelcuna jatun mandac Salomonhuan tandanacurca. Chai quillaca jatun fiestata ruhuana punzhacunami carca.

³ Israelcunata pushac tucui yuyaccuna shamucpimi, curacunaca Diospac Arcata japircacuna.

⁴ Mandac Diospac Arcatapish Dios-huan tupana huasitapish, Diospacta ruhuangapac chai carpapi imalla tiyashcacunatapish apamurcacuna. Chaicunataca curacuna shinallatac levitacunami apamurcacuna.

⁵ Shina apamucpica, jatun mandac Salomonpish, paihuan tandanacushca tucui israelcunapish, Diospac Arcata ñaupapimi ovejacunata, huagracunata Diosman cushpa huañuchirca. Chai animalcuna achca cacpimi ima shina mana yupai pudircacuna.

⁶ Chai quipami curacunaca Mandac Dios ari nishca quillcata huacaichina Arcataca Dios-huan tupana huasiman yaicuchishpa, Diospaclla chicanyachishca ucuman apashpa querubincunapac alas ucupi churarca.

⁷ Chai querubincunaca Diospac Arca jahuatami alasta chutashca carcacuna. Chashnami Arcatapish huanduna vara caspicunatapish alas-huan tapashca carca.

⁸ Chai vara caspicunaca largo cashcamantami, chai caspi umacunaca Diospac chicanyachishca ucu ñaupamantaca ricunalla carca. Shina cashpapish canzhamantaca mana ricunallachu carca. Chaica cunancamanmi chashnallatac tiyacun.

⁹ Diospac Arcapica ima shucca mana tiyarcachu. Horeb urcupi cashpa, Moisés churashca ishcai tabla rumicunallami tiyacurca. Chai rumicunapica, Egiptomanta llucshimucpi, Mandac Dios israelcunahuan ari nishcatami quillcashca carca.

¹⁰ Diospaclla cac ucumanta curacuna llucshicpica puyumi Mandac Diospac huasipica jundarca.

¹¹ Puyu jundashca cacpimi, curacunaca Diospacta ruhuanata mana pudircacuna. Mandac Diospac sumaimana achicmi, chai huasipica jundarca.

Salomón Diospac huasita Diosman mingashcamanta

¹² Chashna cacpimi, Salomonca: «Mandac Dioslla, canca pura tutapimi causasha nircangui.

¹³ Shina cacpipish, ñucaca can causachunmi shuc huasita shayachircani. Chai huasipimi canca huiñaita causangui» nirca.

¹⁴ Jatun mandac Salomón cutimushpami, tucui tandanacushca israelcunata bendiciarca. Tandanacushca israelcunaca tucuimi shayacurcacuna.

¹⁵ Shina shayacucpi paica: «Israelcunata Mandac Diosca alli nishca cachun. Ñuca taita Davidman pai ima nishcataca paipac maquihuan ruhuashpami pactachishca. Paica:

¹⁶ “Ñuca acllashca israelcunata Egiptomanta llucchimushca punzhamanta pacha, tucui Israel aillucunapac pueblocunamantaca maijantapish ñuca shuti causana huasita shayachichunca, mana acllarcanichu. Shina cashpapish ñuca acllashca israelcunata mandachunca, Davidtami acllarcani” nishcami nirca.

¹⁷ Israelcunata Mandac Diospac shutipi mañana huasita ruhuanaca ñuca taita Davidpac shungupimi tiyarca.

¹⁸ Ashtahuanpish Mandac Diosca ñuca taita Davidtaca: “Ñucata mañana huasita shayachinatami cambac shungupi yuyarircangui. Can chaita yuyarishcaca allimi.

¹⁹ Shina cashpapish, huasitaca mana canchu shayachingui. Ashtahuanpish cambac churimi ñucata mañana huasitaca shayachinga” nishca carca.

²⁰ Mandac Diosca pai cushami nishcataca pactachishcami. Chaimantami ñucaca Mandac Dios ima shina nishca shinallatac ñuca taita Davidpac randi, israelcunata mandangapac tiyarinapi tiyarircani. Shinallatac israelcunata Mandac Diospac shutipi mañana huasitapish shayachircani.

²¹ Chai huasipimi Diospac Arcata churangapac shuc ucuta ruhuarcani. Chai Arcapica, ñaupa taitacunata Egiptomanta llucchimushpa, Mandac Dios paicunahuan ari nishca quillcami tiyacun» nirca.

²² Shina nishca quipami Salomonca Mandac Diospac altar ñaupapi shayarishpa, tucui tandanacushca israelcuna ñaupapi jahuaman maquita chutashpaca:

²³ «Israelcunata Mandac Dioslla, can Dios shinaca jahua pachapipish, cai pachapipish mana tiyanchu. Canta tucui shunguhuan cazushpa, cambac ñaupapi alli puric canta serviccunata llaquishpami, imata ari nishcatapish pactachingui.

²⁴ Canta servic ñuca taita Davidman cushami nishcataca pactachishcanguimi. Cambac shimihuan huillashcataca cambac maquihuan ruhuashpami cunan punzhapi ricushca shinallatac pactachishcangui

²⁵ Israelcunata Mandac Dioslla, cunanca canta servic ñuca taita Davidman cushami nishcataca pactachiyari. Canca: “Cambac huahua huahuacuna ñuca ñaupapi can causashca shina causashpa ñucata cazucpica Israel llactata mandangapac tiyarinapi tiyaric runaca mana illangachu” nishcami carcangui.

²⁶ Shina cashcamanta israelcunata Mandac Dioslla, cunanca canta servic ñuca taita Davidman cushami nishcataca pactachiyari.

²⁷ Ashtahuanpish, ¿Diosca cai pachapica causangachu imashi? Riqui, jahua pachapac ashtahuan jahuaman cac jahua pachapish can Dios causangapacca mana pactanchu. Ñuca shayachishca cai huasicarin, ¡Maitatac pactangayari!

²⁸ Shina cacpipish ñucata Mandac Dioslla, canta servic ñuca cambac ñaupapi caparishpa, cunan cashna mañacuctaca uyaiyari.

²⁹ Canhuan tupana cai huasitaca tutapish, punzhapish chapacunguilla. Canllatacmi: “Cai huasipimi ñucaca causasha” nircangui. Chaimanta canta servic ñuca caipi mañacuctaca uyaiyari.

³⁰ Canta servic ñucapish, can acllashca israelcunapish cai huasipi mañashcataca uyanguiyari. Can causana jahua pachamanta uyashpa juchacunatapish perdonanguiyari.

³¹ Maijanpish paipac ricsishcahuan juchallicpi, chashna cashcata mana chashna cashcata cambac altar ñaupapi huillachun cai huasiman pushamucpica,

³² jahua pachapi uyashpa, canta serviccuna imata ruhuana cashcata ricuchingui. Canta mana manchactaca pai mana allita ruhuashca shinallatac paipac jahuapi llaquita churangui. Cashcata ruhuactaca imatapish cashcata ruhuashcamantami, allicunata japina cashcata cungui.

³³ Can acllashca israelcunaca canta mana cazushpa juchallishcamantami paicunata piñaccunapac ñaupapi llaqui tucungacuna. Shina tucushpaca canman tigrarishpa, cambac shutita alli nishpa, cai huasipi mañacpica,

³⁴ jahua pachapi uyashpami, can acllashca israelcunapac juchata perdonangui. Shina perdonashpaca, paicunapac ñaupa taitacunaman can cushca llactaman cutichimunguiyari.

³⁵ Canta mana cazushpa, paicuna juchata ruhuashcamantaca jahua pachata huichcashpami mana tamyachingui. Paicunata chashna llaquichicpica, cai huasipi canta mañashpami, cambac shutita alli nishpa canman tigraringacuna.

³⁶ Shina ruhuacpica, jahua pachapi uyashpami, canta serviccunapac juchatapish, can acllashca israelcunapac juchatapish perdonangui. Canta cazushpa purichunpish, alli ñanta ricuchishpa yachachingui. Can acllashca gentecunaman cushca llactapipish tamyachingui.

³⁷ Cai llactapica jatun yarcaipish, ungüipish, chagracuna chaquinapish, yuracuna quilluyanapish, langostacunapish mana cashpaca volashpa puric curucuna shamushpa chagrata tucuchinapish tiyangachari. Shinallatac paicuna causacuc llactaman paicunata piñaccuna shamushpa, llaquichingapac muyushpa shayaringachari, mana cashpaca imapish shuctac llaquicuna, shuctac ungüicuna tiyangachari.

³⁸ Shina tiyacpica maijan shuclla cashpa, mana cashpaca can acllashca tucui israelcuna cashpa, paicuna llaqui tucushcata, mana cashpaca imapish ungüi japishcata yachashpami, cai huasiman maquita chutashpa canta mañangacuna.

³⁹ Shina mañacpica, can causana jahua pachapi uyashpami, paicunapac juchacunata perdonangui. Shina perdonashpaca, paicuna imata ruhuashpa causashca shinallatac cungui. Gentecunapac shungutaca canllami ricsingui. Canllami yachangui.

⁴⁰ Can shina ruhuacpimi, ñucanchic ñaupa taitacunaman can cushca llactapi causacushpaca, tucui causai punzhacunapi canta manchashpa causanga.

⁴¹ Shinallatac shuc llactamanta shamushca mana can acllashca Israelpura cashpapish, cambac shutita alli ningapacmi shamunga.

⁴² Cambac shutitapish, jatun imatapish ruhuaclla Dios cashcatami cantaca yachac chayangacuna. Chashna yachashpami, cai huasipi canta mañac shamunga.

⁴³ Chashna mañacpica, can causacuc jahua pachapi uyanguiyari. Shina uyashpami shuc llactamanta cacpipish, paicuna imata mañashca shinallatac ruhuangui. Chashna ruhuacpimi, tucui cai pachapi causaccunaca cambac shutita ricsishpa, can acllashca israelcuna shinallatac canta manchashpa causanga. Shinallatac ñuca shayachishca cai huasipipish, cambac shutita jatunyachishpami mañangacuna.

⁴⁴ Can acllashca israelcunaca paicunata piñaccunahuan macanacungapac llucshishpaca can cachashca ñantami ringacuna. Chashna rishpaca, can acllashca puebloman, cambac shutipi mañana ñuca shayachishca cai huasiman tigrarishpami cantaca mañangacuna.

⁴⁵ Shina mañashcata jahua pachapi uyashpaca, paicuna mañashca shinallatac ima nicushcata cunguiyari.

⁴⁶ Juchata mana ruhuac runaca shucllapish mana tiyanchu. Canta mana cazushpa juchallicpica, paicunahuanca yallita piñaringuichari. Chashna piñarishpaca, caru llactaman cashpa, cuchulla llactaman cashpa prezu apachun, paicunata piñaccunapac maquipi churanguichari.

⁴⁷ Paicunaca prezu apashca llactapi cashpami, canta mana cazushcata yuyaringacuna. Shina yuyarishpa, paicuna mañashpaca: “Juchatami ruhuashcanchic. Millaita ruhuashpami pandarishcanchic” ningacunami.

⁴⁸ Paicunata piñaccunapac llactapi prezu cashpami, paicunapac tucui shunguhuan, tucui almahuan canman cutiringacuna. Shina cutirishpaca paicunapac ñaupa taitacunaman cushca llactaman, can acllashca puebloman, canman ñuca shayachishca cai huasiman tigrarishpami canta mañangacuna.

⁴⁹ Paicuna shina mañacpica, can causacuc jahua pachapi paicuna mañashcata uyanguiyari shinallatac paicuna ima nicushcatapish pactachinguiyari.

⁵⁰ Can acllashca gentecuna juchata ruhuashpa, canta piñachishcata tucui mana alli ruhuashcata perdonanguiyari. Paicunata llaquichingapac apaccunata llaquina yuyaita cunguiyari.

⁵¹ Paicunaca can acllashca cambac gentecunami. Paicunataca fierrota yacuyachina hornomanta shinami Egiptomantaca llucchimurcangui.

⁵² Canta servic ñuca mañashcata, can acllashca israelcuna mañashcata ricushpa, ñucanchic ima llaquihuan cashpa, mañacuctaca uyanguiyari.

⁵³ Jatun Mandac Dioslla, ñucanchictaca tucui cai pachapi causacpuramantami cambac cachun acllarcangui. Chaitaca ñucanchic ñaupa taitacunata Egiptomanta llucshimushpa, canta servic Moisesman huillashca shinallatacmi, chashna ruhuarcangui» nirca.

⁵⁴ Salomonca chashnami Mandac Diospac altar ñaupapi cungurishpa, maquicunatapish huichaiman alzashpa, mañarca.

⁵⁵ Chashna mañashca quipaca jatarishpami tucui tandanacushca israelcunataca sinchita caparishpa bendiciashpaca:

⁵⁶ «¡Mandac Diosca alli nishca cachun! Paica paita servic Moisesta huillachun mandashca shinallatacmi tucui imata cusha nishcataca shuc rimashcallatapish mana cungarishpa, tucui pactachishca.

⁵⁷ Ñucanchicta Mandac Diosca ñucanchic ñaupa taitacunahuan cashca shinallatac, ñucanchic-huanpish cachun. Ñucanchictaca ama cungarichun, ama saquichun.

⁵⁸ Ñucanchic shungupica paillatac cazuna yuyaita ashtahuan churachun. Ñucanchic taitacunaman cushca mandashcacunata, imata ruhuachun mandashcacunata, quillcachishca shimicunatapish cazuna yuyaita cuchun.

⁵⁹ Mandac Diospac ñaupapi ñuca mañashca rimaicunaca punzhapish, tutapish ñucanchicta Mandac Diospac yuyaipi cachun. Shinallatac paita servic ñucamanpish pai acllashca israelcunamanpish ima illashcata ricushpa, ima punzha imata ruhuana cacpipish ruhuachun.

⁶⁰ Chashna ruhuacpimi, cai pachapi tiyac tucui llactacunapi causaccunaca shuctac Dios mana tiyashcata, ashtahuanpish Mandac Dioslla, Dios cashcata yachangacuna.

⁶¹ Cancunapac shunguca ñucanchicta Mandac Dios-huan alli cachun. Pai mandashcacunata, quillcashca shimicunata cunan punzhacaman pactachishca shinallatac pactachinguichic» nirca.

⁶² Chai quipami jatun mandacpish, paihuan cac tandanacushca tucui israelcunapish Mandac Diospac ñaupapi animalcunata cushpa huañuchirca.

⁶³ Mandac Dios-huan alli tucungapacmi Salonmanca ishcai chunga ishcai huaranga huagracunata, patsac ishcai chunga huaranga ovejacunata Diosman cushpa huañuchirca. Chashnami jatun mandacpish, tucui israelcunapish Mandac Diospac huasitaca Diosllamantac mingarcacuna.

⁶⁴ Jatun mandacca chai punzhallatacmi Mandac Diospac huasi ñaupapi tiyac chaupi pungu pambatapish Diospaclla cachun curca. Diosman cushpa tucui rupachina animalcunata, ofrendacunata, Dios-huan alli tucungapac cushca huirataca chai pungu pambapimi rupachirca. Mandac Diospac ñaupapi cac bronce altarca uchillami carca. Diosman cushpa tucui rupachina animalcunata, ashtahuan ima cushcacunata, Dios-huan alli tucungapac cushca huirata rupachingapacca mana pactarcachu.

⁶⁵ Chai punzhacunapi Salomonca Mandac Diospac ñaupapica canchis punzhata jatun fiestata ruhuarca. Lebo-hamat puebloman yaicuna ladomantaca Egipto llacta jatun huaicu ladocunaman causacuc tucui israelcunandimi tandanacushpa, canchis punzhata fiestata ruhuarca. Chai quipapish canchis punzhatami fiestata ruhuarca. Tucui chunga chuscu punzhatami, fiestata ruhuarca.

⁶⁶ Ña pusac punzhapica Salomonca cayacaman nishpami gentecunataca cacharca. Chashna cachacpimi, paicunaca jatun mandacta bendiciashcamanta, shungupi yallita cushicushpa paicunapac huasicunaman cutircacuna. Mandac Dios paita servic Davidman, pai acllashca israelcunaman tucui allicunata ruhuashcamantami chashna cushicurca.